ju sugnu chiddu ca sugnu. Cioè, scusati si nun sacciu comu vi lu spiegari, ma ju sugnu chiddu ca ti scrivi tutti sti lettiri ’ntilligenti, puru si pi furtuna pozzu ben mi vantari di nun essiri iddu. Ju sacciu ca lu sugnu pirchì l’anàgrafi mi lu garantisci. Ma sacciu puru ca la pensu ’n modu diversu di comu dici di la pinsari iddu, eppuru quannu mi taliu â specchia lu corpu e puru la facci su’ propriu li stissi. La facci defatti cancia nu pocu ntâ sprissioni. Quannu sugnu lu me stissu di ora aju ’na facci cchiù nurmali e ’na sprissioni principali sula, bedda sèmplici comu si cunveni. Quannu sugnu lu me stissu ’ntilligenti aju certi sprissioni, puru supra la facci, ca nun capisciu e è megghiu accussì. Chi mi interessanu, defatti? Ju sacciu ca ci sugnu pirchì cogito ergo sum (sarrò sèmplici ma nun sugnu mica cretinu). E sacciu puru ca c’è iddu, pirchì tuttu summatu semu ntô stissu corpu, puru si a turnu. Sugnu sicuru ca puru iddu sapi ca ci sugnu ju ’nsemi a iddu ntô stissu corpu a turnu, pirchì doppututtu l’intelligentuni è iddu. Ma cridu puru ca si vrigogna di mia e allura nun lu ammittirà mai. Avìti a lu cogghiri supra lu fattu quannu lu sò corpu è adupiratu di mia, lu filmari e po’ ci fari notari ca è iddu, cioè ca accussì nun è mica po’ sempri accussì ’ntilligenti comu ci piaci ’mmeci fari vidiri di essiri. E si vi dici ca chiddu ntô film nun è iddu ma lu sò frati gemellu handicappatu nun ci cridìti! È propriu iddu, sulu ca ’n ddi mumenti staju cuntrullannu ju lu nostru corpu. Ci la fazzu vidiri cu’ di nuiautri dui è cchiù sé stissu di l’àutru!
Comunqui vuliva diri di nun dari retta ê cavulati ca v’ha cuntatu ntâ sò última lettera. Sta storia dâ menti ca ci havi li dui càmmari è ’na cavulata. Intantu è assurdu lu fattu ca la menti è nu bilocali. E po’, secunnu iddu Diu sta ’n una di sti dui càmmari e ogni tantu citofona ntâ àutra pi ci diri chi fari. Ma comu fa Diu a stari ’nchiusu ’n ’na càmmara (ca po’ tra l’àutru m’avìti a spiegari unni è ca sta càmmara s’annascunni ntô ciriveddu chinu di materia grigia) si comu tutti sannu Iddu è ubìcuu?
Dû sò discursu ni tratta comu si nuiautri semu certi speci di animali ca stamu addivintannu umani ma ca ci voli ancora nu saccu di tempu. Embe’, animali sarà iddu, ju mi sentu umanissimu quasi tutti li jorna. Quannu recitu li mei puisìi ca scrivu quannu mi veni la tristizza mi sentu assai puèticu e suprattuttu assai assai umanu. E quannu dicu tutti li mei prighieri a Diu mi sentu daveru bonu, e po’ n’animali si sentiri bonu? No, dicu ju, si mi sentu bonu voli diri ca sugnu umanu e ca sugnu puru bonu, sinnò mi sintirìa cattivu. Defatti, quannu pi sbagghiu sugnu cattivu (nun sugnu perfettu), mi sentu puru cattivu, e doppu aju a mi cunfissari e è giustu ca è accussì. Doppu ca mi cunfessu mi sentu bonu di novu, e accussì si po’ mi ricapita di novu pi sbagghiu di essiri cattivu, la cattività nun s’accúmula, e ’n generali ju arrestu bonu. Li pirsuni cattivi comu Hitler sèntinu di essiri cattivi ma nun si cunfèssanu, accussì la cattività s’accúmula e â fini su’ custritti a s’accidiri, o comunqui a finiri a l’’nfernu, comu è giustu, pi furtuna, ci mancassi àutru ca po’ ci li ritruvamu ’n paradisu a tradimentu!
E po’ chi è sta storia ca la tilivisioni ni mannassi ’n "trance"? Ju stu "trance" nun sacciu mica unni sta e nun ci sugnu mai statu. Mi lu ricurdirìa, sinnò! Ju taliu assai assai la tilivisioni, pirchì è lu miu hobby, e pirchì sentu ca mi fa beni. E nun aju mai vistu lu "trance". Taliu puru li film piccanti, è veru, chiddi ca affittu li videocassetti pirchì ddà ni fànnu di tutti li culuri, ma nu pòviru Cristu comu a mia ca tutti li fimmini mi dànnu li tagghi chi havi a fari, eh? È assai megghiu ca mi suddisfu d’a sulu cu ’na bedda videocassetta piccanti ca ’mmeci mi ni vaju ’n giru a viulintari li signurini pi beni, comu dìcinu â tilivisioni. Ogni tantu, a sentiri ’n tilivisioni ca c’è accussì tanta genti ca stupra mi veni la tintazioni di lu fari puru ju, ma aju scantu ca nun ci arrivu a stuprari beni, ca supra lu cchiù beddu po’ veni fora chiddu ’ntilligenti ca c’è dintra di mia ca po’ mi dici: "Ou! Chi fai?! Ca finemu tutti e dui ’n galera!"
Nun aju assai amici, anzi, ju nun ni aju propriu. Tutti li amici ca avirìa ’mmeci ci l’havi chidd’àutru ddà ca è ’ntilligenti dintra di mia ma ca ora si ni sta zittu. Ecco li vantaggi dâ ’ntilligenza. Ti fànnu purtari via li amici ô te stissu cchiù sèmplici ca hai di dintra (puru si ora ju sugnu di fora e di dintra c’è iddu). Ju nun avirò amici, ma câ tilivisioni è comu si ’mmeci ni sugnu chinu, di amici. Li canusciu tutti, dû vecchiu Pippo Baudo â bedda e simpàtica Ambra, e mi pari di li canusciri accussì beni ca si li ’ncontru pâ strata sugnu quasi cunvintu ca mi canuscènu puru iddi. A certuni ci sputirìa, comu a ddu Sgarbi ca ci sputirìanu tutti chiddi ca la pènsanu comu a mia. L’àutru me stissu è ’mmeci di chiddi ca si fànnu frigari dâ sò parlantina e lu stannu ancora a sentiri. Fantozzi po’ è comu nu ziu pi mia. Ju l’aju ’ncuntratu ’na vota, ca pi lu pigghiari ’n giru lu chiamàvanu tutti signor Villaggio e iddu si cumpurtava comu si puru iddu comu a mia ci havi dintra di sé unu cchiù ’ntilligenti ca ogni tantu ci pigghia la manu e puru lu corpu. Ju allura a Fantozzi ci aju strittu la manu, e doppu nu pocu iddu m’ha dittu "ciao roberto". Vistu ca allura nun sugnu sulu ju a li canusciri chiddi pirsuni famusi, ca mi pàrinu comu mei amici, ma puru iddi canuscènu a mia? ’Na vota ca la Tilivisioni era rotta sugnu statu mali puru ju. Pi assai jorna aju rinunciatu â mia quota di corpu e aju lassatu lu cumannu a chidd’àutru ’ntilligenti ca aju dintra. A iddu ci piaci quannu nun c’è la tilivisioni. Avìti capitu chi razza di pirsuna è? Nun si vrigogna mancu? Secunnu mia la genti talia troppu pocu la tilivisioni. È mustratu ca cu’ la talia di cchiù vivi megghiu pirchì havi menu preoccupazioni. Ju ti suggerìsciu, caro Maurizio Costanzo Show, ca tu rapa ’na campagna pi rènniri obbligatoria la tilivisioni ntê scoli. Si li picciriddi putissiru taliari la tilivisioni puru ntê scoli, e ju sugnu sicuru ca ’n futuru lu farannu pirchì la civiltà pi furtuna avanza, criscirìanu assai megghiu, addivintannu di ranni propriu tutti comu a mia ma senza la sfurtuna di chiddu ’ntilligenti dintra ca ti rompi li scàtuli, ca senza di iddu dintra ca ti scoccia sempri si putissi essiri accussì cuntenti...

Roberto Quaglia