ancuo te conto na bela storieła, sénplise e ciara, su la orìgine de queła "cosa" che pì de ogn'altra la ne fa umani: La cosiensa.
Purtropo, domandando a mile persone de definir la parola cosiensa, otegnaremo mile risposte diverse, segno che regna un bon poco de confusion su questo. Questo el xe abastansa grave, dato che la cosiensa la xe probabilmente queło che de pì ne distingue dai altri animali. Diciaro cussì sùbito la definision de cosiensa adotà da mi atualmente (ciapà da un rasonamento de Julian Jaynes, ai pensieri de cui ancuo se inspira i mii) e che darò par scontà inte'l prosèguo de sto scrito:
La cosiensa la xe la creasion de un "spasio" mental drento de noaltri, un spasio imaginàrio inte'l quale noaltri ordinemo e localizemo i ricordi de eventi pasà e serchemo de figurarse eventi futuri. Par far questo gavemo da "capir" el tenpo, e lo fasemo spasializàndolo.
(Provè a pensar a come ve imaginè el scórer del tenpo. Come ve figurè na setimana? Come visualizè i ùltimi diese ani de vita vostri? Fèlo e descovrirì che voaltri "vedì" drento de voaltri qualunque arco de tenpo come se'l fuse un spasio, inte'l quale riméter i ricordi e i progeti.)
Le ore, i giorni, i ani e i sècoli i vien da noaltri imaginà come luoghi in un spasio ordinà inte'l quale sucede le cose. La cosiensa la xe un "ànalogo" de la realtà, a la stesa manera in cui na mapa geogràfica la xe un ànalogo de un teritòrio. Ogni cosa de cui semo cosienti la xe un "ànalogo" de qualcosa che la esiste in realtà. Gavemo drento de noaltri un ànalogo dei nostri familiari, dei nostri amighi, e anca de noaltri stesi. L'ànalogo de noaltri stesi el xe queło che ciamemo "io", e noaltri lo movemo inte la mapa de la realtà che gavemo costruìo inte'l nostro spasio mental, dando corpo ai nostri progeti e ale ai nostri sogni. In sta "mapa" de la realtà noaltri unimo tuti i eventi che ne sucede, che ne vien comunicà, o che ne imaginemo, in na storia, in na sorta de narasion interior, e questo el xe queło che ne permete de gaver ricordi cosienti o de far prevision a longo tèrmine. Riasumendo: Spasializasion del tenpo, narativizasion dei eventi, e l'ànalogo de noaltri stesi ("io") che'l se coloca in bona parte del "spasio" mental che ciamemo Tenpo, in un òrdine cronològico che ciamemo I Nostri Ricordi e I Nostri Progeti. Questa la xe la cosiensa.
Ebe, quando el xe nato sto grupo de facoltà che le xe la nostra "cosiensa"? Le xe senpre esistìe?
Ghe xe chi sostien che anca i animali i ga na spece de cosiensa, ma se par cosiensa noaltri intendemo queło che go apena sintetizà mi, ovaro la creasion de un "ànalogo" de la realtà inte la nostra mente mediante na spasializasion del tenpo, nonché la creasion de queł ànalogo de noaltri stesi che ciamemo "io", el diventa evidente che parlar de cosiensa par i animali la xe na ignorante siochesa.
(Adotando na definision de "cosiensa" diversa da queła che mi go doparà in sto scrito, tuto ovviamente el canbiaria. Ma sicome, inte'l mejo dei casi, el discorso el se faria asè pì conpleso, e inte i altri casi pì sbaglià, preferiso in sto contesto mantegnir de la "cosiensa" la definision che ghe go dà. L'inportante el xe acordarse - anca de volta in volta - su'l significato che se dà a le parołe che doparemo.)
Queło che in sto caso el aven la xe na asion tìpicamente umana, ovaro la proiesion de le nostre categorie de pensiero su queło che no semo noaltri. La xe un fenòmeno che par la pì parte de noaltri el aven continuamente e a tuti i livełi. Conseguensa e sìntomo de sto fenòmeno la xe "la mancà conprension". I màscoli umani i proieta le categorie de pensiero màscoli su'l conportamento de le fémene, e el risultà el xe che "no le capise". Stesa cosa la aven a l'inverso. Un catòlico el dopara le so categorie de pensiero par capir un musulman, sensa ovviamente riusirghe, e viseversa. La incapasità de prescìnder da le so categorie de pensiero la ostacoła, a vari livełi e a varie intensità, la recìproca conprension tra i èseri umani. Se sti colosali erori i vien fati tentando de trasir inte la mente de un altro èser uman, ovaro de un èser a noaltri piutosto sìmile, podemo rasonevolmente conclùder che proietar le nostre categorie de pensiero su i animali el produse erori anca pì grosi. Cussì el xe de fato. Tuti i "sentimenti" che ne piaze crédar che'l sta provando el nostro gato quando lo carecemo i xe esclusivamente queło che ne piaze crédar che'l sta provando. Gavemo na vision antroposèntrica de la natura e de la realtà, e in nome de eła cometemo sensa fermo i pì stòlidi erori de conprension.
Ma tornemo a la cosiensa. I animali no umani no i ghe l'ha. L'èser uman sì. L'omo el descende da altri animali. Quando el xe nato alora la cosiensa? Quando la xe stà creà inte la nostra mente queła spasializasion del tenpo che ne permete de far progeti? Quando el xe aparso in noaltri queł ànalogo de noaltri stesi che ciamemo "io", che ne permete de incorzerse dei nostri sentimenti, dei nostri problemi e del nostro destin?
Na modalità de indagar l'organizasion mental dei nostri antenati la ne xe data dai reperti archeològici, par esenpio la letaratura. Tra i pì antichi scriti rivà a noaltri ghe xe la Bìbia e l'Ilìade. Credo che nissun el vorà obietar su'l fato che le esperiense umane testimonià da ste do fonti le xe de un genere totalmente diverso da quełe che saria normal spetarse ancoi. Inte'l Antico Testamento tuti i personaji i diàloga sistematicamente con na vose che la ghe dise cosa i ga da far. I òrdini de sta vose i xe qualche volta pii, ma pì speso cruenti e sanguinari. La vose la òrdina sia decision saje che omisidi e masacri. Ànaloga cosa la aven inte l'Ilìade, e inte la pì parte dei scriti che ne riva da queła època. Inte l'Ilìade, ogni asion inportante la xe inescà da la vose o da la aparision de qualche Dio. Parché in tuta la letaratura antica sucedeva normalmente ste cose? Parché le ga finìo de suceder inte la letaratura che vien dopo? In pì, MAI ghe xe in quełe righe trasa de introspesion, ovaro de queła pràtica che noaltri savemo èser la esensa stesa de la cosiensa. Mai ghe xe in quełe righe trasa de silensiosi diàloghi interiori, e senpre ghe xe evidensa de cotidiani diàloghi con na vose ciamà Dio o Apoło o Chicchessia. Pararia che a queła època Dio (o i vari Dèi) i sostituise conpletamente la cosiensa.
Desmenteghémose par un àtimo tuto queło che i ne ga inparà su la interpretasion che gavemo da dar a sto genere de letaratura, in modo de no gaver opinion preconsete. Quala la xe la prima cosa che vien da pensar a na moderna persona sana, ciapando in considerasion el conportamento dei personaji de l'Ilìade o del Antico Testamento? O quełe storie le xe conpletamente inventà, opur a queł tenpo i gera tuti mati.
Tute le spiegasion che de quełe letaradure le vien atualmente dà le xe poco lògiche quando no adiritura asurde.
No'l ga senso pensar che quełe storie le fuse inventà. La storia la inpara che par l'èser uman el bisogno de documentar queło che'l xe avenù el xe senpre stà asè pì inportante che favoleggiar su avenimenti imaginari.
El xe stùpido crédar che quełe storie le sia sì autèntiche antiche crònache, ma crìpticamente codificà secondo contorte e inpenetràbili sinbologie. Par qual motivo lo gavaria mai fato? A queł tenpo la gente la gera pì sénplise de deso, nissun el gaveva voja o motivo de inpregnar le sole storie che le venise scrite e contà de contorti sìmboli che li trasfigurase la veridisità.
La interpretasion pì sénplise, intelisente e ovvia de tuti quei antichi scriti la xe che no ghe xe GNENTE da interpretar. Tuto queło che vien contà el xe avenù davero.
Dio alora davero el parlava ai òmeni tuti i giorni? E no soło lu, ma anca Apoło, Osiride, Brahma, Tao, Zeus, Odino e el Dio Sole? Quasi. In realtà, i òmeni i sentiva le vosi dei Dèi, che le guidava le so asion, ma lore no le vegneva da asè lontan, tipo l'aldilà e/o el regno dei cieli. Lore le vegneva da'l emisfero destro del so sarvèło.
Come asè i sa, el sarvèło el xe diviso in do parti, l'emisfero destro e queło sinistro. Asè de le nostre funsion le xe localizà in tut'e do i emisferi. La fa na ecesion la funsion del linguajo, la quale la xe interamente localizà inte'l emisfero sinistro, in parte inte la area de Broca, ma soratuto inte la area de Wernicke. Parché el linguajo, cussì inportante par noaltri, el risiede in uno soltanto dei nostri emisferi? E quala funsion se trova, inte'l emisfero destro, a la esata corispondensa de la area de Wernicke?
La risposta a sta ùltima domanda la xe: "nissuna". Ghe xe, inte la area de Wernicke del emisfero destro, na porsion de sarvèło che la par proprio no servir a gnente, tant'è vero che quando eła la vien danegià o asportà, el pasiente no'l se ne incorze gnanca, parché nissuna de le so funsion la risulta menomà. Le xe stà però eseguìe esperimenti su asè pasienti, stimolando elètricamente sta inutilizà area del sarvèło par véder cosa sucedeva. I pasienti i riferiva che ghe pareva de sentir le vosi. Fin a'l 2000 a.C. la area de Wernicke del emisfero destro dei èseri umani la fonsionava a pien regime, comunicando a viva vose a'l emisfero sinistro le so decision su ogni problema che'l esulase da la routine cotidiana.
La gera questa la esensa de la Mente Bicameral, la forma de organizasion mental che la regnava inte i crani dei èseri umani par desine de mijara de ani fin a'l secondo milènio a.C., sopiantà (ma soło in parte) da la forma de organizasion mental che ancuo ciamemo "cosiensa sogetiva".
I neuròloghi i conose abastansa ben le diferense funsionali tra i do emisferi cerebrali nostri. Queło sinistro el xe spesializà a l'asion. Lu el controła la parte destra del corpo, e de fato semo in grado de doparar la man destra mejo de la sinistra (e i mansini i ga serte funsion dei emisferi invertìe, ma la sostansa no la canbia). Queło destro el xe anca ciamà "emisfero creativo", e el xe spesializà inte la atività creativa, ovaro la solusion de problemi e la capasità de sìntesi. Tuto queło che noaltri "sentimo" el xe pì o manco na atività del emisfero destro. Queło che pensemo concetualmente el xe invese indicativamente na atività del sinistro. Inte'l spasio mental de la nostra cosiensa noaltri integremo ste diferenti funsion, anca no scanpando a le contradision che le causa.
A'l tenpo de la Bìbia e de l'Ilìade, no ghe gera el spasio mental, ma ghe gera za el linguajo, che pur ancora ghe mancava tuti quei vocàboli che i xe conesi a la cosiensa de sé. L'omo no'l se incorzeva de esìster, come anca ancuo no se incorzemo de guidar la màchina se semo profondamente persi inte i nostri pensieri. Se agiva perenemente in modo automàtico, come par esenpio noaltri ancuo ancora se guida la màchina in modo perfetamente automàtico.
Par inparar a conpir asion sénplise no ghe xe bisogno de la cosiensa, come la òtima capasità de aprendimento de un animal che'l vien amaestrà perfetamente el dimostra. Tutavia, ogni volta che l'Omo Antico el se trovava in na situasion conflitual, indove i inconsapévoli automatismi del so emisfero sinistro no i gera pì suficienti a risòlver un problema, la situasion de stress la induseva l'emisfero destro (responsàbile, come anca ancuo, de la capasità de sìntesi) a comunicar a viva vose a'l sinistro cosa che'l gavese da far. Questa la gera la esensa senplificà del fonsionamento de la mente bicameral. La vose sentìa la partegneva a la figura autoritaria asosià a la nosion comunicà: un familiar, el capotribù, el re, el dio.
Anca ancuo noaltri no semo cosienti de tute le nosion che le xe nascoste drento de noaltri. Speso gavemo un concèto su la punta de la lengua, ma no'l ne vien in mente. Ma ne basta, par esenpio, dar na ociada a'l libro indove gavemo apreso sto concèto parché el riapare màgicamente inte la so interesa drento de noaltri. Podemo no ricordar par gnente na poesia che pur savemo de saver a memoria: ne basta però darghe na ociada inte'l libro indove savemo che eła la se trova parché ne riapare in mente inte la so totalità. A la stesa manera, un apunto scaraboçà in presa el sarà suficiente a farne ricordar idee e progeti anca asè conplesi.
Anca inte i tenpi antichi, quando la mente la gera bicameral, ghe gera el problema de ricordarse le nosion sopìe. Queło che richiamava a la memòria na conosensa nascosta no'l gera un libro o un apunto, ma l'efize del personajo autoritàrio asosià a la nosion. Xe nasùi cussì i ìdoli. Quando se se trovava in na situasion conflitual, e no se se ricordava come se se gavese da conportar, se ndava inte la piasa del vilajo (o sità) a vardar la statua del ìdolo de turno. E eła la faseva l'efeto dei nostri libri o apunti: la richiamava la nosion sopìa a la memòria, e questo el aveniva sentendo la vose del ìdolo. Par questo el xe nato anca la tradision dei ìdoli portàtili: colanełe, statuete, icone. Pì la società la gera conplesa, pì granda la gera la quantità de ìdoli, parché a ognun de lori la gera asosià na categoria de nosion (proprio come inte i libri). In qualunque situasion de stress inte la quale no se riusiva a ciapar na decision automàtica (automàtica come quełe che noaltri ciapemo intanto che sensa pensar guidemo na màchina, par esenpio canbiar marcia) se ghe dava na ociada a'l ìdolo pertinente e cussì se sentiva la so vose comunicar cosa che se gavese da far.
La vita de ognun la gera un continuo sentir vosi de figure autoritarie ordinar cosa che ndase fato. Qualche volta la alusinasion auditiva la gera acompagnà da vision.
Ma fasemo un salto a le orìgini de sta mente bicameral. Quando la xe nata? E come? Qua se trovemo davero a l'alba de l'èser uman. I conponenti de quełe picole tribù che le gera l'umanità i gaveva inte'l crànio el pì eficiente computer del regno animal, ma i programi i faseva davero schifo. Òtimo hardware, quasi nissun software. I gera da poco usìi da le foreste e i stava scominsiando a casar in branco, fasendo concorensa a tuti i carnìvori, i quali i podeva contar su desine de milioni de ani de alenamento a le spale. Ùltimo rivà, tradision da vegetarian e insetìvoro come tuti i primati, neo-carnìvoro e casator pivelo, l'èser uman el ga conpensà con un acresimento del sarvèło la mancansa de i istinti, de le ónge e de le sane che i faseva de lu el pezo dei casatori. Co'l sarvèło el ga inparà par esenpio a costruir arme. Ghe voleva ore e ore par afilar na piera. Inte la rudimental organizasion mental de quei primi umani, le funsion le gera ben distinte. L'emisfero destro el sintetizava la nesesità de afilar la piera. L'emisfero cerebral sinistro el meteva in ato l'afilamento. Lassà a se steso, l'emisfero sinistro el se saria distrà da la so atività a la prima ocasion. Podemo dar un òrdine a un can e lu el obedise, ma se no reiteremo continuamente l'òrdine, dopo un poco lu el se distrae e el finise de obedir. Cussì el gera par l'emisfero sinistro, lassà a se steso. Ma l'emisfero destro, l'emisfero "creativo", el ordinava continuamente a'l sinistro queło che lu el gavese da continuar a far, e lo faseva mandàndoghe l'òrdine sonoro asosià a'l gesto de afilar la piera. Disendo par tuto el giorno a un can ben amaestrà "cucia!", lu el continuarà a méterse a cucia. Disendo par tuto el giorno a'l emisfero sinistro "afila!", queło destro el lo costrenzeva a continuar par tuto el giorno a afilar la piera, sensa distrarse. In realtà, inte i primi tenpi, no'l ghe diseva proprio "afila", ma queł tal grugnìo che'l gaveva asunto queł significato. E da indove el vegneva queł particolar grugnìo? Chi lo gaveva inparà a'l emisfero destro? Ebe, qua semo davero a l'inisio de la cultura. El màsimo detentor de ste picole conosense culturali el gera par ovvie cose el capotribù, che'l lo gaveva apreso da'l capotribù precedente o el lo gaveva parsialmente inventà da sé. El gera el capotribù che'l inparava ai altri come se afilase na piera, mostràndoghe come se fasese e asosiando l'esenpio a la emision de un son (a l'inisio un serto grugnìo). Ghe xe poco de uman in tuto questo. Anca tra le sime i aven cose de sto genere. Sto son, sto grugnìo el diventava cussì l'inesco de la asion de afilar na piera. El ne diventava cussì l'òrdine. Ma l'Omo, anca inte la abisal ignoransa in cui el anaspava a queł tenpo, el gera asè pì intelisente de le sime, e rispeto a lore el ga sviłupà serte capasità in pì: l'emisfero cerebral destro el ga ciapà a governar le asion conpìe da queło sinistro inparando a darghe òrdini verbali, a la stesa manera in cui se dà a un'altra persona. Cussì, el capotribù el te inpara na asion asosiàndola a un son che'l ne devien l'òrdine, e quando el to emisfero destro el pensa che ti àbi da conpir sta asion el la comunica a vose a'l sinistro, e la vose che ti senti la xe tal e qual queła del capotribù, come se se tratase de na registrasion digital.
Un giorno el capotribù el more, ovaro el finise definitivamente de mòverse e dopo un poco el scomìnsia a spusar. Tuti i animali istintivamente i lontana da sé le carcase dei so conpagni morti, e cussì el gaveva fato l'Omo prima che in lu el sorzese la mente bicameral. Deso, el capotribù el xe morto ma quando ghe xe da far qualcosa tuti i sente ancora la so vose. In realtà, no se trata de la vose "soa", ma de la registrasion "digital" de la so vose, prodota da'l emisfero cerebral destro. Le nosion che'l ga inparà no le xe de fato morte con lu, e inte la mente de ognun le continua a inescar l'asion alusinando la so vose. Nase cussì na contradision percetiva. El capotribù el xe par serti versi morto, parché no'l se move, ma par altri el xe innegabilmente vivo, parché el parla e el dise cose ùtili. No movéndose, no'l provede pì ai so bisogni, e el diventa cussì ovio che se ghe ciapa cura de lu. Sicome de là de serte aparense lu el xe vivo, el gavarà bisogno de na casa: eco la nàsita de la tonba e del tenpio. Sicome el xe vivo, el gavarà bisogno de magnar: i reperti archeològici i testimonia che par asè mileni, in tuto el mondo, i morti i vegneva interà insenbre a magnar. Sicome le nosion le xe asosià a la so vose e la so vose la xe asosià a la so facia e deso la so facia no la ghe xe pì, ghe vol costruir un surogà de la so facia che'l permeta de vederlo par ricordar (senténdole) i so insegnamenti, e eco la invension de le statue e de la idolatria. Eco, in estrema sìntesi, la invension de la vita dopo la morte.
Serte società bicamerali, come le Egìsie e le Atzeche, le xe cresìe fin a livełi de conplesità sorprendente.
De quando in quando ste società le crolava, con na velosità e na asensa de cause esterne che i studiosi, ignari de sta teoria, no i xe mai riusìi a spiegarse. Sucedeva, dito in modo sénplise, che l'organizasion geràrchica de ste vosi (e Dèi) la colasava, e con eła l'organizasion social. Invese de veicolar informasion ùtile, le vosi dei Dèi le se riduseva a impartir òrdini incoerenti che i conduseva in presa a'l disastro.
El xe stà durante uno de sti croli, in Mesopotàmia, verso la fine del secondo milènio a.C., che la ga fato la so conparsa par la prima volta su la tera la cosiensa sogetiva, ovaro la creasion de un spasio mental e la capasità de narativizar i eventi spasializando el tenpo. Sta nova forma mental in presa la ga conquistà el mondo, e la storia de sta transasion la xe mirabilmente documentà da'l Novo Testamento. Dio no'l parla pì ai òmeni, fora che ai profeti e ai mesia, i ùltimi òmeni bicamerali. Diventà cosiente, l'umanità la xe però nostàlgica de la època bicameral. La cosiensa, sita inte'l emisfero sinistro, la se ga asunto el càrico de la responsabilità de le decision, prima delegà ai Dèi del emisfero destro. In ogni modo se serca cussì de rievocar le vosi sparìe, par scanpar la responsabilità. La nàsita de le religion la xe el segno pì lanpante de sta nostalgia. Le giaculatorie e i mantra autoipnòtici i ga de fato l'efeto de indebolir l'ancora fràzile cosiensa indusendo un stato de trance, pì sìmile a'l vodo mental de la mente bicameral.
Semo ancuo soło a l'alba de la cosiensa. Eła la xe nata soło 4000 ani fa, e soltanto inte i ùltimi deceni inte la cosiensa la ga scominsià a afiorar la cosiensa de come la sia nata la cosiensa. Ma semo ancora imersi in na baraonda de vestìgia de la època bicameral.
Le vosi bicamerali le gera inescà da'l stress, ovaro da la tension nervosa che la nase quando davanti a un problema se stenta a trovarghe la solusion. Ancora ancuo, un forte stress el ne provoca alusinasion uditive (es: stress da diguno, da mancansa de sono). In serti casi riafiora anca le alusinasion visive, che le ga la forma detà da'l imperativo cognitivo coletivo del momento. Cussì, a un catòlico el pol aparir la Madona, e no serto Buddha. A un seguase dei UFO i pol invese aparir estraterestri. Le alusinasion, uditive o visive, le compare in situasion de stress. La fèbre la xe na forte causa de stress. Chi de noaltri, in preda a forte fèbre, no'l ga mai gavù alusinasion? Chi no'l ga mai gavù alusinasion da creatura, quando la cosiensa no la se xe ancora saldamente afermà, forse proprio durante na fèbre? E parché mai gavaria ancuo esìster in noaltri la capasità de gaver alusinasion, se eła no la gavese costituìo in pasà na consueta modalità de fonsionamento de la nostra mente?
El consumo de droghe psicòtrope, da l'àlcol a la marijuana a l'eroina, el xe un altro segno de la inconsapévole nostalgia dei umani verso la època bicameral. Le droghe le sopise la cosiensa, e serte le induse alusinasion. I riti tribali del bało rìtmico, cussì tìpici inte le tribù africane e inte le discoteche dei paesi sivili, i xe un altro segno de sta nostalgia de na època sensa cosiensa. Sotoposta a rìtmico martelamento sonoro, qualunque mente umana la perde almanco parte de la pròpria cosiensa. Zontando droghe, el trance el xe ancora pì groso.
Come el xe lògico che'l sia, qualche volta serti indivìdui i perde spontaneamente sta resente conquista de la mente umana, la cosiensa, e i ripionba inte la mente bicameral. I sente vosi, i perde el senso del tenpo, i vive tra alusinasion. Ciamemo a questi schizofrènici, li credemo malà, i xe soltanto regredìi. La mente bicameral la xe ancora tra noaltri.
Vestìgia de la mente bicameral, inte l'èser uman, el xe quasi tuto: la mùsica, la poesia, la propension ai miti e a la delega de la responsabilità, la fede, la sincerità, la fedeltà, i sentimenti. La cosiensa anàlitica la se xe apena inpisà, in noaltri, da un pugno de sècoli, e no gavemo ancora inparà a doparara par finalità saje. Pì speso, la cosiensa la xe de fato doparà come arma inpròpria par pianificar asion triviali. Par questo, el Ben el xe de pì magiormente asosià a funsion umane antiche, vestìgia de la mente bicameral, invese che ai imaturi fruti de la nova potentìsima nostra funsion ciamà cosiensa.
Ghe xe su questo da parlar e rasonar par libri e eoni, ma par stavolta me fermo qua, asè prima che a metà discorso, content de gaver posto germoji de riflesion inte le menti umane in cui sto scrito el se xe riversà, auguràndome che lori i trova teren fèrtile, in modo de no tramutarse, come invese quasi senpre el sucede, in parołe sprecà.
Caro Maurizio Costanzo Show, penso davero vergognoso che me àbia da ciapar pùblicamente la briga de far luse su ste verità mi, che dopotuto no son gnanca laureà e no me paga nissun, quando nissun dei titolatìsimi pagatìsimi sedicenti psicòloghi e sosiòloghi ufisiali e famosi che inte i ani i se ga alternà su'l palcoscènico tuo no i se ga mai revelà in grado anca soło de acenar a sto òrdine de brilanti argomenti. Quasi quasi li sfido a duelo par revelar a'l mondo la farsesca so impostura.

Roberto Quaglia