capita qualche volta che se senta la voja o el bisogno (do sensasion sorełe) de pensar o de dir o de scrìver qualcosa de intelisente, unìi a'l timor de no èser in grado. Se ga la consapevolesa che se podaria, anca savendo che in queł istante no se pol. I pensieri i xe confusi, ma no tanto da no saver che i lo xe. La xe na condision frustrante, parché se se incorze de rivar a un paso da pensieri che i sodisfaria la esizensa che noaltri avertimo de pensarli, sensa che però lori i sorza o anca soltanto i apara par un istante inte la nostra mente. Se sentimo stùpidi, asè de pì de chi mai el ga pensà de èserlo sénplisemente parché no ghe xe mai venù in mente, forse parché el lo xe.
Sucede po che sti istanti i se protraga, diventando periodi e intiere fasi de la vita. In tali circostanse, la cosiensa la fadiga a restar ancorà a na linea de pensieri par pì de qualche breve minuto. L'entropia, tanto par doparar na parola difìsile, la xe in aguato e la colpise a fondo. Cosa vol dir sta frase? Fè finta de gnente. Tanto par rénder l'idea a'l mejo, no se faremo scrùpolo de lassar che sto fenòmeno el se aplica a noaltri stesi qua e deso. Savéndolo in antìsipo, el letor el patirà de manco, opur no.
Semo tuti incastrà inte la realtà, qualunque cosa sta frase la voja dir opur la dise so malgrado. La realtà la xe un canton bufo, anca parché no la ga un paesajo ben definìo. De fato, i elementi pì semoventi del paesajo i palesa na grotesca atitùdine a pasar queła parte del paesajo che lori i ama etichetar co'l vocàbolo "tenpo" a litigar su'l aspeto del paesajo steso. Tropo crìptico? Ogni tanto el paesajo el xe inconprensìbile, lo so, e el xe ben che lo savì anca voaltri, opur no.
Inte la realtà el paesajo el xe tuto. Almanco da'l punto de vista de queła parte del paesajo che la ga oci par vardar, ovaro par esenpio noaltri. Gavì notà come se fa pì concreto el discorso quando se tira in bało queła senò trascuràbile entità che ne piaze ciamar "noaltri"? No lo gavì notà. Ma gnanca mi, lo confeso. Fasevo soło finta. Sto fasendo finta in tuti i sensi. E serto fao anca senso fasendo finta cussì.
Qualunque discorso se fasa, a la fine se finise senpre a parlar de la realtà. Mai protagonista la xe stà pì desconosùa de la nostra diva de sta létera e de sta vita.
E se no la esistese? El saria un bon colpo de scena. Tuti i pì pensierosi pensatori a pensar invan par vite intiere a qualcosa che no la ghe xe. No'l xe gnanca cussì siòco pensar che in realtà la realtà no la ghe sia par gnente. Se la ghe fuse, qualcun el la gavaria trovà, da qualche parte, e el la gavaria mostrà atorno, ai altri, e lori (i altri), i gavaria istantaneamente capìo che se tratava proprio de la realtà. La realtà vera no la pol lassar dubi, no la pol venir interpretà. La realtà vera la pol soltanto èser una, inconfondìbile, evidente. Queli che i pretende de contarne che i ga trovà qualcosa che secondo lori la saria la realtà, ma che a noaltri la par na stronsada o pezo (o mejo... tanto no canbia gnente), evidentemente i ga ciapà un abàjo, senò i ne gavaria istantaneamente convinti tuti.
La realtà cussì la xe na ipòtesi maligna, parché a sercarla la intasa le za poco durévoli nostre vite, distogliendo la nostra atension da queło che pì el conta. No so de cosa se trata (queło che pì el conta), parché evidentemente anca mi son incastrà inte sta storia de la realtà, come fra parèntesi anca tuti voaltri (e par "voaltri" intendo chiunque in sta eticheta el ama reconóserse, par esenpio chi lese, ma soło par esenpio).
Semo circondà da la realtà, no in senso real (gavemo stabilìo che no la esiste), ma in senso metafòrico. Ovaro, la realtà la ne ga ingagià inte la trapoła costituìa da la so inesistensa.
Dovunque vardemo, amemo o odiemo crédar (ma senpre credemo) de véder la realtà. Ma anca dovunque scoltemo, tochemo, odoremo, asazemo. Se conpiasemo o se dolemo de persepir realtà dovunque. Epuro gavaresimo da gaver sospeti. Quante volte vedemo un bìpede a forma de fémena umana o de màscolo uman e esclamemo pensàndolo: "Che bela figa (o figo)" e qualcun a'l nostro fianco el obieta che figa o figo eła o lu par gnente no'l xe. El xe za in ste picole cose che la realtà la se sputana, tradendo la so evidente inesistensa. Figurémose le cose pì grose, come quando la realtà che no la ghe xe la se traveste (o cussì ne par) da Ben e da Mal, causando disidie anca pì grose de quełe inerenti a le preferense sesuali.
La realtà la ne perseguita, perfeta inte la ostinà, indiferente e asoluta so inesistensa.
Podaresimo anca finir de parlarne, almanco noaltri che se stemo incorzendo che no la ghe xe. Se ne ocupa za in tropi, che i pretende a ogni ocasion de spiegarne cosa che la realtà la sia, e a tal fine i ne angùstia sensa tregua né inposìbile pietà. De fato, no'l xe forse che pretendendo de spiegar con tanta presision queło che la realtà non la sia, noaltri se cometa in ùltima anàlisi el steso gesto che'l conpie chi el tenta de spiegar queło che eła la sia? No'l xe l'eror insìo proprio inte la domanda in sé?
Piantémola co le domande sterili.
La inesistensa de la realtà la diventa evidente quando le alusinasion le ne còje. Le metàfore intrapsìchiche le colasa e le se confonde, tradendo la so natura, apunto, de sénplise metàfore, e no de fedel specio de la realtà. La mente umana o queło che noaltri ciamemo cussì, la xe de fato un mero costruto de metàfore organizà. Tìpico de na metàfora la xe la funsion de rapresentar qualcosa come l'ànalogo de qualche cos'altro. Nissuna metàfora la xe cussì la realtà. Parché qualunque cosa, a cui noaltri se pensa, a ben pensarghe, la xe esclusivamente la metàfora de qualche cos'altro, cosa ne consegue?
Ma no volevimo finirla co le domande sterili?
El saria pì gradévole ocupar el nostro tenpo a asaporar la descrision de un bon pranzeto culinàrio o anca sesual, opur godérse diretamente el pranzo o el seso o tut'e do insenbre o qualche cos'altro che no me vien in mente parché dopotuto go anca mi le mie manie e penso che no me biasimarì tropo se ste manie le coinvolze la mastegasion de magnar e la degustasion de sesi, garantendo comunque, a chiunque tra ste righe el vaga asorbéndone el vago senso, che sti magnar e sti sesi go senpre cura de selesionar con gran gusto parché el xe proprio in funsion del gusto che sto gusto el me induse che me li gusto de gusto.
Me par che questo el posa par ancuo bastar, e anca savendo che questo el xe ilusòrio opur no la pianto qua e cussì sia almanco par un poco.

Roberto Quaglia