me domando qualche volta o pì presto in sto istante par la prima volta se Ti ti ga cosiensa. Quando digo "Ti" no intendo naturalmente Maurizio Costanzo, né queło che'l xe preposto a lézer tute le cussì dite létere a'l Maurizio Costanzo Show. Intendo proprio Te, "Maurizio Costanzo Show", entità evidentemente astrata epuro intrinsecamente concretìsima asè, parché punto de riferimento de milioni de italiani e sorzente de notorietà par i eleti basà da la to Atension. Me domando se Ti ti ga cosiensa e la domanda, se ti me consenti, la xe del tuto lècita, parché de là de ogni scètico dubio Ti atualmente ti sì una de le divinità pì consideri de la Italia de ancuo.
Se crede ancora abastansa in Dio, el xe vero, ma senpre pì speso co'l benefìsio del dubio. Mai invese go visto fin a deso qualcun dubitar de la Terena ma no par questo manco santa to esistensa. Le epifanie moderne, ovaro le aparision, le xe a colori e videoregistràbili, le aven con sincronismo perfeto su tuti i teleschermi, e come ogni autèntica esperiensa mìstica le se considera reali de là de ogni imaginàrio dubio. Quanta diferensa co le pì clàsiche e antiche manifestasion ogetive de Dio! Epuro, in altri tenpi, lore le xe stà credùe reali tanto quanto la television ancuo, no de manco. Ancora a l'inisio de la Era Moderna le posesion diabòliche le gera un dato de fato indubitàbile, e la gente le credeva un fato real (come la pensa reale la television ancuo) a tal punto, da brusar su i roghi le strighe. Inte i conventi de mòneghe le inperversava le èstasi mìstiche quasi quanto le posesion diabòliche, e i esorsismi i gera cotidiani spetàcoli pùblici atorno ai quali se acalcava la gente, che la faseva el tifo o par l'esorsista o par la indiavolà, no eséndo alora ancora de moda el canpionato de balon. Serti conventi adiritura i prosperava su la vèndita dei bijeti par asìster ai esorsismi. No i gera mai asè, a'l steso tenpo, i conventi che i podeva vantar un bon indiavolamento, e cussì chi ghe ne gaveva i mezi el se meteva in viajo da ogni parte del paese par ndar a gustar el spetàcoło del pùblico esorsismo de qualche mònega indiavolà, opur, se preferì esprìmerlo diferentemente, i ndava a seguir un esorsismo in trasferta. Serte mòneghe particolarmente àbili inte l'èser posedùe da'l demònio le diventava vere e propie star, un poco come Cicciolina & Company ancuo. Me domandarì: come podeva na mònega èser indiavolà in modo pì o manco àbile? Podeva, podeva. Oltre a ofrir a le desine o sentenara de spetatori un vario canpionato de le pì oscene bestieme de moda, na bona posedùa, manovrà dai so demòni, la eseguiva a richiesta anca conplese piroete, salti mortali e altri nùmari de varietà. El repertòrio clàsico el conprendeva naturalmente senpre le convulsion con sciuma a la boca, asè ùtile par evitar de rispónder a le domande traboceto. I sìntomi de la posesion i scominsiava qualche volta spontaneamente, pì speso diretamente inescà da l'esorsista che'l serca de snidar i demòni silenti.
Regista de l'esorsismo el xe de fato l'esorsista, la cui soła presensa la xe de fato speso suficiente a dar el via a l'invasamento.
In sto sècolo l'isteria (una de le etichete doparà par ilùderse de capir l'esata natura de sti fenòmeni) no la xe pì asè de moda. La fa tènue ecesion, su i itàlici teleschermi, el regno de Ambra co le so neo-posedùe. El demònio no'l ghe trase, l'isteria un poco sì, ameso che mi e voaltri se intenda par isteria la stesa cosa.
Ma l'època de la osesion del diàvoło, dei conventi indiavolà, de la cacia a le strighe, no la xe lontana da noaltri come ne piaze far finta che la sia. Sto mondo antico ma no tropo, che a noaltri ancuo el par cussì ignorante e soratuto cussì mato, soło poche generasion fa mato no'l pareva a chi lo viveva, a chi vivéndolo alora come fato normal el par deso a noaltri mato lu steso. Altre pazie le xe credùe normali ancuo, e no le xe manco periculose o letali. Inte'l medioevo na minoransa la gera lùsida e la reconoseva par mato queło che ancuo anca a noaltri mato el par. E anca deso, inte la inperante pazia misià con demensa, qualcun el mantien la mente ciara e deso come alora el xe inascoltà. Come tant'altri inte'l mondo e pì de tant'altri in Europa, la società italiana la palesa, inte'l so conportamento de insenbre, inte'l so modo de consepir tuto, da la polìtica a'l balon, le medèsime tare che le ga aflito i nostri mati antenati e che noaltri ne conpiasemo de osservar co l'ocio superior de na presunta maturità. Le canbia moda, ma le tare del pensiero le xe senpre le stese.
Eco un bon toco su questo scrito da uno dei pì lùsidi pensatori del ventèsimo sècolo, Aldous Huxley, (ciapà da I diavoli di Loudun):
«...vedemo deso che tuti i mali de la religion i pol fiorir sensa nissuna fede inte'l sovranatural, che materialisti convinti i xe pronti a adorar le so mal costruìe creasion come se le fuse l'asoluto, e che sedicenti umanisti i perseguitarà i so aversari con tuto el zelo de inquisitori intenti a'l sterminio de fedeli de un Satana personal e trascendente. Sìmili schemi de conportamento i xe anteriori e i soravive a le credense che, in ogni dato momento, le par de motivarli. Poche persone deso i crede inte'l diàvoło; ma asè i ama conportarse come i se conportava i so antenati quando el spìrito maligno el gera na realtà indiscutìbile come la so entità contraria. Par scopo de giustificar la so condota, lori i ga trasformà le so teorie in dogmi, i so regolamenti in prinsipi esensiali, i so capi polìtici in dèi e tuti i disensienti in demòni incarnà. Sta idolàtrica trasformasion del relativo inte l'asoluto e del fin tropo uman inte'l divino, la ghe rende posìbile sodisfar le pì base pasion co la cosiensa pulìa e inte la certesa de agir par el Màsimo Ben. E quando le convinsion correnti le acquista, a so volta, na aparensa siòca, ne sarà inventà na nova serie, in modo che la imemoràbile pazia la posa continuar a rivestir la so tradisional màschera de legalità, de idealismo e de vera religion.»
Ti, ti che ti sta lezendo, ti sì davero serto o serta de no far parte de questi, de questi che i rende cussì squàlida la senò maravejosa mente de l'Èser Uman? Smàschera deso i to dogmi e domàndate: "I ga senso?" Pensa a queli che ti odi, ai Cativi, e domàndate: "Parché lori i xe Cativi e mi Bon/a?" Se no te ciapa gnanca un dubio, se la fede inte i to Valori la xe asoluta, ti fa parte de l'umanità che fa schifo. Ma no te preocupar. No te ne incorzarè mai. E queli come mi i te sarà senpre antìpatici, o pezo.

Roberto Quaglia