’n ’na mia lettera ca speru tu àbbia ricivutu aju espostu li tratti fundamintali dâ teurìa dâ menti bicamerali (di Julian Jaynes). ’N àutri lettiri aju svisciratu argumenti attornu â evidenti impurtanza ca la tilivisioni rivesti ntâ nostra sociità. Indicava la tilivisioni comu lu nostru principali totem cuntimpuraneu, comu la nostra riligioni nun dichiarata, sostitutrici dâ riligioni tradiziunali e cuntinitrici dî residui dâ stissa. La tilivisioni esercita ’na multitúdini di funzioni, certi dî quali sarrìanu chiddi di sempri di cumpitenza dâ riligioni.
Ora pruvamu a vidiri chi succedi mmiscannu lu tuttu. Sparmiu a cu’ sia leggi, chidda approffunnuta anàlisi densa suprattuttu di premissi e citazioni ca sarrìa miu duviri effittuari si ju fussi comu nun sugnu nu cunclamatu sociòlogu, o psicòlogu, o filòsofu o comunqui nu cunclamatu quarchi cosa, quarchidunu cioè pagatu pi lu fari. Pirchì ’mmeci, ntô mumentu ’n cui scrivu, mettu dû tuttu gratuitamenti ô serviziu di cu’ mai avissi la ventura di mi lèggiri li frutti dî mei riflissioni, mi cuncedu lu vezzu di sautari libbiramenti di palu ’n frasca quannu mi vinissi lu ghiribbizzu di lu fari, e comunqui di vìniri sùbbitu ô dunqui, senza m’annuiari a scriviri chiddu ca ntô istanti ’n cui scrivu nun provu lu gustu di scriviri.
Comu s’inserìsci la Tilivisioni ntâ teurìa dâ menti bicamerali? Benissimu, grazii. Secunnu la teurìa dâ menti bicamerali, ntâ menti di nuiautri tutti c’è nu graziusissimu vàcuu, ca la Tilivisioni mirabbilmenti còrma. È lu vàcuu dî dei. Ô tempu dî Egizi, dî Atzechi, e di tutti chiddi ddà chini zeppi di divinità, ntâ menti umana, la cuscienza comu nuiautri la riscuntramu ’n nuiautri stissi nun esistia. L’emisferu destru dû ciriveddu, pigghiata ’na dicisioni supra chi avissi a vìniri fattu, la cumunicava a paroli, cu n’ordini perentoriu, ô emisferu manancinu, lu quali littiralmenti avia la espirienza di la sentiri, e automàticamenti e acrìticamenti obbidia, pirchì nun avia lu spaziu mintali dâ cuscienza pi operari ’na consapèvoli mediazioni dialèttica tra li possibbili scelti. Li òrdini sintuti èranu li vuci dî dei, ca ognunu cuntinuamenti sintia, comu testimuniatu di TUTTA l’antica littiratura. Era ntô ordini dî cosi ca l’emisferu manancinu sempri obbidissi ê òrdini ca ricivia dû emisferu destru, pirchì iddu la sapia longa, tant’è veru ca vinia cunsidiratu nu diu. Si obbidia accussì ê allucinazioni auditivi, ma puru a chiddi visivi, cunsueti puru chiddi e dâ midèsima origgini.
Po’ li dei taccìru, sostituiti dâ cuscienza, ca cchiù efficientimenti integra li diversi funzioni dî nostri dui emisferi cirebbrali. Ma lu vàcuu è ristatu, a tutti li livelli. A livellu orgànicu, riscuntramu ’na vasta area di ciriveddu inutilizzata ntô emisferu destru. Era la dimora dî dei, l’officína dî vuci e dî allucinazioni. Quarchi vota idda ancora oggi si desta, speci ntê periudi di stress, dispinsannu sparuti visioni e cchiù frequenti vuci ca giniralmenti nun dýranu. A livellu mintali, lu vàcuu si traduci ’n nu sensu di nustalgìa pâ innocenza persa, dâ autorità benèvula ca ni guidava ntê nostri azioni, e di rifiutu dâ rispunsabbilità acquisìuta.
La Tilivisioni mirabbilmenti còrma stu vàcuu duratu millenni. Idda è prima di tuttu ’na allucinazioni visiva e auditiva. Chiddu ca pi tràmiti sò avveni ntê nostri suggiorni, sia chistu ’na cunvirsazioni, nu spogliarello, ’na partita di palluni o ’na esplusioni nucleari, è evidentimenti ’na illusioni, cioè quarchi cosa ca pari veru a tutti li effetti (tant’è veru ca ci cridemu), ma ca evidentimenti nun lu è, defatti nun ni danneggia o ni suddisfa cchiù di tantu nè la esplusioni nucleari nè lu spogliarello.
Una dî vistìi dâ menti bicamerali è lu statu di trance. Lu fenòminu dâ ipnosi cessa di essiri nu misteru, cunsidiratu ntâ chiavi di sta teurìa. Quannu si è ’n trance la cuscienza s’attenua fortimenti, e la nostra dispusizioni mintali addiventa fortimenti acrìtica. Ntâ èpuca bicamerali, quannu l’omu viveva ’n trance, era impurtanti ca acrìticamenti sempri obbidissi ê òrdini dî dei dû sò emisferu destru.
La Tilivisioni, è mustratu, induci ’n cu’ la talia nu statu di timpuraneu trance. A cu’ di nuiautri nun è capitatu di addumari nu mumentu la tilivisioni e po’ di ci arristari ’ncuddatu pi uri a vidiri rrobba ca nun ni interessa, pi po’ di corpu s’addunari di si essiri fatti frigari n’àutra vota? Dicirìa ca chistu è chiddu ca ni capita puru tutti li jorna, si nun ci stamu cchiù ca attenti. La Tilivisioni ni cattura pû sò puteri di ni mannari ’n trance, e deteni stu puteri propriu pirchì còrma lu vàcuu lassatu ntê nostri menti dî abituali allucinazioni dâ antichità.
Comu li antichi allucinazioni èbbiru ’n puteri di fari, la Tilivisioni riversa ntê nostri ciriveddi mariÎ di impusizioni, di dettami ètici, di mudelli cumpurtamintali, ca nuiautri assurbemu cchiù o menu acrìticamenti, pirchì accussì semu stati abituati a fari pi migghiara di anni, quannu a ginirari li allucinazioni èramu nuiautri stissi, o megghiu ’na parti ora silenti di nuiautri stissi.
Tegnu a sottolineari ca lu mutivu pû quali la Tilivisioni è accussì efficienti a ni inculcari mudelli di cumpurtamenti è ca nuiautri semu ancora predispposti â accettazioni acrìtica di direttivi di parti di allucinazioni ca ni cogghianu ’n statu di trance. L’hardware dû nostru ciriveddu nun s’è mudificatu granchì, ’n pochi migghiara di anni. Esistinu ntê nostri ciriveddi li strutturi fìsichi prepposti a ni fari obbidiri a cu’ àbbia li requisiti dâ divinità, e li requisiti dâ divinità su’ prima di tuttu: apparizioni màgica, puru visiva, puru a cumannu. Li nostri avi chidìvanu a Diu, o a Giove, o a Apollo, o ô Diu Suli, e Diu, o li sò alter ego, dû prufunnu dî sò ciriveddi, sempri rispunnia o apparìa a iddi davanti. Oggi, comu allura, semu puru cchiù e cchiù voti ô jornu custritti a ascutari chi havi a ni diri la divinità, e allura cû telecomando màgicamenti ripristinamu la fidili apparizioni di ’na familiari allucinazioni davanti a nuiautri, parcheggiamu la cuscienza, e assurbemu direttivi. Quannu ô accussì dittu telidipindenti lu tilivisuri si guasta, cunfusioni e nevrosi lu cògghinu, simìlmenti a comu sti sìtumi còsciru li nostri avi di quarchi migghiaru di anni fa quannu li vuci e li apparizioni dî sò dei finìru di appariri rigularmenti ogni vota ca iddi li invocassiru. Comu li antichi dî sò dei, avemu puru nuiautri jurnalieru bisognu dî direttivi dû nostru Diu Tivù.
Certuni di nuiautri, menu acrìtici di àutri, rèscinu a scegghiri li direttivi di assurbiri, ma sempri dû midèsimu totem li pìgghianu, sempri dâ Tilivisioni.
Cridemu ntâ Tilivisioni pirchì è ’na allucinazioni cundivisa di tutti, comu li dei èranu ’na allucinazioni cundivisa di tutti ntê millenni ca fùru. Comu ’n antichità nun si parrava d’àutru ca di chiddu ca dicìvanu li dei, oggi nun si parra d’àutru ca di chiddu ca dici lu Diu Tivù.
Pirchì, comu li antichi dei allura, la Tilivisioni è oggi la principali fonti di direttivi, idda inevitabbilmenti causa chiddu ca mostra. Oggi la Tilivisioni mostra quasi sulamenti viulenza, sempri di cchiù, sempri cchiù nìtida, sempri cchiù reali, e accussì facennu la causa e la accrisci, ’n nu inarristabbili circulu viziusu ca si chiama reazioni a catena. Li reazioni a catena tèrminanu tutti cu ’na esplusioni. Aviràmu puru nuiautri la nostra esplusioni.

Roberto Quaglia