mi son queło che son. Ovaro, scusème se no so come spiegàrvelo, ma mi son queło che te scrive tute ste létere intelisenti, anca se par fortuna poso ben vantarme de no èser lu. Mi so che lo son parché l'anàgrafe me lo garantise. Ma so anca che la penso in modo diverso da come el dise de pensarla lu, epuro quando me vardo a'l specio el corpo e anca la facia i xe proprio i stesi. La facia de fato la canbia un poco inte la espresion. Quando son el mi steso de deso go na facia pì normal e na espresion prinsipal soła, bela sénplise come se convien. Quando son el mi steso intelisente go serte espresion, anca su la facia, che no capiso e el xe mejo cussì. Cosa me interesa, de fato? Mi so che ghe sto parché cogito ergo sum (sarò sénplise ma no son miga cretin). E so anca che ghe xe lu, parché tuto somà semo inte'l steso corpo, anca se a turno. Son sicuro che anca lu el sa che ghe sto mi insenbre a lu inte'l steso corpo a turno, parché dopotuto l'inteligenton el xe lu. Ma credo anca che'l se vergogna de mi e alora no lo ametarà mai. Gavì da ciaparlo su'l fato quando el so corpo el xe doparà da mi, filmarlo e po farghe notar che'l xe lu, ovaro che cussì no'l xe miga po senpre cussì intelisente come ghe piaze invese far véder de èser. E se el ve dise che queło inte'l film no'l xe lu ma el so fradeło zémeło handicapà no ghe credì! El xe proprio lu, soło che in quei momenti sto controlando mi el nostro corpo. Ghe la fao véder chi de noaltri do el xe pì se steso de l'altro!
Comunque voleva dir de no darghe reta a le cavolade che'l ve ga contà inte la so ùltima létera. Sta storia de la mente che la ga do càmere la xe na cavolada. Intanto el xe asurdo el fato che la mente la sia un biłocal. E po, secondo lu Dio el sta in una de ste do càmere e ogni tanto el sitofona inte l'altra par dirghe cosa far. Ma come fa Dio a star sarà in na càmera (che po tra l'altro gavì da spiegarme indove che sta càmera la se nasconde inte'l sarvèło pien de matèria grisa) se come tuti sa Lu el xe ùbico?
Da'l so discorso el ne trata come se noaltri semo serte spece de animal che semo diventando umani ma che ghe vol ancora un saco de tenpo. Ebe, animal el sarà lu, mi me sento umanìsimo quasi tuti i giorni. Quando rècito le mie poesie che scrivo quando me vien la tristesa me sento asè poètico e soratuto asè asè uman. E quando digo tute le mie preghiere a Dio me sento davero bon, e po un animal el se sente bon? No, digo mi, se me sento bon vol dir che son uman e che son anca bon, senò me sentaria cativo. De fato, quando par sbaljo son cativo (no son perfeto), me sento anca cativo, e dopo go da confesarme e el xe giusto che'l xe cussì. Dopo che me confeso me sento bon de novo, e cussì se po me ricapita de novo par sbaljo de èser cativo, la cativeria no la se acumula, e in generale mi resto bon. Le persone cative come Hitler le sente de èser cative ma no le se confesa, cussì la cativeria la se acumula e a la fine i xe costreti a coparse, o comunque a finir a l'inferno, come el xe giusto, par fortuna, ghe mancaria altro che po se li retrovemo in paradiso a tradimento!
E po cosa xe sta storia che la television la ne mandaria in "trance"? Mi sto "trance" no so miga indove el sta e no ghe son mai stà. Me lo ricordaria, senò! Mi vardo asè asè la television, parché la xe el mio hobby, e parché sento che la me fa ben. E no go mai visto el "trance". Vardo anca i film picanti, el xe vero, queli che afito le videocasete parché là ne fa de tuti i colori, ma un poareto Cristo come mi che tute le fémene me dà i tagli cosa go da far, eh? El xe asè mejo che me sodisfo da soło con na bela videocaseta picante che invese ndarme atorno a violentar le siorine par ben, come i dise a la television. Ogni tanto, a sentir in television che ghe xe cussì tanta gente che stupra me vien la tentasion de farlo anca mi, ma go paura che no ghe rieso a stuprar ben, che su'l pì beło po vien fora queł intelisente che ghe sta drento de mi che po el me dise: "Ou! Cosa fastu?! Che finimo tut'e do in preson!"
No go asè amighi, anzi, mi no ghe ne go proprio. Tuti i amighi che gavaria invese de gaverli queł altro là che'l xe intelisente drento de mi ma che deso el se sta sito. Eco i vantaji de la inteligensa. I te fa portar via i amighi a'l te steso pì sénplise che ti ga da drento (anca se deso mi sto da fora e da drento ghe sta lu). Mi no gavarò amighi, ma co la television el xe come se invese ghe ne son pien, de amighi. Li conoso tuti, da'l vecio Pippo Baudo a la bela e sinpàtica Ambra, e me par de conósarli cussì ben che se li incontro par strada son quasi convinto che i me conose anca lori. A serti ghe spuaria, come a queł Sgarbi che ghe spuaria tuti queli che la pensa come mi. L'altro mi steso el xe invese de queli che i se fa fregar da la so parlantina e i lo sta ancora a sentir. Fantozzi po el xe come un barba par mi. Mi lo go incontrà na volta, che par ciaparlo in giro i lo ciamava tuti sior Villaggio e lu el se conportava come se anca lu come mi el ga da drento de sé uno pì intelisente che ogni tanto ghe ciapa la man e anca el corpo. Mi alora a Fantozzi ghe go strento la man, e dopo un poco lu el me ga dito "ciao roberto". Visto che alora no son soło mi a conóser quełe persone famose, che me par come amighi mii, ma anca lori i conose mi? Na volta che la Television la gera rota son stà mal anca mi. Par asè giorni go rinunsià a la mia quota de corpo e go lassà el comando a queł altro intelisente che go drento. A lu ghe piaze quando no ghe xe la television. Gavì capìo che rasa de persona el xe? No'l se vergogna gnanca? Secondo mi la gente la varda tropo poco la television. El xe dimostrà che chi la varda de pì el vive mejo parché el ga manco preocupasion. Mi te suzeriso, caro Maurizio Costanzo Show, che ti verzi na canpagna par rénder obligatoria la television inte le scole. Se le creature le podese vardar la television anca inte le scole, e mi son sicuro che in futuro i lo farà parché la siviltà par fortuna la avansa, i cresaria asè mejo, diventando da grandi proprio tuti come mi ma sensa la sfortuna de queł intelisente drento che'l te ronpe le scàtole, che sensa de lu drento che'l te scòcia senpre se podaria èser cussì contenti...

Roberto Quaglia