aju lettu i littere de prima scritte de l'alter ego mie (si dice accussì?), direttamente mentre i scrivìa, datu chi essennu iu intra a capu sua a dispettu sue putìa benissimu sbirciare, attraversu l'uocchi chi tenimu 'n multiproprietà, i parole intru u mumentu esattissimu chi illu i scrivìa veramente.
Iu ci cridu benissimu chi l'UFO esistanu. Si un esistanu, pecchì c'è a parola ppe i chiamare? Tutti i cose chi c'è a parola hannu de esistere ppe forza pecchì sinnò un tene nullu sensu chi c'è a parola. Si iu dicu chi c'è u tramuntu, u pozzu dicere sulu pecchì aju vistu chi c'è davveru. L'atri mi capiscianu sulu pecchì puru iddi sannu chi cosa è u tramuntu. Tutti sapimu chi cosa su' l'UFO, allura è automaticu chi chisti esistanu automaticamente ppe forza davveru senza dubbiu.
Allura un capisciu pecchì chira atra persuna chi iu puru sugnu ha dittu intra i littere passate accussì tanti cose chi un stannu né 'n cielu né 'n terra e allura un pònnu essere nullu UFO (bellu jocu de parole, veru? eh!).
A verità è chi i marziani ci su', de quarche parte, ma un su' ccà, pecchì si fussaru ccà un fussaru marziani, cumu ni dice a logica. E l'UFO su' naturalmente i dischi volanti, cumu ognunu ha pututu notare quannu su' apparsi ccà e llà. E l'UFO su' chini de marziani, ma ci nni stannu assai pecchì su' picciuli.
Allura un capisciu chi cosa c'è accussì tantu de dicere supra chista fantascienza, chi pue 'n pratica un fussa atru chi i film supra l'UFO e ccu tutti chiri effetti speciali ppe attirare i persune au cinema. Ma a mia un mi freganu! Iu aspettu chi i film venanu 'n televisione.
Iu sugnu cunvintu chi ci su' già stati tanti 'ncuntri ravvicinati. L'extraterrestri un su' cattivi, o armenu, un su' cattivissimi, ma putissaru addivintare de nu mumentu all'atru. Si fussaru cattivissimi n'avissaru già distrutti, chistu è ovviu. 'Nveci ni cuntrollanu, ppe vidire cumu ni cumportamu, pecchì ppe iddi simu 'mportanti, puru si un sacciu pecchì. Ci putissaru essere puru extraterrestri travestuti de esseri umani. L'extraterrestri pònnu fare tuttu, doppu tuttu su' marziani! Iu cridu chi bisogna stare attenti a chiri chi parlanu de chisti cose facennu tanta cunfusione. Ci su' l'UFOLOGI seri, chi s'hannu de rispettare, e ci mancassa! Ma pue ci su' chiri cumu chiru tipu chi sugnu iu quannu u sugnu (scusati si un sugnu chiaru), chi dicianu accussì tanti parole chi un vuonnu dicere nente, e chi servanu sulu a cunvincere nue tutti chi iddi ni sannu cchiù de nue! Ma iu un mi fazzu fregare! Si chisti belli tipi hannu avutu quarche 'ncuntru ravvicinatu, puru du terzu tipu, u hannu de dicere chiaramente e magari fare vidire puru quarche fotografia o megliu fussa na videocassetta. Si un l'hannu avutu allura chi si nne stannu zitti pecchì chi vuonnu sapìre cchiù de l'atri chi magari quarche 'ncuntru ravvicinatu l'hannu puru avutu, discretamente. Speru chi sugnu statu chiaru.
Chi mi vuonnu spiegare a mia chi cosa è a fantascienza?!!! U sacciu benissimu!! Tegnu a videocassetta de Guerre Stellari e aju vistu puru tutti i film chi su' venuti doppu. Aju vistu puru i film cchiù brutti, cumu Blade Runner, chi infatti un m'è piaciutu pecchì un è pussibile chi u marzianu ni vene a fare a morale e alla fine tene ancora ragione illu puru si giustamente more.
Iu cridu chi 'n futuru a fantascienza ha ppe forza de addivintare cchiù 'mportante, pecchì ccu i computer moderni ci pònnu fare sempre cchiù effetti speciali, e quannu ci sarrà nu 'ncuntru ravvicinatu ufficiale chistu ci farà puru nu saccu de pubblicità (alla fantascienza). Ppe quantu addiventerà 'mportante, a fantascienza sarrà però sempre na cunseguenza de l'UFOLOGIA, de chistu ni sugnu sicuru. Pue suprattuttu mo chi hannu fattu tutti chisti telescopi moderni putentissimi ccu cui si putrà de sicuru vidire i dischi volanti puru assai cchiù de luntanu e 'ngranditi.
Iu pue tegnu puru na teoria personale, chi un dicu a nullu ma a tia chi si' u Maurizio Costanzo Show a pozzu dicere. Ci su' nu saccu de persune famose chi probabilmente su' extraterrestri travestuti, oppuru su' 'n cuntattu ccu iddi. Un vuogliu dicere i nomi, sinnò s'accorgianu chi l'aju scuperti e cumu au solitu mi sopprimianu. Si m'inviti alla trasmissione tua ti spiegu tutti i particulari, ma m'hai de prumettere de un invitare puru chira atra persuna chi c'è puru intra de mia e chi si cride accussì intelligente sulu pecchì u è, pecchì si vene puru illu pue supra u cchiù bellu, quannu aju de parlare iu, mi caccia da guida du ciarviellu e si minte a dicere tutti i fesserìe chi dice sempre ppe cunfondere i persune cchiù semplici cumu a mia, e accussì finisce chi tu m'hai invitatu ppe nente.
Iu l'odiu chiri chi fannu i superiori leggennu i libri de fantascienza! Un s'accorgianu chi su' ridiculi? Tutti i persune normali a fantascienza a guardanu giustamente sulu au cinema o 'n tivù, e si davveru s'appassionanu addiventanu UFOLOGI. Intra i libri un c'è de sicuru nente de cchiù chi au cinema: intra i libri ci su' sulu i parole, ma chisti ci su' puru au cinema o 'n tivù, infatti i personaggi parlanu, no? Ma au cinema e 'n tivù ci su' puru l'immagini, l'azione, u sonu stereo e intra certi sale puru u sorround o cumu diavulu si chiama. E pue i libri su' na 'nvenzione de quannu un c'era a televisione. Si ci fussa stata a televisione, i libri un l'avissaru 'nventati de sicuru, chistu è sicuru! E u cinema e a tivù l'hannu 'nventati propriu pecchì i libri eranu troppu noiusi. E pue n'hannu 'mparatu chi bisogna campare ccu a democrazia, chi vò dicere chi a maggioranza tene sempre ragione. E allura iu sfidu chisti presuntuusi, cumu chiru sapientone chi puru c'è de quarche parte intra de mia, a dicere chi a maggioranza preferisce i libri au cinema e alla tivù! A maggioranza i libri l'ammazzassa subitu, chista è a verità, e è davveru antidemocraticu chi un si provvede a l'avìre già fattu de tiempu!
Suprattuttu ccu i libri de fantascienza a differenza è terribile. L'effetti speciali, cuntati supra u libru, senza figure, mi fannu sulu tantissima pena. Ppe fortuna un aju mai lettu chisti libri, ma m'immaginu chi a descrizione a parole de l'effetti speciali è a cosa cchiù scema chi riesciu a m'immaginare. E si de nu libru de fantascienza ci levi a descrizione de l'effetti speciali, chi ci resta?

Roberto Quaglia