in na mia létera che spero ti àbi risevù go esposto i trati fondamentali de la teoria de la mente bicameral (de Julian Jaynes). In altre létere go sviserà argomenti atorno a la evidente inportansa che la television la riveste inte la nostra società. Indicavo la television come el prinsipal totem contenporàneo nostro, come la religion no diciarà nostra, sostitutrise de la religion tradisional e contenitrise dei residui de la stesa. La television la esersita na moltitùdine de funsion, serte de le quali le saria quełe da senpre de conpetensa de la religion.
Deso provemo a véder cosa sucede miciando el tuto. Sparmio a chiunque el lese, queła aprofondìa anàlisi densa soratuto de premese e sitasion che la saria dover mio efetuar se mi fuse come no son un conclamà sosiòlogo, o psicòlogo, o filòsofo o comunque un conclamà qualcosa, qualchedun ovaro pagà par farlo. Sicome invese, inte'l momento in cui scrivo, meto del tuto gratuitamente a'l servisio de chi mai el gavese la ventura de lézerme i fruti de le mie riflesion, me concedo el vesio de saltar liberamente de palo in frasca quando me venise el ghiribiso de farlo, e comunque de venir sùbito a'l dunque, sensa anoiarme a scrìver queło che inte'l istante in cui scrivo no provo el gusto de scrìver.
Come se inserise la Television inte la teoria de la mente bicameral? Benìsimo, grasie. Secondo la teoria de la mente bicameral, inte la mente de noaltri tuti ghe xe un graziosìsimo vodo, che la Television mirabilmente la colma. El xe el vodo dei dèi. Ai tenpi dei Egìsi, dei Atzechi, e de tuti quei là pieni zepi de divinità, inte la mente umana, la cosiensa come noaltri la riscontremo in noaltri stesi no la esisteva. L'emisfero destro del sarvèło, ciapà na decision su cosa che'l gavese da venir fato, la comunicava a parołe, con un òrdine perentòrio, a'l emisfero sinistro, el quale leteralmente el gaveva la esperiensa de sentirla, e automàticamente e acrìticamente el obedeva, parché no'l gaveva el spasio mental de la cosiensa par operar na consapévole mediasion dialètica tra le posìbili selte. I òrdini sentìi i gera le vosi dei dèi, che ognun continuamente el sentiva, come testimonià da TUTA l'antica letaratura. El gera inte l'òrdine de le cose che l'emisfero sinistro senpre el obedese ai òrdini che'l riseveva da'l emisfero destro, parché lu el la saveva longa, tant'è vero che'l vegneva considerà un dio. Se obedeva cussì a le alusinasion uditive, ma anca a quełe visive, consuete anca lore e de la medèsima orìgine.
Po i dèi i ga tasù, sostituìi da la cosiensa, che pì eficientemente la integra le diferenti funsion dei do emisferi cerebrali nostri. Ma el vodo el xe restà, a tuti i livełi. A liveło orgànico, riscontremo na vasta area de sarvèło inutilizà inte'l emisfero destro. La gera la dimora dei dèi, l'ofisina de le vosi e de le alusinasion. Qualche volta eła ancora ancuo la se desta, spece inte i periodi de stress, dispensando sparute vision e pì frequenti vosi che generalmente no le dura. A liveło mental, el vodo el se traduse in un senso de nostalgia par la inosensa perdù, de la autorità benèvola che la ne guidava inte le nostre asion, e de rifiuto de la responsabilità acquisìa.
La Television mirabilmente la colma sto vodo durà mileni. Eła la xe prima de tuto na alusinasion visiva e auditiva. Queło che par tràmite so el aven inte i nostri sogiorni, sia questo na conversasion, un spojarelo, na partìa de balon o na esplosion nuclear, el xe evidentemente na ilusion, ovaro qualcosa che'l par vero a tuti i efeti (tant'è vero che ghe credemo), ma che evidentemente no'l xe, de fato no'l ne daneza o ne sodisfa pì de tanto né la esplosion nuclear né el spojarelo.
Una de le vestìgia de la mente bicameral la xe el stato de trance. El fenòmeno de la ipnosi el sesa de èser un mistero, considerà inte la ciave de sta teoria. Quando se xe in trance la cosiensa la se atenua fortemente, e la nostra disposision mental la diventa fortemente acrìtica. Inte la època bicameral, quando l'omo el viveva in trance, el gera inportante che acrìticamente senpre el obedese ai òrdini dei dèi del so emisfero destro.
La Television, el xe dimostrà, la induse in chi la varda un stato de tenporàneo trance. A chi de noaltri no ghe xe capità de inpisar un momento la television e po de restarghe incolà par ore a véder roba che no ne interesa, par po de boto incorzerse de èserse fati fregar n'altra volta? Diria che questo el xe queło che ne capita anca tuti i giorni, se no se stemo pì che atenti. La Television la ne catura par el so poder de mandarne in trance, e la detien sto poder proprio parché la colma el vodo lassà inte le nostre menti da le abituali alusinasion de la antichità.
Come le antiche alusinasion le ga gavù un poder de far, la Television la riversa inte i nostri sarvèli maree de inposision, de detami ètici, de modełi conportamentali, che noaltri asorbimo pì o manco acrìticamente, parché cussì semo stà abituà a far par mijara de ani, quando a generar le alusinasion gerimo noaltri stesi, o mejo na parte deso silente de noaltri stesi.
Tegno a sotolinear che'l motivo par el quale la Television la xe cussì eficiente a inculcarne modełi de conportamenti el xe che noaltri semo ancora predisposti a l'acetasion acrìtica de diretive da parte de le alusinasion che le ne còje in stato de trance. L'hardware del nostro sarvèło no'l se ga modificà granché, in poche mijara de ani. Esiste inte i nostri sarvèli le struture fìsiche preposte a farne obedir a chi el ga i requisiti de la divinità, e i requisiti de la divinità i xe prima de tuto: aparision màgica, anca visiva, anca a comando. Le ave nostre le domandava a Dio, o a Giove, o a Apoło, o a'l Dio Sole, e Dio, o i so alter ego, da'l profondo dei so sarvèli, senpre el rispondeva o el apareva davanti a lori. Ancuo, come alora, semo anca pì e pì volte a'l giorno costreti a scoltar cosa che la ga da dirne la divinità, e alora co'l telecomando màgicamente ripristinemo la fedel aparision de na familiar alusinasion davanti a noaltri, parchegemo la cosiensa, e asorbimo diretive. Quando a'l cussì dito teledipendente el televisor el se guasta, confusion e nevrosi i lo còje, sìmilmente a come sti sìntomi i ga colto le ave nostre de qualche migliaro de ani fa quando le vosi e le aparision dei so dèi le ga finìo de aparir regolarmente ogni volta che lori i le invocase. Come le antiche dei so dèi, gavemo anca noaltri giornalier bisogno de le diretive del nostro Dio Tivù.
Serti de noaltri, manco acrìtici de altri, i riese a scèjer le diretive da asorbir, ma senpre da'l medèsimo totem li ciapa, senpre da la Television.
Credemo inte la Television parché la xe na alusinasion condivisa da tuti, come i dèi i gera na alusinasion condivisa da tuti inte i mileni che i xe stà. Come in antichità no se parlava d'altro che de queło che diseva i dèi, ancuo no se parla d'altro che de queło che dise el Dio Tivù.
Sicome, come le antiche dei alora, la Television la xe ancuo la prinsipal fonte de diretive, eła inevitabilmente la causa queło che la mostra. Ancuo la Television la mostra quasi soltanto violensa, senpre de pì, senpre pì nìtida, senpre pì real, e cussì fasendo la la causa e la la acrese, in un inarestàbile sìrcoło visioso che se ciama reasion a cadena. Le reasion a cadena le tèrmina tute con na esplosion. Gavaremo anca noaltri la nostra esplosion.

Roberto Quaglia