no sperar de trovar rasonevolesa in ogni mia létera. Queło che elegantemente el se frègia del tìtolo de "rasonévole" el xe quasi senpre la vil ripetision de abusà schemi. No ghe xe mai coraio inte la esternasion de frasi e concèti fati, quali i argomenti rasonévoli quasi senpre i xe. L'ùnico valor de la rasonevolesa la xe la pratisità. La rasonevolesa la xe pràtica parché fondamentalmente condivisa, almanco dai èseri umani pensanti. I èseri umani reagenti, queli che no i pensa ma sénplisemente i reagise a l'anbiente come qualunque tropismo, no i ne interesa e gnanca noaltri interesemo a lori, tant'è vero che serto no i sta lezendo o persependo altrimenti ste parołe, parché lori no i lese altro che qualche tìtolo qua e là. Ne piaze pensar a noaltri come ai umani pensanti, e se no'l xe vero che ne piaze, el xe tutavia vero che questo el piaze a mi, e lo digo sensa timor. E tra i umani pensanti l'argomento de la rasonevolesa el gode de qualche crédito de tropo. No equivochemo. A mi piaze la rasonevolesa. La xe ùtile. Ma la critico parché la xe noiosa, e soratuto parché la ne ingana. La xe noiosa parché la ripete a la morte i so dogmi, sostegnùi da la pròpria natura rasonévole.
La rasonevolesa la inponaria, a chi el volese scrìver altro che qualche crìptica poesioła de merda, de srotolar sapientemente frasi acuratamente calibrà inte i so significati lanpanti e recònditi, frasi mesuratamente confrontà mentalmente, a l'ato de la scritura o un poco prima o un poco dopo, co la imàgine che se ga de la cultura coletiva del contesto uman de cui se xe parte. La rasonevolesa la suzerise de pensar, quando se scrive, ai letori ai quali se se rivolze, par risultar a lori conprensìbile, nonché piasévole o spiasévole a seconda de le pròprie intension, tralassando come se no'l fuse inportante el concèto de la totale e còsmica pròpria libertà inte'l scrìver, invese, asolutamente qualunque cosa a uno ghe venise in mente, con totale disinterese par chi o par cosa un giorno el lezarà ste frasi opur no.
La rasonevolesa la sconseja chi scrive de scrìver par sé, a pròprio uso e consumo, in totale dispreso de qualunque rasonévole considerasion su la comersiabilità de queło che se sta scrivendo. Inte'l momento in cui se tien un qualunque conto de chi el lezarà queło che se scrive, eco che se xe comersial. Se serca de smersiar el pròprio pensiero ai altri, poco importa se el sia in canbio de danaro o de aprovasion, do diverse valute del medèsimo atezamento mercantil.
Tra l'altro, scrivendo par sé inte'l asoluto disinterese verso chi el gavese mai da lézer tuto questo, se dà do posìbili sviłupi de la situasion par el caso che qualcun che no'l sia l'autor el se trova po a lézer "tuto questo":
Inte'l primo caso (el pì frequente), el scrito no ghe piaze e alora el finise opur pezo par lu.
Inte'l secondo caso ghe piaze, e alora el continua a lézer, content de scrocar cussì serti pensieri che l'autor el gaveva scrito par sé e de sicuro no par lu.
Come se vede, no ghe xe nissun perìcolo. Chi el se vol méter a scrìver soltanto par sé el ga però da evitar de contarse la bała de voler scrìver soltanto par sé quando segretamente invese el spera che qualcun po el lese queło che lu el gavaria scrito soltanto par sé, e el mostra forse anca de aprezarlo. In sto caso l'autor el xe un insicuro opur un vil, e probabilmente el ndarà incontro a brusante frustrasion.
E no vale gnanca el fato de scrìver qualcosa par sé e po sercar de no farlo lézer a nissun. Parché mai no se gavaria da farlo lézer a nissun? Se se ga scrito qualcosa soltanto par sé de sicuro no se tien in nissun conto el giudisio che altri i posa o i voja esprìmer de sto scrito. Se no ghe piaze i xe afari lori. E se ghe piaze anca. Se se tien in conto el giudisio dei altri, no se ga scrito par sé. Se ga scrito in modo rasonévole e mercantil, sensa che par "mercantil" se intenda qualcosa de negativo.
El fato che mi me sia sofermà cussì a longo su sto argomento, aludendo tra le righe che no sto scrivendo par altri che no i sia mi (de fato mi son za tute le persone che ancuo me basta - doman vedaremo), pararia suzerir che mi voja convìnser qualcun o comunque condurlo, con tuti sti argomenti, a capir la esensa de queło che sto intendendo dir. Se gavese volù dimostrar che davero no me ne frega gnente de chi el sta lezendo ste righe, gavaria gavù da èser ancora pì caòtico e inconprensìbile e sconclusionà de queło che mi sia comunque egualmente in parte stà. Gavaria gavù da scrìver... ebe insoma, far un saco de cose che deso no le me vien in mente e no go nissuna voja de sforsarme parché efetivamente no me ne frega gnente. El fato che mi no àbia fato tuto questo (qualunque cosa sto "tuto questo" el sia o el posa èser), el dimostra cussì che coerentemente mi no volese par gnente dimostrar che no me ne frega gnente come efetivamente no me ne frega, e dimostràndolo inevitabilmente el destruze e el anula a'l steso tenpo el valor de sta dimostrasion, e destruzéndola la ripristina, cussì ridestruzéndola e ripristinàndola par na quantità infinìa de volte, come in ogni bon paradoso che se rispeta posibilmente el aven opur no.
El xe bufo che par quanto se serca de abolir ogni rasonevolesa inte'l procéder dei pròpri pensieri, la mente no la sta mai a'l zogo e qualche parvensa de senso larvatamente conpìo el se afaccia egualmente a la realtà. Insoma, par novanta persone che giustamente le giudicaria queło che da mi fin a deso vergà contorto vanilòquio de gnanca ecelsa fatura, son pronto a scométarghe che na desina de mati o pochi de manco i insorzaria contra sto giudisio, con argomentasion che no le me interesa e cussì no ne parlarò qua. Cussì, se fè parte dei novanta, sìe a mi grati de gaverve deso reso el conforto de la conferma che sì perfetamente normali, solidamente contegnùi inte la magioransa che come ne inpara la ga senpre ragion. Se fè parte dei diese, sìe a mi grati par i motivi che perfetamente savì da soli, sensa che ve li àbia da ripéter mi.
Ma noto un preocupante ritorno de rasonevolesa inte'l mio sprolòquio, e cussì la pianto sùbito là prima che'l sia tropo presto.

Roberto Quaglia