aggio liggiuto 'e llettere precedente scritte d''o alter ego mio (se dice accussì?), direttamente mèntre 'e scriveva, dato ca essènno io dint'â capa soja suo malgrado puteva benìssemo sbircià, attraverzo 'e uocchie ca tenimmo 'n multipruprietà, 'e parole dint'ô mumento esattìssemo ca isso 'e scriveva overamente.
Io ce credo benìssemo ca 'e UFO esìstono. Si nun esìstono, pecché ce sta 'a parola pe 'e chiammà? Tutte 'e cose ca ce sta 'a parola hanno 'a esìstere pe forza pecché si no nun tène nisciun senzo ca ce sta 'a parola. Si io dico ca ce sta 'o tramonto, 'o pòzzo dìcere sulo pecché aggio visto ca ce sta overamente. Ll'ate me capìscono sulo pecché pure lloro sanno che è 'o tramonto. Tutte sapimmo che sò 'e UFO, allora è automàteco ca chiste esìstono automàtecamente pe forza overamente senza dubbio.
Allora nun capisco pecché chella ata perzona ca io pure songo ha ditto dint'a 'e scorze llettere accussì tante cose ca nun stanno né 'n cielo né 'n terra e accussì nun pòzzono essere nisciun UFO (bbuono juoco 'e parole, overo? eh!).
'A verità è ca 'e marziane ce stanno, 'a quacche parte, ma nun stanno ccà, pecché si fòssero ccà nun sarrìano marziane, comme ce dice 'a lògeca. E 'e UFO sò naturalmente 'e dische volante, comme ognuno ha pututo notà quanno sò apparze ccà e llà. E 'e UFO sò chine 'e marziane, ma ce ne stanno assaje pecché sò piccirille.
Allora nun capisco che ce sta accussì tanto 'a dìcere ncopp'a sta fantascienza, ca po' 'n pràteca nun sarrìa ato ca 'e film ncopp'a 'e UFO e cu tutte chille effette speciale pe attirà 'e perzone ô cìnema. Ma a me nun me frègano! Io aspetto ca 'e film vènono 'n televisione.
Io songo cunvinto ca ce sò già state assaje 'ncuntre ravvicinate. 'E extraterrestre nun sò cattive, o almeno, nun sò cattivìsseme, ma putarrìano addiventàrelo 'a 'nu mumento a ll'ato. Si fòssero cattivìsseme ce avarrìano già destrutte, chesto è ovvio. 'Mméce ce contròllano, pe vedé comme ce cumpurtammo, pecché pe lloro simmo 'mpurtante, pure si nun saccio pecché. Putarrìano starce pure extraterrestre travestute 'a essere umane. 'E extraterrestre pòzzono fa tutto, doppotutto sò marziane! Io credo ca ce vo' stà attiente a chille ca pàrlano 'e ste cose facenno tanta confusione. Ce stanno 'e UFOLOGI serie, ca vanno rispettate, e ce mancarrìa! Ma po' ce stanno chille comme a chillu tipo ca songo io quanno 'o songo (scusate si nun songo chiaro), ca dìcono accussì tante parole ca nun vògliono dìcere 'nu bbuono niente, e ca sèrvono sulo a cunvìncere a nuje tutte ca lloro ne sanno cchiù 'e nuje! Ma io nun me faccio fregà! Si sti bbielle tipe hanno avuto quacche 'ncontro ravvicinato, pure d''o terzo tipo, ll'hanno 'a dìcere chiaramente e fórzo fa vedé pure quacche fotografia o meglio sarrìa 'na videocassetta. Si nun ll'hanno avuto allora ca se ne stanno zitte pecché che vògliono sapérne cchiù 'e ll'ate ca fórzo quacche 'ncontro ravvicinato ll'hanno pure avuto, discretamente. Spero ca songo stato chiaro.
Che vògliono spiegà a me che è 'a fantascienza?!!! 'O saccio benìssemo!! Tengo 'a videocassetta 'e Guerre Stellari e aggio visto pure tutte 'e film ca sò venute doppo. Aggio visto pure 'e film cchiù brutte, comme Blade Runner, ca defatte nun m'è piaciuto pecché nun è possìbbile ca 'o marziano ce vène a fa 'a morale e â fine tène ancora raggione isso sebbene ca giustamente more.
Io credo ca 'n futuro 'a fantascienza add'à pe forza addiventà cchiù 'mpurtante, pecché cu 'e mudèrne computer ce pòzzono fa sempe cchiù effette speciale, e quanno ce sarrà 'n 'ncontro ravvicinato ufficiale chesto lle farrà pure 'nu sacco 'e pubblicità (â fantascienza). Pe quanto addiventarrà 'mpurtante, 'a fantascienza sarrà però sempe 'na cunseguenza d''a UFOLOGIA, 'e chesto ne songo sicuro. Po' suprattutto mò ca hanno fatto tutte sti mudèrne telescòpie putentìsseme cu 'e quale se putarrà 'e sicuro vedé 'e dische volante pure assaje cchiù 'a luntano e ingrandite.
Io po' tengo pure 'na teurìa personale, ca nun dico a nisciuno ma a te ca si 'o Maurizio Costanzo Show pòzzo dìrela. Ce sta 'nu sacco 'e perzone famuse ca probabilmente sò extraterrestre travestute, oppure sò 'n cuntatto cu lloro. Nun voglio dìcere 'e nomme, si no s'addònano ca ll'aggio scuperte e comme ô sòleto me sopprìmono. Si me invite â trasmissione toja te spiego tutte 'e particulare, ma he 'a me promèttere 'e nun invità pure chella ata perzona ca ce sta pure dint'a me e ca se crede accussì 'ntelligente sulamente pecché 'o è, pecché si vène pure isso po' ncopp'ô cchiù bello, quanno aggio 'a parlà io, me scaccia dâ guida d''o cerviello e se mette a dìcere tutte 'e sciocchezze ca dice sempe pe confònnere 'e perzone cchiù semplice comme a me, e accussì fernisce ca tu m'haje invitato pe niente.
Io ll'odio chille ca fanno 'e superiore liggenno 'e libbre 'e fantascienza! Nun s'addònano ca sò redìcole? Tutte 'e perzone normale 'a fantascienza 'a guàrdano giustamente sulo ô cìnema o 'n tivù, e si overamente s'appassiònano addivèntano UFOLOGI. Dint'a 'e libbre nun ce sta 'e sicuro niente 'e cchiù ca ô cìnema: dint'a 'e libbre ce stanno sulo 'e parole, ma chiste ce stanno pure ô cìnema o 'n tivù, defatte 'e personagge pàrlano, no? Ma ô cìnema e 'n tivù ce stanno pure 'e immàggine, ll'azione, 'o suono stereo e 'n certe sale pure 'o sorround o comme diàvolo se chiamma. E po' 'e libbre sò 'na invenzione 'e quanno nun ce steva 'a televisione. Si ce fosse stata 'a televisione, 'e libbre nun ll'avarrìano inventate 'e certo, chesto è sicuro! E 'o cìnema e 'a tivù ll'hanno inventate proprio pecché 'e libbre èrano troppo nuiuse. E po' ce hanno 'mparato ca ce vo' vìvere cu 'a democrazia, ca vo' dìcere ca 'a maggioranza tène sempe raggione. E allora io sfido sti presuntuose, comme a chillu sapientone ca pure ce sta 'a quacche parte dint'a me, a dìcere ca 'a maggioranza preferisce 'e libbre ô cìnema e â tivù! 'A maggioranza 'e libbre ll'accidarrìa sùbbeto, chesta è 'a verità, e è overamente antidemocràteco ca nun se provveda a ll'avé già fatto 'a tiempo!
Suprattutto cu 'e libbre 'e fantascienza 'o divario è terrìbbile. 'E effette speciale, cuntate ncopp'ô libbro, senza figure, me fanno sulo tantìssema pena. Pe furtuna nun aggio maje liggiuto sti libbre, ma me immagino ca 'a descrizione a parole d''e effette speciale sia 'a cosa cchiù stùpeda ca me riesco a immaginà. E si 'a 'nu libbro 'e fantascienza ce luvammo 'a descrizione d''e effette speciale, che ce rummane?

Roberto Quaglia