io songo chillo ca songo. Ovèro, scusate si nun saccio comme ve 'o spiegà, ma io songo chillo ca te scrive tutte ste llettere 'ntelligente, pure si pe furtuna pòzzo ben me vantà 'e nun essere isso. Io saccio ca 'o songo pecché ll'anagrafe me 'o garantisce. Ma saccio pure ca 'a penzo 'n muodo diverso 'a comme dice 'e 'a penzà isso, eppure quanno me guardo ô specchio 'o cuorpo e pure 'a faccia sò proprio 'e stesse. 'A faccia defatte cagna 'nu poco dint'â espressione. Quanno songo 'o me stesso 'e mò tengo 'na faccia cchiù normale e 'na espressione principale sola, bella semplice comme se cunvène. Quanno songo 'o me stesso 'ntelligente tengo certe espressione, pure ncopp'â faccia, ca nun capisco e è meglio accussì. Che me 'nteressano, defatte? Io saccio ca ce stongo pecché cogito ergo sum (sarraggio semplice ma nun songo mica cretino). E saccio pure ca ce sta isso, pecché tutto summato simmo dint'ô stesso cuorpo, pure si a turno. Songo sicuro ca pure isso sape ca ce stongo io 'nzieme a isso dint'ô stesso cuorpo a turno, pecché doppotutto ll'intelligentone è isso. Ma credo pure ca se vrigogna 'e me e allora nun 'o ammettarrà maje. Avite 'a 'o còglie ncopp'ô fatto quanno 'o cuorpo suo è aduperato 'a me, 'o filmà e po' lle fa notà ca è isso, ovèro ca accussì nun è mica po' sempe accussì 'ntelligente comme lle piace 'mméce fa vedé 'e essere. E si ve dice ca chillo dint'ô film nun è isso ma 'o frate gemello handicappato suo nun lle credite! È proprio isso, sulo ca 'n chille mumente sto controllanno io 'o cuorpo nuosto. Ce 'a faccio vedé chi 'e nuje duje è cchiù sé stesso 'e ll'ato!
Comunque vuleva dìcere 'e nun dà retta a 'e cavolate ca v'ha cuntato dint'â ùrtema lettera soja. Sta storia d''a mente ca ce tène 'e doje càmmere è 'na cavolata. Intanto è assurdo 'o fatto ca 'a mente è 'nu bilocale. E po', secondo isso Dio sta 'n una 'e ste doje càmmere e ogne tanto citofona dint'a ll'ata pe lle dìcere che fa. Ma comme fa Dio a stà 'nchiuso 'n 'na càmmera (ca po' tra ll'ato me avite 'a spiegà addó è ca sta càmmera se annasconne dint'ô cerviello chino 'e materia grigia) si comme tutte sanno Isso è ùbbico?
D''o discurzo suo ce tratta comme si nuje simmo certe specie 'e animale ca stammo addiventanno umane ma ca ce vo' ancora 'nu sacco 'e tiempo. Embè, animale sarrà isso, io me sento umanìssemo quase tutte 'e juorne. Quanno recito 'e poesie mije ca scrivo quanno me vène 'a tristezza me sento assaje poètico e suprattutto assaje assaje umano. E quanno dico tutte 'e preghiere mije a Dio me sento overamente bbuono, e po' 'n animale se sentì bbuono? No, dico io, si me sento bbuono vo' dìcere ca songo umano e ca songo pure bbuono, si no me sentarrìa cattivo. Defatte, quanno pe sbaglio songo cattivo (nun songo perfetto), me sento pure cattivo, e doppo aggio 'a me confessà e è giusto ca è accussì. Doppo ca me confesso me sento bbuono 'e novo, e accussì si po' me ricapita 'e novo pe sbaglio 'e essere cattivo, 'a cattivèria nun se accumula, e 'n generale io rummango bbuono. 'E perzone cattive comme Hitler sèntono 'e essere cattive ma nun se confèssano, accussì 'a cattivèria se accumula e â fine sò custrette a s'accìdere, o comunque a fernì a ll'inferno, comme è giusto, pe furtuna, ce mancarrìa ato ca po' ce 'e retruvammo 'n paradiso a tradimento!
E po' che è sta storia ca 'a televisione ce mannarrìa 'n "trance"? Io stu "trance" nun saccio mica addó sta e nun ce songo maje stato. Me 'o ricurdarrìa, si no! Io guardo assaje assaje 'a televisione, pecché è ll'hobby mio, e pecché sento ca me fa bene. E nun aggio maje visto 'o "trance". Guardo pure 'e film piccante, è overo, chille ca affitto 'e videocassette pecché llà ne fanno 'e tutte 'e culure, ma 'nu povero Cristo comme a me ca tutte 'e femmene me danno 'e taglie che add'à fa, eh? È assaje meglio ca me suddisfo d'a sulo cu 'na bella videocassetta piccante ca 'mméce me ne vaco attuorno a violentà 'e signurine pe bene, comme dìcono â televisione. Ogne tanto, a sentì 'n televisione ca ce sta accussì tanta gente ca stupra me vène 'a tentazione 'e 'o fa pure io, ma tengo paura ca nun ce riesco a stuprà bene, ca ncopp'ô cchiù bello po' vène fora chillo 'ntelligente ca ce sta dint'a me ca po' me dice: "Ou! Che faje?! Ca fernimmo tutt'e dduje 'n galera!"
Nun tengo assaje amice, anze, io nun ne tengo proprio. Tutte 'e amice ca tenarrìa 'mméce 'e tène chillu ato llà ca è 'ntelligente dint'a me ma ca mò se ne sta zitto. Ecco 'e vantagge d''a intelligenza. Te fanno purtà via 'e amice ô te stesso cchiù semplice ca tiene 'a dinto (pure si mò io stongo 'a fora e 'a dinto ce sta isso). Io nun tenarraggio amice, ma cu 'a televisione è comme si 'mméce ne songo chino, 'e amice. 'E canosco tutte, d''o viecchio Pippo Baudo â bella e simpàteca Ambra, e me pare 'e 'e canóscere accussì bene ca si 'e 'ncontro pe via songo quase cunvinto ca me canóscono pure lloro. A certune lle sputarrìa, comme a chillu Sgarbi ca lle sputarrìano tutte chille ca 'a pènzano comme a me. ll'ato me stesso è 'mméce 'e chille ca se fanno fregà dâ parlantina soja e 'o stanno ancora a sentì. Fantozzi po' è comme 'nu zio pe me. Io ll'aggio 'ncontrato 'na vota, ca pe 'o piglià 'n giro 'o chiammàvano tutte signor Villaggio e isso se cumpurtava comme si pure isso comme a me ce tène dint'a sé uno cchiù 'ntelligente ca ogne tanto lle piglia 'a mano e pure 'o cuorpo. Io allora a Fantozzi ll'aggio strignuto 'a mano, e doppo 'nu poco isso m'ha ditto "ciao roberto". Visto ca allora nun songo sulo io a 'e canóscere chelle perzone famuse, ca me pàreno comme amice mije, ma pure lloro canóscono a me? 'Na vota ca 'a Televisione era rotta songo stato male pure io. Pe assaje juorne aggio rinunciato â quota 'e cuorpo mia e aggio lassato 'o comando a chillu ato 'ntelligente ca tengo dinto. A isso lle piace quanno nun ce sta 'a televisione. Avite capito che razza 'e perzona è? Nun se vrigogna manco? Secondo me 'a gente guarda troppo poco 'a televisione. È dimostrato ca chi 'a guarda 'e cchiù vive meglio pecché tène meno preoccupazione. Io te suggerisco, caro Maurizio Costanzo Show, ca tu arape 'na campagna pe rénnere obbligatoria 'a televisione dint'a 'e scole. Si 'e criature putèssero guardà 'a televisione pure dint'a 'e scole, e io songo sicuro ca 'n futuro 'o farranno pecché 'a civiltà pe furtuna avanza, crescarrìano assaje meglio, addiventanno 'a gruosse proprio tutte comme a me ma senza 'a sfurtuna 'e chillo 'ntelligente dinto ca te rompe 'e scàtole, ca senza 'e isso dinto ca te scoccia sempe se putarrìa essere accussì cuntiente...

Roberto Quaglia