hoo legiüü i letter precedent scrivüü del mè alter ego (se dis inscì?), diretament mentre i scriveva, dato che essend mì dent in la soa crapa a soo malgrad podevi benìssim sbircià, attravers i oeugg che gh'èmm in multiproprietà, i parol in del moment esattìssim che lü i scriveva denver.
Mì ghe credi benìssim che i UFO esìsten. Se esìsten minga, perché gh'è la parola per ciamài? Tütt i ròb che gh'è la parola gh'hann de esìst per fòrza perché senò gh'è nissün sens che gh'è la parola. Se mì disi che gh'è el tramont, el pòdi dì domà perché hoo vist che gh'è denver. I alter me capìssen domà perché anca lor sann cossa l'è el tramont. Tütt savèmm cossa hinn i UFO, alora l'è automàtich che quist esìsten automàticament per fòrza denver senza döbbi.
Alora capissi minga perché quela altra persòna che mì anca sont l'ha ditt in di scors letter inscì tanti ròb che stann minga né in ciel né in terra e inscì pòden vess nissün UFO (bell gioeugh de parol, denver? eh!).
La verità l'è che i marzian ghe hinn, in quaich part, ma stann minga ccà, perché se füssen ccà sarìen minga marzian, come ne dis la lògica. E i UFO hinn natüralment i disch volant, come ognidün l'ha podüü notà quand hinn aparì ccà e là. E i UFO hinn pien de marzian, ma ghe n'è assee perché hinn piscinitt.
Alora capissi minga cossa gh'è inscì tant de dì sora sta fantascienza, che poeu in pràtica sarìa nagòtt alter che i film sora i UFO e con tütt quij effett special per tirà la gent al cìnema. Ma a mì me frèghen minga! Mì spetti che i film vègnen in television.
Mì sont convint che ghe hinn già staa assee incontri ravvexinaa. I extraterrèster hinn minga cattiv, o almen, hinn minga cattivìssim, ma podaríen deventàll de on moment a l'alter. Se füssen cattivìssim ne avaríen già destrütt, questo l'è ovi. Inveci ne contròllen, per vedè come se comportèmm, perché per lor sèmm important, anca se soo minga perché. Podaríen vessegh anca extraterrèster travestii de vess üman. I extraterrèster pòden fà tütt, dòpotütt hinn marzian! Mì credi che ghe voeur stà attent a quij che pàrlen de sti ròb fasend tanta confüsion. Ghe hinn i UFOLOGI seri, che vann rispettaa, e ghe mancaria! Ma poeu ghe hinn quij come a quel tipo che sont mì quand el sont (scüsee se sont minga ciar), che dìsen inscì tanti parol che voeuren dì on bell nagòtt, e che sèrven domà a convìnc a nün tütt che lor ne sann pussee de nün! Ma mì me foo minga fregà! Se sti bèi tipi hann avüü quaich incontr ravvexinaa, anca del terz tipo, ghe l'hann de dì ciarament e forsi fà vedè anca quaich fotografia o mej sarìa ona videocassetta. Se ghe l'hann minga avüü alora che se ne stann citt perché cossa voeuren savèn pussee di alter che forsi quaich incontr ravvexinaa ghe l'hann anca avüü, discretament. Speri de vess staa ciar.
Cossa voeuren spiegà a mì cossa l'è la fantascienza?!!! El soo benìssim!! Gh'hoo la videocassetta de Guerre Stellari e hoo vist anca tütt i film che hinn vegnüü dòpo. Hoo vist anca i film pü brütt, come Blade Runner, che defatti el m'è minga piasüü perché l'è minga possìbil che el marzian el ne vègn a fà la morale e a la fin el gh'ha ancora reson lü sebben che giüstament el moeur.
Mì credi che in fütür la fantascienza la gh'ha de per fòrza deventà pussee importanta, perché con i modern computer se pòden fà semper pussee effett special, e quand ghe sarà on incontr ravvexinaa ufficial questo el ghe farà anca on sacch de püblicità (a la fantascienza). Per quant la deventarà importanta, la fantascienza la sarà però semper ona conseguenza de la UFOLOGIA, de questo ne sont sigür. Poeu soratütt adess che hann faa tütt sti modern telescòpi potentìssim con i qual se podarà de sigür vedè i disch volant anca assee pussee de lontan e ingrandii.
Mì poeu gh'hoo anca ona teorìa personal, che disi a nissün ma a tì che te seet el Maurizio Costanzo Show el pòdi dìtela. Gh'è on sacch de persòn famos che probabilment hinn extraterrèster travestii, opür hinn in contatt con lor. Voeuri minga dì i nòmm, senò se incòrgen che i hoo descovert e come al sòlit me soprìmen. Se te me invitet a la toa trasmission te spieghi tütt i particolar, ma te gh'hee de promèttem de invidà minga anca quela altra persòna che gh'è anca dent in mì e che se cred inscì inteligent domà perché el l'è, perché se el vègn anca lü poeu sul pü bell, quand gh'hoo de parlà mì, el me scascia de la guida del cervell e el se mett a dì tütt i sciochezz che dis semper per confònd i persòn pü sempi come a mì, e inscì el finiss che tì te m'hee invidaa per nagòtt.
Mì i òdi quij che fann i superior legend i liber de fantascienza! Se incòrgen minga che hinn redìcol? Tütt i persòn normal la fantascienza la vàrden giüstament domà al cìnema o in tivù, e se denver se apassiònen deventen UFOLOGI. In di liber gh'è de sigür nagòtt de pü che al cìnema: in di liber ghe hinn domà i parol, ma quist ghe hinn anca al cìnema o in tivù, defatti i personagg pàrlen, no? Ma al cìnema e in tivù ghe hinn anca i imàgin, l'azion, el son stereo e in certi sal anca el sorround o come diàvol se ciama. E poeu i liber hinn ona invenzion de quand gh'era minga la television. Se ghe füss staa la television, i liber i avaríen minga inventaa de sigür, questo l'è sigür! E el cìnema e la tivù i hann inventaa pròpi perché i liber èren tròpp nojos. E poeu ne hann imparaa che ghe voeur vìv con la democrazìa, che voeur dì che la maggioranza la gh'ha semper reson. E alora mì sfidi sti presüntüos, come a quel sapienton che anca gh'è in quaich part dent in mì, a dì che la maggioranza la preferiss i liber al cìnema e a la tivù! La maggioranza i liber i coparìa sübit, questa l'è la verità, e l'è denver antidemocràtich che se proveda minga a avèj già faa de temp!
Soratütt con i liber de fantascienza el divari l'è terrìbil. I effett special, contaa sora el liber, senza figür, me fann domà tantìssima pena. Per fortüna hoo mai legiüü sti liber, ma me imàgini che la descrizion a parol di effett special la sìa la ròba pü stüpida che me riessi a imaginà. E se de on liber de fantascienza ghe levèmm la descrizion di effett special, cossa ghe rimann?

Roberto Quaglia