mì sont quell che sont. Ovèro, scüsee se soo minga come spiegàvvel, ma mì sont quell che te scriv tütt sti letter inteligent, anca se per fortüna poeudi ben vantàm de vess minga lü. Mì soo che el sont perché l'anàgraf el me 'l garantiss. Ma soo anca che la pensi in mœud divers de come el dis de pensàla lü, epür quand me vardi al specc el corp e anca la facia hinn propri i stess. La facia defatt la cambia on poo in la espression. Quand sont el mì istess de adess gh'hoo ona facia pussee normala e ona espression principal sola, bela sempia come se convegn. Quand sont el mì istess inteligent gh'hoo certi espression, anca sü la facia, che capissi minga e l'è mej inscì. Cossa me interèssen, defatt? Mì soo che ghe sont perché cogito ergo sum (saroo sempi ma sont miga cretin). E soo anca che ghe n'è lü, perché tütt somaa semm in del stess corp, anca se a turno. Sont sicür che anca lü el sa che ghe sont mì insema a lü in del stess corp a turno, perché dopotütt l'inteligenton l'è lü. Ma credi anca che el se vergogna de mì e alora el l'ammettarà mai. Gh'avii de còglil sü el fatt quand el sò corp l'è doperaa de mì, filmàll e poeu fàgh notà che l'è lü, ovèro che inscì l'è miga poeu semper inscì inteligent come ghe pias inveci fà vedè de vess. E se el ve dis che quell in del film l'è miga lü ma el sò fradell gemell handicapaa credìghel minga! L'è propri lü, domà che in quii moment sont adree a controllà mì el nòster corp. Ghe la foo vedè chi de nün düü l'è pussee sè istess de l'alter!
Comunque voeva dì de dà minga a trà ai cavolad che el v'ha contaa in la soa ültima lettera. Sta storia de la ment che la gh'ha i düü càmer l'è ona cavolada. Intant l'è assürd el fatt che la ment l'è on bilocal. E poeu, second lü Dio el sta in vüna de sti düü càmer e ogni tant el citofona in l'altra per dìgh cossa fà. Ma come el fa Dio a stà saraa in ona càmera (che poeu tra l'alter me gh'avii de spiegà indove l'è che sta càmera la se scond in del cervell pien de materia grisa) se come tücc sann Lü l'è übich?
Del sò discors ne tratta come se nün semm certi speci de animai che semm adree a diventà üman ma che ghe voeur ancamò on sacch de temp. Ebén, animal el sarà lü, mì me senti ümanìssim quasi tütt i dì. Quand recliti i mè poesie che scrivi quand me vegn la tristezza me senti assee poètich e soratütt assee assee üman. E quand disi tütt i mè preghier a Dio me senti denver bon, e poeu on animal el se sent bon? No, disi mì, se me senti bon el voeur dì che sont üman e che sont anca bon, se de no me sentaría cativ. Defatt, quand per sbali sont cativ (sont minga perfett), me senti anca cativ, e dopo gh'hoo de confessàm e l'è giüst che l'è inscì. Dopo che me confessi me senti bon de noeuv, e inscì se poeu me ricapita de noeuv per sbali de vess cativ, la cativeria la se acümüla minga, e in general mì resti bon. I persònn cativ come Hitler senten de vess cativ ma se confèssen minga, inscì la cativeria la se acümüla e a la fin hinn costrett a masàss, o comunque a finì a l'inferno, come l'è giüst, per fortüna, ghe mancaría alter che poeu se i retrovom in paradis a tradiment!
E poeu cossa l'è sta storia che la television la ne mandaría in "trance"? Mì sto "trance" soo miga indove el sta e ghe sont mai staa. Me 'l regordaría, se de no! Mì vardi assee assee la television, perché l'è el mè hobby, e perché senti che la me fa ben. E hoo mai vist el "trance". Vardi anca i film picant, l'è ver, quii che afitti i videocassett perché là ne fann de tütt i color, ma on pover Crist come mì che tütt i fèmen me dann i tài cossa el gh'ha de fà, eh? L'è assee mej che me sodisfi de sol con ona bela videocassetta picanta che inveci andà intorna a violentà i signorinn per ben, come disen a la television. Ogni tant, a sentì in television che ghe n'è inscì tanta gent che stüpra me vegn la tentazion de fàll anca mì, ma gh'hoo paüra che ghe riessi minga a stüprà ben, che sü el pussee bell poeu el vegn foeura quel inteligent che ghe n'è dedent de mì che poeu el me dis: "Ou! Cossa te feet?! Che finissom tütt e düü in galera!"
Gh'hoo miga assee amis, anzi, mì ghe n'hoo minga propri. Tütt i amis che gh'avaría inveci de avègh quel alter là che l'è inteligent dedent de mì ma che adess el se ne sta cìtto. Ecco i vantagg de la inteligenza. Te fann portà via i amis al te istess pussee sempi che te gh'heet de dedent (anca se adess mì sont de foeura e de dedent ghe n'è lü). Mì gh'avaroo miga amis, ma con la television l'è come se inveci ne sont pien, de amis. I conossi tücc, del vegg Pippo Baudo a la bela e simpàtica Ambra, e me par de conòssei inscì ben che se i incontri per strada sont quasi convint che me conòssen anca lor. A certün ghe spütaría, come a quel Sgarbi che ghe spütaríen tütt quii che la pènsen come mì. L'alter mì istess l'è inveci de quii che se fann fregà de la soa parlantina e el stann ancamò a sentì. Fantozzi poeu l'è come on zio per mì. Mì l'hoo incontraa ona voeulta, che per ciapàll in gir el ciamaven tücc signor Villaggio e lü el se comportava come se anca lü come mì el gh'ha dedent de sè vün pussee inteligent che ogni tant ghe ciapa la man e anca el corp. Mì alora a Fantozzi gh'hoo strengiüü la man, e dopo on poo lü el m'ha ditt "ciao roberto". Vist che alora sont miga domà mì a conòss quii persònn famos, che me paren come mè amis, ma anca lor conòssen mì? Ona voeulta che la Television l'era rotta sont staa mal anca mì. Per assee dì hoo rinunciaa a la mia quota de corp e hoo lassaa el comand a quel alter inteligent che gh'hoo dedent. A lü ghe pias quand ghe n'è minga la television. Avii capii che razza de persòna l'è? El se vergogna nanca? Second mì la gent la varda tropp poch la television. L'è dimostraa che chi la varda de pü el viv mej perché el gh'ha men preocupazion. Mì te suggerissi, car Maurizio Costanzo Show, che tì te dervet ona campagna per rend obbligatoria la television in di scoeul. Se i creatür podessen vardà la television anca in di scoeul, e mì sont sicür che in fütür el faran perché la civiltà per fortüna la avanza, cressaríen assee mej, diventand de grand propri tütt come mì ma senza la sfortüna de quel inteligent dedent che el te romp i scàtol, che senza de lü dedent che el te scòccia semper se podaría vess inscì content...

Roberto Quaglia