go notà che da ti se parla de tuto, fora che de fantasiensa. No'l xe un argomento abastansa sèrio? Ma semo sicuri de intènder tuti la stesa cosa quando doparemo la parola "fantasiensa"? Mi son sicuro de no.
Esploremo cussì el significato atribuìbile e atribuìo a la parola "fantasiensa". La parola "fantasiensa", tanto par scominsiar, la esiste soło in italian. La xe un neologismo conià par riprodùser el significato de la espresion inglese science fiction, e asumaremo cussì che la ga el steso significato.
Inte i deceni, de la fantasiensa (science fiction) le xe stà dà numerévoli definision, par òpera de ilustri inteletuali, scritori, esperti de vàrio genere ecc., e nissuna la xe egual a un'altra, anca se ghe xe senpre qualche elemento in comune. Pararia, che nissuna definision la posa da soła definir queło che la fantasiensa efetivamente la sia, pararia che ogni definision la meta in luse uno dei aspeti de sta richìsima letaratura de cui purtropo trope persone no le conose asolutamente gnente.
Tuti i sa, o i crede de saver, cosa la significa la parola "fantasiensa". Fantascienza el xe de fato un vocàbolo che conosemo tuti, el ghe xe anca inte i vocabolari. El 100% dei italiani in grado de parlar, interogà su questo, el gavarà da darve na so risposta. Risposta raramente venà da qualche dubio. Fantascienza, par el 99,9% dei italiani, la significa guere inte'l spasio o invasion del spasio o UFO o mostri schifosi o sénplisemente la xe un agetivo doparà in modo liberatòrio par significar in negativo qualcosa che la sfuze la pròpria conprension. El 99,9% dei italiani (e inte'l resto del mondo la situasion no la xe asè mejo) no'l ga mai leto un libro de fantasiensa. Epuro la parola americana science fiction (e anca queła italiana fantascienza) la xe nata come eticheta de na categoria de raconti e romanzi che i gavese come elemento distintivo - rispeto a la letaratura fin a alora in voga - l'intento de contar na storia del futuro plausìbile soto el punto de vista sientìfico.
Migrando da na streta cerchia de utenti colti a'l gran pùblico de la popolasion intiera, el significato comunemente inteso de la parola science fiction (in Italia fantascienza) el xe mutà.
Soło el 0,1% (persentual otimìstica; probabilmente el xe pì giusto el 0,05%) de la popolasion italiana la ga mai verto un libro de fantasiensa, e soło el 0,02% el lese fantasiensa con na serta regolarità. Tuti i altri i sa de saver cosa el significa el tèrmine fantascienza, ma ovviamente no i pol gaver la stesa opinion de chi el àbia leto la fantasiensa inte i libri.
Qualcun el podaria obietar che no'l xe nesesàrio lézer fantasiensa par saver queło che eła la sia, el podaria bastar gustàrsela a'l sìnema...
Ebe, su questo mi digo soło na cosa: un bon libro de fantasiensa el sta a un bon film de fantasiensa come Charlie Chaplin el sta a Jerry Calà. Se disì che no ve piaze la fantasiensa parché la gavì vista soło a'l sìnema (o pezo ancora in television), el xe come se disési che no ve piaze el sìnema umorìstico parché gavì visto soło i film de Jerry Calà, con tuto el rispeto che qualcun el gavarà par i film de Jerry Calà.
La letaratura de science fiction (dopero d'ora in poi soło el tèrmine inglese parché forse manco fuorviante de queło italian) la xe una de le pì alte espresion de la inteligensa de l'Omo doparà par esplorar le trasformasion che la inteligensa de l'Omo la produrà in futuro inte la vita de l'Omo. Inte la mente de na persona intelisente, propensa a doparar la pròpria vita par ampliar la pròpria cultura, no pol mancar na conosensa de base de sto vasto universo letaràrio che nissun corso de laurea universitàrio inte'l mondo (o quasi; inte i Stati Uniti qualcosa se move in tal senso) ancora el provede a difónder. Inte la bona letaratura de science fiction (ghe xe anca queła cativa, ovviamente, come in tuti i setori), se se nutre de le brilanti estrapolasion su'l futuro de siensa, costume social, tabù, psicologia, sociologia, semàntica, arte, polìtica e, in generale, de tuto queło che'l àbia o el podaria gaver sitadinansa inte'l universo imaginà o imaginàbile da l'Omo. E esplorando le reasion che l'Omo (nonché la Fémena) el palesarà in risposta ai mutà contesti anbientali, la science fiction la se pone ancuo come el mejo e el pì conpleto tra i laboratori par el studio de queło che semo, de queło che ne ga orizinà e dei posìbili destini nostri.
A queli (che i xe asè) i quali par ignoransa i ne sotovaluta l'inportansa cultural, tegnemo a dir che'l Presidente dei Stati Uniti e el Pentàgono no i fa el steso. Da asè ani ormai, lori i conpra consulense dei pì inportanti scritori de science fiction americani, su'l prosèguo de le trasformasion polìtiche e sociali. Questo parché i scritori de science fiction i ga da dar risposte. Un mucio de risposte. E generalmente anca abastansa sensate.
Inte la asosiasion internasional M.E.N.S.A., che la riunise soltanto indivìdui con un Q.I. (Quosiente de Inteligensa) superior a 140 (el valor medio el xe 100), na persentual che la podaria rivar a'l 30% la lese abitualmente science fiction (la media italiana no la supera el 0,02%).
In na pròsima létera, caro Maurizio Costanzo Show, vedaremo come la letaratura de science fiction la xe nata, quando la xe nata e soratuto parché.

Roberto Quaglia