aju liggiutu li lettiri pricèdenti scritti dû miu alter ego (si dici accussì?), direttamenti mentri li scrivia, datu ca essennu ju ntâ sò testa sò malgradu putia benissimu sbirciari, attraversu li occhi ca avemu ’n multipruprità, li paroli ntô mumentu esattissimu ca iddu li scrivia veramenti.
Ju ci cridu benissimu ca li UFO esistinu. Si nun esistinu, pirchì c’è la parola pi li chiamari? Tutti li cosi ca c’è la parola hannu a esistiri pi forza pirchì sinnò nun havi nuddu sensu ca c’è la parola. Si ju dicu ca c’è lu tramuntu, lu pozzu diri sulu pirchì aju vistu ca c’è daveru. Li àutri mi capìscinu sulu pirchì puru iddi sannu chi è lu tramuntu. Tutti sapemu chi su’ li UFO, allura è automàticu ca chisti esistinu automàticamenti pi forza daveru senza dubbiu.
Allura nun capisciu pirchì chidd’àutra pirsuna ca ju puru sugnu ha dittu ntê scorsi lettiri accussì tanti cosi ca nun stannu nè ’n celu nè ’n terra e accussì nun pònnu essiri nuddu UFO (beddu jocu di paroli, veru? eh!).
La verità è ca li marziani ci su’, di quarchi parti, ma nun stannu ccà, pirchì si fussiru ccà nun sarrìanu marziani, comu ni dici la lògica. E li UFO su’ naturalmenti li dischi vulanti, comu ognunu ha pututu notari quannu su’ apparsi ccà e ddà. E li UFO su’ chini di marziani, ma ci ni stannu assai pirchì su’ picciriddi.
Allura nun capisciu chi c’è accussì tantu di diri supra sta fantascienza, ca po’ ’n pràtica nun sarrìa àutru ca li film supra li UFO e cu tutti ddi effetti speciali pi attirari li pirsuni ô cìnema. Ma a mia nun mi frèganu! Ju aspettu ca li film vèninu ’n tilivisioni.
Ju sugnu cunvintu ca ci su’ già stati assai ’ncontri ravvicinati. Li extraterrestri nun su’ cattivi, o almenu, nun su’ cattivissimi, ma putissiru addivintarilu di nu mumentu a l’àutru. Si fussiru cattivissimi ci avrìanu già destrutti, chistu è ovviu. ’Mmeci ci contròllanu, pi vidiri comu ni cumpurtamu, pirchì pi iddi semu impurtanti, puru si nun sacciu pirchì. Putissiru starci puru extraterrestri travistuti di essiri umani. Li extraterrestri pònnu fari tuttu, doppututtu su’ marziani! Ju cridu ca ci voli stari attenti a chiddi ca pàrranu di sti cosi facennu tanta cunfusioni. Ci su’ li UFOLOGI serii, ca vànnu rispittati, e ci mancassi! Ma po’ ci su’ chiddi comu a ddu tipu ca sugnu ju quannu lu sugnu (scusati si nun sugnu chiaru), ca dìcinu accussì tanti paroli ca nun vògghinu diri nu beddu nenti, e ca sèrvinu sulu a cunvinciri a nuiautri tutti ca iddi ni sannu cchiù di nuiautri! Ma ju nun mi fazzu frigari! Si sti beddi tipi hannu avutu quarchi ’ncontru ravvicinatu, puru dû terzu tipu, l’hannu a diri chiaramenti e fòrsi fari vidiri puru quarchi futugrafìa o megghiu sarrìa ’na videocassetta. Si nun l’hannu avutu allura ca si ni stannu zitti pirchì chi vògghinu sapirini cchiù dî àutri ca fòrsi quarchi ’ncontru ravvicinatu l’hannu puru avutu, discretamenti. Speru ca sugnu statu chiaru.
Chi vògghinu spiegari a mia chi è la fantascienza?!!! Lu sacciu benissimu!! Aju la videocassetta di Guerre Stellari e aju vistu puru tutti li film ca su’ vinuti doppu. Aju vistu puru li film cchiù brutti, comu Blade Runner, ca defatti nun m’è piaciutu pirchì nun è possibbili ca lu marzianu ci veni a fari la murali e â fini àbbia ancora ragiuni iddu sebbeni ca giustamenti mori.
Ju cridu ca ’n futuru la fantascienza havi pi forza a addivintari cchiù impurtanti, pirchì cî muderni computer ci pònnu fari sempri cchiù effetti speciali, e quannu ci sarà n’’ncontru ravvicinatu ufficiali chistu ci farà puru nu saccu di publicità (â fantascienza). Pi quantu addivintirà impurtanti, la fantascienza sarà però sempri ’na cunsiguenza dâ UFOLOGIA, di chistu ni sugnu sicuru. Po’ suprattuttu ora ca hannu fattu tutti sti muderni telescòpi putintissimi cî quali si putrà di sicuru vidiri li dischi vulanti puru assai cchiù di luntanu e ingranditi.
Ju po’ aju puru ’na teurìa pirsunali, ca nun dicu a nuddu ma a tia ca si’ lu Maurizio Costanzo Show pozzu dirla. Ci su’ nu saccu di pirsuni famusi ca prubbabbilmenti su’ extraterrestri travistuti, oppuru su’ ’n cuntattu cu iddi. Nun vogghiu diri li nomi, sinnò s’addýnanu ca l’aju scuperti e comu ô sòlitu mi sopprìminu. Si mi inviti â tò trasmissioni ti spiegu tutti li particulari, ma hai a mi prumèttiri di nun invitari puru chidd’àutra pirsuna ca c’è puru dintra di mia e ca si cridi accussì ’ntilligenti sulamenti pirchì lu è, pirchì si veni puru iddu po’ supra lu cchiù beddu, quannu aju a parrari ju, mi scaccia dâ guida dû ciriveddu e si metti a diri tutti li scimuniterìi ca dici sempri pi cunfònniri li pirsuni cchiù sèmplici comu a mia, e accussì finisci ca tu m’hai invitatu pi nenti.
Ju li odiu chiddi ca fànnu li supiriuri liggennu li libbra di fantascienza! Nun s’addýnanu ca su’ ridicýli? Tutti li pirsuni nurmali la fantascienza la tàlianu giustamenti sulu ô cìnema o ’n tivù, e si daveru s’appassiònanu addivèntanu UFOLOGI. Ntê libbra nun c’è di sicuru nenti di cchiù ca ô cìnema: ntê libbra ci su’ sulu li paroli, ma chisti ci su’ puru ô cìnema o ’n tivù, defatti li pirsunaggi pàrranu, no? Ma ô cìnema e ’n tivù ci su’ puru li immagini, l’azioni, lu sonu stereo e ’n certi sali puru lu sorround o comu diavulu si chiama. E po’ li libbra su’ ’na ’mminzioni di quannu nun c’era la tilivisioni. Si ci fussi stata la tilivisioni, li libbra nun l’avrìanu inventati di certu, chistu è sicuru! E lu cìnema e la tivù l’hannu inventati propriu pirchì li libbra èranu troppu nuiusi. E po’ ni hannu ’nsignatu ca ci voli vìviri câ dimucrazìa, ca voli diri ca la magghiuranza havi sempri ragiuni. E allura ju sfidu sti prisuntuusi, comu a ddu sapialuni ca puru c’è di quarchi parti dintra di mia, a diri ca la magghiuranza prifirìsci li libbra ô cìnema e â tivù! La magghiuranza li libbra l’accidirìa sùbbitu, chista è la verità, e è daveru antidemocràticu ca nun si pruvveda a l’aviri già fattu di tempu!
Suprattuttu cî libbra di fantascienza lu divariu è terribbili. Li effetti speciali, cuntati supra lu libbru, senza figuri, mi fànnu sulu tantissima pena. Pi furtuna nun aju mai liggiutu sti libbra, ma m’immaginu ca la discrizioni a paroli dî effetti speciali sia la cosa cchiù stúpida ca mi arrinesciu a immaginari. E si di nu libbru di fantascienza ci levi la discrizioni dî effetti speciali, chi ci rimani?

Roberto Quaglia