deo so cussu chi so. Est a nàrrere, iscusade si no isco comente bos lu ispiegare, ma deo so cussu chi ti iscriet totu custas lìteras intelligentes, fintzas si pro fortuna potzo bene mi bantare de no èssere issu. Deo isco chi lu so proite s'anàgrafe mi lu garantzat. Ma isco fintzas chi la penso in modu diversu de comente narat de la pensare issu, e tando cando mi abbàido a s'ispigru su corpus e fintzas sa cara sunt pròpiu sos matessi. Sa cara difatis càmbiat unu pagu in s'espressione. Cando so su me etotu de immoe tèngio una cara prus normale e una espressione printzipale sola, bella sìmplitze comente si cumbenit. Cando so su me etotu intelligente tèngio tzertas espressiones, fintzas in sa cara, chi no cumprendo e est mègius gasi. Ite mi interessant, difatis? Deo isco chi bi so proite cogito ergo sum (apo a èssere sìmplitze ma no so mica cretinu). E isco fintzas chi b'est issu, proite totu summadu semus in su matessi corpus, fintzas si a giru. So seguru chi fintzas issu ischit chi bi so deo paris a issu in su matessi corpus a giru, proite a pustis de totu s'intelligentone est issu. Ma creo fintzas chi si birgòngiat de mie e tando no lu at a ammìtere mai. L'ais de lu cogliere subra su fatu cando su corpus suo est impreadu dae mie, lu filmare e posca li fàghere notare chi est issu, est a nàrrere chi gasi no est mica poi semper gasi intelligente comente li praghet imbetzes fàghere bìdere de èssere. E si bos narat chi cussu in su film no est issu ma su frade gemellu handicappadu suo no li creedas! Est pròpiu issu, isceti chi in cussos momentos so controllende deo su corpus nostru. Bi la fatzo bìdere chie de nois duos est prus sese matessi de s'àteru!
Comunque cheria nàrrere de no dare contu a sas macchìghines chi bos at contadu in sa ùrtima lìtera sua. Custa istòria de sa mente chi tenet sas duas càmeras est una macchìghine. Intantu est assurdu su fatu chi sa mente est unu bilocale. E poi, segundu issu Deus istat in una de custas duas càmeras e onni tantu citofonat in s'àtera pro li nàrrere ite fàghere. Ma comente faghet Deus a istare inserradu in una càmera (chi poi tra s'àteru m'ais de ispiegare in ue est chi custa càmera si cuat in su cherbeddu prenu de matèria grisa) si comente totus ischint Issu est ubìcuu?
De su discursu suo nos tratat comente si nois semus tzerta ispètzie de animale chi semus diventende umanos ma chi bi cheret galu unu sacu de tempus. Ebbè, animale at a èssere issu, deo mi sento umanìssimu belle totu sas dies. Cando retzito sas poesias mias chi iscrio cando mi benit sa tristura mi sento meda poèticu e suba de totu meda meda umanu. E cando naro totu sas pregadorias mias a Deus mi sento a beru bonu, e poi un'animale si sentit bonu? Nono, naro deo, si mi sento bonu cheret nàrrere chi so umanu e chi so fintzas bonu, sinono mi diat sentire malu. Difatis, cando pro isbàgliu so malu (no so perfetu), mi sento fintzas malu, e a pustis apo de mi confessare e est giustu chi est gasi. A pustis chi mi confesso mi sento bonu de nou, e gasi si poi mi ricapitat de nou pro isbàgliu de èssere malu, sa malignidade no si acùmulat, e in generale deo abbarro bonu. Sas persones malas comente Hitler sentint de èssere malas ma no si confessant, gasi sa malignidade si acùmulat e a sa fine sunt custrintos a si bochire, o comunque a acabare a s'inferru, comente est giustu, pro fortuna, bi mancaret àteru chi poi nos los torramus a agatare in paradisu a traimentu!
E poi ite est custa istòria chi sa televisione nos mandaret in "trance"? Deo custu "trance" no isco mica in ue istat e no bi so mai istadu. Mi lu diat regordare, sinono! Deo abbàido meda meda sa televisione, proite est s'hobby meu, e proite sento chi mi faghet bene. E no apo mai bidu su "trance". Abbàido fintzas sos films piccantes, est beru, cussos chi afito sas videocassetas proite inie nde faghent de totu sos colores, ma unu poberu Cristu comente a mie chi totu sas fèminas mi dant sos taglios ite depet fàghere, eh? Est meda mègius chi mi satisfatzo dae sa sola cun una bella videocasseta piccante che imbetzes mi nde ando in giru a violentare sas signorinas pro bene, comente narant a sa televisione. Onni tantu, a intèndere in televisione chi b'at gasi tanta gente chi istruprat mi benit sa tentatzione de lu fàghere fintzas deo, ma tèngio timòria chi no bi resesso a istruprare bene, chi subra su prus bellu podet bènnere a foras cussu intelligente chi b'est in intro de mie chi poi mi narat: "Ou! Ite faghes?! Chi acabamus ambos duos in presone!"
No tèngio medas amigos, antzis, deo no nde tèngio pròpiu. Totu sos amigos chi diat tènnere imbetzes de tènnere cussu àteru inie chi est intelligente in intro de mie ma chi immoe si nde istat mudu. Eccu sos vantàgios de sa intelligèntzia. Ti faghent leare sos amigos a su te etotu prus sìmplitze chi tenes in intro (fintzas si immoe deo so a foras e in intro b'est issu). Deo no apo a tènnere amigos, ma cun sa televisione est comente si imbetzes nde so prenu, de amigos. Los connosco totus, dae su betzu Pippo Baudo a sa bella e simpàtica Ambra, e mi paret de los connòschere gasi bene chi si los atòbio pro carrela so belle cumbintu chi mi connoschent fintzas issos. A tzertunos lis dia ispudare, comente a cussu Sgarbi chi li diant ispudare totu cussos chi la pensant comente a mie. S'àteru me etotu est imbetzes de cussos chi si faghent fregare dae sa parlantina sua e lu istant galu a intèndere. Fantozzi poi est comente unu tziu pro mie. Deo l'apo atopadu una borta, chi pro lu leare in giru lu giamaiant totus signor Villaggio e issu si cumportaiat comente si fintzas issu comente a mie tenet in intro de sese unu prus intelligente chi onni tantu li pigat sa manu e fintzas su corpus. Deo tando a Fantozzi l'apo istrintu sa manu, e a pustis unu pagu issu m'at naradu "ciao roberto". Bidu chi tando no so isceti deo a connòschere cussas persones famadas, chi mi parent comente amigos mios, ma fintzas issos connoschent a mie? Una borta chi sa Televisione fiat rota so istadu male fintzas deo. Pro medas dies apo rinuntziadu a sa cuota de corpus mia e apo lassadu su cumandu a cussu àteru intelligente chi tèngio in intro. A issu li praghet cando no b'est sa televisione. Ais cumpresu ite ratza de persone est? No si birgòngiat mancu? Segundu me sa gente abbàidat tropu pagu sa televisione. Est dimustradu chi chie l'abbàidat de prus bivet mègius proite tenet prus pagu preocupatziones. Deo ti suggerzo, caro Maurizio Costanzo Show, chi tue abèrgias una campagna pro rèndere obligatòria sa televisione in sas iscolas. Si sas criaduras podèrent abbaidare sa televisione fintzas in sas iscolas, e deo so seguru chi in venidore lu ant a fàghere proite sa tzivilidade pro fortuna avàntzat, diant crèschere meda mègius, diventende dae mannos pròpiu totus comente a mie ma sena sa disditza de cussu intelligente in intro chi ti segat sas iscàtulas, chi sena de issu in intro chi ti secat semper si diat pòdere èssere gasi cuntentos...

Roberto Quaglia