in una lìtera mia chi ispero tue apas retzidu apo espostu sos tratos fundamentales de sa teoria de sa mente bicamerale (de Julian Jaynes). In àteras lìteras apo isvisceradu argumentos in giru a s'evidente importàntzia chi sa televisione revestit in sa sotziedade nostra. Indicaia sa televisione comente su printzipale totem cuntemporàneu nostru, comente sa religione no decrarada nostra, sostitutritze de sa religione traditzionale e cuntenidora de sos resìduos de sa matessi. Sa televisione esertzitat una multitùdine de funtziones, tzertas de sas cales diant èssere cussas dae semper de cumpetèntzia de sa religione.
Immoe proemus a bìdere ite sutzedit misturende su totu. Risparmio a chie si siat leget, cussa aprofundida anàlisi densa suba de totu de premissas e tzitatziones chi diat èssere dovere meu efetuare si deo fia comente no so unu conclamadu sotziòlogu, o psicòlogu, o filòsofu o comunque unu conclamadu carchi cosa, calicunu est a nàrrere pagadu pro lu fàghere. Proite imbetzes, in su momentu in cui iscrio, ponzo de su totu gratuitamente a su servìtziu de chie mai aeret sa ventura de mi lèghere sos frutos de sas riflessiones mias, mi concedo su vìtziu de sartare liberamente dae palu a fraschedda cando mi beneret su ghiribitzu de lu fàghere, e comunque de bènnere luego a su dunca, sena mi annoiare a iscrìere su chi in su istante in cui iscrio no proo su gustu de iscrìere.
Comente s'inserit sa Televisione in sa teoria de sa mente bicamerale? Beníssimu, gràtzias. Segundu sa teoria de sa mente bicamerale, in sa mente de nois totus b'at unu gratziosìssimu vàcuu, chi sa Televisione mirabilmente cólmat. Est su vàcuu de sos deos. A sos tempos de sos Egìtzios, de sos Atzecos, e de totu cussos inie prenos tzeppos de divinidades, in sa mente umana, sa cussèntzia comente nois la riscontramus in nois etotu no esistiat. S'emisfèriu destru de su cherbeddu, leada una detzisione subra ite aeret de bènnere fatu, la comunicaiat a paràulas, cun un'òrdine perentòriu, a s'emisfèriu sinistru, su cale literalmente teniat sa esperièntzia de la intèndere, e automàticamente e acriticamente obbediat, proite no teniat su ispàtziu mentale de sa cussèntzia pro operare una cussiente mediatzione dialètica tra sos possìbiles iseberos. Sos òrdines intesos fiant sas boghes de sos deos, chi ognunu continuamente intendiat, comente testimoniadu dae TOTA s'antiga literadura. Fiat in s'òrdine de sas cosas chi s'emisfèriu sinistru semper obbedesset a sos òrdines chi retziat dae s'emisfèriu destru, proite issu la ischiat longa, tant'est beru chi beniat cunsideradu unu deus. Si obbediat gasi a sas allutzinatziones auditivas, ma fintzas a cussas visivas, consuetas fintzas issas e de sa matessi orìgine.
Posca sos deos ammudeint, sostituidos dae sa cussèntzia, chi prus efitzientemente ìntegrat sas diferentes funtziones de sos duos emisfèrios tzerebrales nostros. Ma su vàcuu est abbarradu, a totu sos livellos. A livellu orgànicu, riscontramus una vasta àrea de cherbeddu inutilizada in s'emisfèriu destru. Fiat sa dimora de sos deos, s'oficina de sas boghes e de sas allutzinatziones. Carchi borta issa galu oe si dèsigat, spetzie in sos perìodos de stress, dispensende ispàrfidas visiones e prus frecuentes boghes chi generalmente no durant. A livellu mentale, su vàcuu si traduit in unu sensu de nostalgia pro sa innotzèntzia pèrdida, de sa autoridade benèvola chi nos guidaiat in sas atziones nostras, e de refudu de sa responsabilidade acuisida.
Sa Televisione mirabilmente cólmat custu vàcuu duradu millènnios. Issa est primu de totu una allutzinatzione visiva e auditiva. Su chi pro tràmite suo avvenit in sos salotos nostros, siat custu una cunversatzione, unu spogliarello, una partida de balla o una esplosione nucleare, est evidentemente una illusione, est a nàrrere carchi cosa chi paret beru a totu sos efetos (tant'est beru chi bi creimus), ma chi evidentemente no lu est, difatis no nos dannizat o nos satisfaghet prus de tantu ne sa esplosione nucleare ne su spogliarello.
Una de sos vestìgios de sa mente bicamerale est su istadu de trance. Su fenòmenu de s'ipnosi tzessat de èssere unu mistèriu, cunsideradu in sa crae de custa teoria. Cando si est in trance sa cussèntzia s'atenuat fortemente, e sa disposìtzione mentale nostra diventat fortemente acrìtica. In sa època bicamerale, cando s'òmine biviat in trance, fiat importante chi acriticamente semper obbedesset a sos òrdines de sos deos de s'emisfèriu destru suo.
Sa Televisione, est dimustradu, induit in chie l'abbàidat unu istadu de temporàneu trance. A chie de nois no est capitadu de allùghere unu momentu sa televisione e posca de bi abbarrare incolladu pro oras a bìdere roba chi no nos interessat, pro posca de botu s'acatare de si èssere fatos fregare un'àtera borta? Dia nàrrere chi custu est su chi nos capitat fintzas onni die, si no bi semus prus ca atentos. Sa Televisione nos capturat pro su podere suo de nos mandare in trance, e detenet custu podere pròpiu proite cólmat su vàcuu lassadu in sas mentes nostras dae sas abituales allutzinatziones de s'antighidade.
Comente sas antigas allutzinatziones tenteint unu podere de fàghere, sa Televisione riversat in sos cherbeddos nostros mareas de impositziones, de detàmenes èticos, de modellos cumportamentales, chi nois assorbimus prus o mancu acriticamente, proite gasi semus istados abituados a fàghere pro migiaras de annos, cando a generare sas allutzinatziones fìamus nois etotu, o mègius una parte immoe silente de nois etotu.
Tèngio a sottolineare chi su motivu pro su cale sa Televisione est gasi efitziente a nos inculcare modellos de cumportamentos est chi nois semus galu predispostos a s'atzetatzione acrìtica de diretivas dae parte de allutzinatziones chi nos còglient in istadu de trance. S'hardware de su cherbeddu nostru no si est modificadu granché, in pagas migiaras de annos. Esistint in sos cherbeddos nostros sas istruturas fìsicas prepostas a nos fàghere obbedire a chie tenet sos rechisitos de sa divinidade, e sos rechisitos de sa divinidade sunt primu de totu: aparitzione màgica, fintzas visiva, fintzas a cumandu. Sas giajas nostras pediant a Deus, o a Giove, o a Apollo, o a su Deus Sole, e Deus, o sos alter ego suos, dae su profundu de sos cherbeddos issoro, semper rispondiat o apariat cara a issos. Oe, comente tando, semus fintzas prus e prus bortas a sa die custrintos a ascurtare ite tenet de nos nàrrere sa divinidade, e tando cun su telecomandu màgicamente ripristinamus sa fidele aparitzione de una familiare allutzinatzione cara a nois, parchegiamus sa cussèntzia, e assorbimus diretivas. Cando a su gasi naradu teledipendente su televisore si guastat, cunfusione e nevrosi lu còglient, sìmilmente a comente custos sìntomos cogleint sas giajas nostras de carchi migiàiu de annos a como cando sas boghes e sas aparitziones de sos deos issoro acabbeint de aparire regularmente onni borta chi issos las invocarent. Comente sas antigas de sos deos issoro, tenimus fintzas nois giornalieru bisòngiu de sas diretivas de su Deus Tivù nostru.
Tzertunos de nois, prus pagu acrìticos de àteros, resessint a iseberare sas diretivas de assorbire, ma semper de su matessi totem las pigant, semper dae sa Televisione.
Creimus in sa Televisione proite est una allutzinatzione cumpartzida dae totus, comente sos deos fiant una allutzinatzione cumpartzida dae totus in sos millènnios chi fiant. Comente in antighidade no si faeddaiat de àteru che de su chi naraiant sos deos, oe no si faeddat de àteru che de su chi narat su Deus Tivù.
Proite, comente sas antigas deos tando, sa Televisione est oe sa printzipale fonte de diretivas, issa inevitabilmente càusat su chi mustrat. Oe sa Televisione mustrat belle isceti violèntzia, semper de prus, semper prus nìtida, semper prus reale, e gasi faghende la càusat e l'acrèschet, in unu inarrestàbile tzìrculu vitziosu chi si giamat reatzione a cadena. Sas reatziones a cadena acabant totus cun una esplosione. Amus a tènnere fintzas nois sa esplosione nostra.

Roberto Quaglia