apo lèghidu sas lìteras precedentes iscritas dae s'alter ego meu (si narat gasi?), diretamente mentras las iscriiat, dadu chi essende deo in sa conca sua a malgradu suo podia beníssimu sbirciare, a traessu de sos ogros chi tenimus in multipropriedade, sas paràulas in su momentu esatìssimu chi issu las iscriiat a beru.
Deo bi creo beníssimu chi sos UFO esistint. Si no esistint, proite b'at sa paràula pro los giamare? Totu sas cosas chi b'at sa paràula ant de esìstere pro fortza proite sinono no tenet perunu sensu chi b'at sa paràula. Si deo naro chi b'at su tramontu, lu potzo nàrrere isceti proite apo bidu chi b'est a beru. Sos àteros mi cumprendent isceti proite fintzas issos ischint ite est su tramontu. Totus ischimus ite sunt sos UFO, tando est automàticu chi custos esistint automàticamente pro fortza a beru sena duda.
Tando no cumprendo proite cussa àtera persone chi deo fintzas so at naradu in sas passadas lìteras gasi tantas cosas chi no istant ne in chelu ne in terra e gasi no podent èssere perunu UFO (bonu giogu de paràulas, a beru? eh!).
Sa veridade est chi sos martzianos bi sunt, dae carchi parte, ma no istant inoghe, proite si esserent inoghe no diant èssere martzianos, comente nos narat sa lògica. E sos UFO sunt naturalmente sos discos bolantes, comente ognunu at pòdidu notare cando sunt aparfidos inoghe e incue. E sos UFO sunt prenos de martzianos, ma bi nde sunt medas proite sunt minoreddos.
Tando no cumprendo ite b'at gasi tantu de nàrrere subra custa fantasièntzia, chi poi in pràtica no diat èssere àteru che sos films subra sos UFO e cun totu cussos efetos ispetziales pro atirare sas persones a su tzìnema. Ma a mie no mi frègant! Deo iseto chi sos films benint in televisione.
Deo so cumbintu chi bi sunt giai istados medas atòbios ravvitzinados. Sos estraterrestres no sunt malos, o a su nessi, no sunt malìssimos, ma diant pòdere diventàrelu dae unu momentu a s'àteru. Si esserent malìssimos nos aiant a àere giai distrutu, custu est òviu. Imbetzes nos controllant, pro bìdere comente nos cumportamus, proite pro issos semus importantes, fintzas si no isco proite. Diant pòdere b'èssere fintzas estraterrestres trabestidos dae èsseres umanos. Sos estraterrestres podent fàghere totu, a pustis de totu sunt martzianos! Deo creo chi bi cheret istare atentos a cussos chi faeddant de custas cosas faghende tanta cunfusione. B'at sos UFOLOGI sèrios, chi andant rispetados, e bi mancaret! Ma poi b'at cussos comente a cussu tipu chi so deo cando lu so (iscusade si no so craru), chi narant gasi tantas paràulas chi no cherent nàrrere unu bonu nudda, e chi servint isceti a cumbìnchere a nois totus chi issos nde ischint prus de nois! Ma deo no mi fatzo fregare! Si custos bellos tipos ant tentu carchi atòbiu ravvitzinadu, fintzas de su tertzu tipu, l'ant de nàrrere craramente e forsis fàghere bìdere fintzas carchi fotografia o mègius diat èssere una videocasseta. Si no l'ant tentu tando chi si nde istant mudos proite ite cherent ischìrende prus de sos àteros chi forsis carchi atòbiu ravvitzinadu l'ant fintzas tentu, discretamente. Ispero chi so istadu craru.
Ite cherent ispiegare a mie ite est sa fantasièntzia?!!! Lu isco beníssimu!! Tèngio sa videocasseta de Guerre Stellari e apo bidu fintzas totu sos films chi sunt bènnidos a pustis. Apo bidu fintzas sos films prus feos, comente Blade Runner, chi difatis no m'est pràghidu proite no est possìbile chi su martzianu nos benit a fàghere sa morale e a sa fine tenet galu resone issu sebbene chi giustamente morit.
Deo creo chi in venidore sa fantasièntzia depet pro fortza diventare prus importante, proite cun sos modernos computer si podent fàghere semper prus efetos ispetziales, e cando b'at a èssere un'atòbiu ravvitzinadu ufitziale custu li at a fàghere fintzas unu sacu de publitzidade (a sa fantasièntzia). Pro cantu at a diventare importante, sa fantasièntzia at a èssere però semper una cunseguèntzia de sa UFOLOGIA, de custu nde so seguru. Poi suba de totu immoe chi ant fatu totu custos modernos telescòpios potentìssimos cun sos cales si at a pòdere de seguru bìdere sos discos bolantes fintzas meda prus dae atesu e ingrandidos.
Deo poi tèngio fintzas una teoria personale, chi no naro a nemos ma a tie chi ses su Maurizio Costanzo Show potzo la nàrrere. B'at unu sacu de persones famadas chi probabilmente sunt estraterrestres trabestidos, opuru sunt in cuntatu cun issos. No chèrgio nàrrere sos nòmines, sinono si acatant chi los apo iscobertos e comente a su sòlitu mi soprìmint. Si mi invitas a sa trasmissione tua ti ispiego totu sos particulares, ma m'as de promìtere de no invitare fintzas cussa àtera persone chi b'est fintzas in intro de me e chi si credet gasi intelligente isceti proite lu est, proite si benit fintzas issu poi subra su prus bellu, cando apo de faeddare deo, mi càtziat dae sa guida de su cherbeddu e si ponet a nàrrere totu sas macchìghines chi narat semper pro cunfùndere sas persones prus sìmplitzes comente a mie, e gasi acabat chi tue m'as invitadu pro nudda.
Deo los òdio cussos chi faghent sos superiores leghende sos libros de fantasièntzia! No si acatant chi sunt ridìculos? Totu sas persones normales sa fantasièntzia l'abbàidant giustamente isceti a su tzìnema o in tivù, e si a beru s'apassionant diventant UFOLOGI. In sos libros no b'at de seguru nudda de prus che a su tzìnema: in sos libros b'at isceti sas paràulas, ma custas bi sunt fintzas a su tzìnema o in tivù, difatis sos personàgios faeddant, nono? Ma a su tzìnema e in tivù b'at fintzas sas immàgines, s'atzione, su sonu stèreo e in tzertas salas fintzas su sorround o comente diàulu si giamat. E poi sos libros sunt una imbentzione de cando no b'aiat sa televisione. Si bi fiat istada sa televisione, sos libros no los aiant a àere imbentados de seguru, custu est seguru! E su tzìnema e sa tivù los ant imbentados pròpiu proite sos libros fiant tropu noiosos. E poi nos ant imparadu chi bi cheret bìvere cun sa democratzia, chi cheret nàrrere chi sa majoria tenet semper resone. E tando deo isfido custos presuntuosos, comente a cussu sabidone chi fintzas b'est dae carchi parte in intro de me, a nàrrere chi sa majoria preferit sos libros a su tzìnema e a sa tivù! Sa majoria sos libros los diat bochire luego, custa est sa veridade, e est a beru antidemocràticu chi no si provvedat a l'àere giai fatu dae tempus!
Suba de totu cun sos libros de fantasièntzia su divàriu est terrìbile. Sos efetos ispetziales, contados subra su libru, sena figuras, mi faghent isceti tantìssima pena. Pro fortuna no apo mai lèghidu custos libros, ma m'immàgino chi sa descritzione a paràulas de sos efetos ispetziales siat sa cosa prus istùpida chi mi resesso a immaginare. E si dae unu libru de fantasièntzia bi bogamus sa descritzione de sos efetos ispetziales, ite bi abbarrat?

Roberto Quaglia