te rendi conto che ti sì virtualmente imortal? Digo "virtualmente" par no fàrla tropo fora dal secio. Ma tuto queło che in ti sucede no'l sparise sucedendo, come el sucede ai fenòmeni clàsici. Ogni istante de la to manifestasion el xe fedelmente conservà co la procedura màgica de la videoregistrasion, e no'l xe interà inte'l pasà. Gnente ne vieta de pensar che tra serti mileni le imàgini e discorsi de cui ti consisti i sia esibìi in un museo eletrònico del futuro... (cosa vol dir un museo eletrònico? queło che go scrito la xe na banalità imane; l'eletrònica la xe atuale ancuo come el motor a vapor lo gera inte'l sècolo pasà; tra mijara de ani...) ...o pì presto, in un museo mental, qualunque cosa sta invension la podarà èser. Gnente ne vieta de fato de imaginar che in un inprecisà futuro tuto queło che in pasà el xe stà scrito, cantà, sonà, reso in imàgine, el posa èser diretamente acesìbile a la mente de ognun mediante el soło esersisio de la pròpria intension. In altre parole, mediante tècniche par noaltri atualmente inimaginàbili (come inimaginàbili de sicuro le xe stà le tècniche informàtiche ai abitanti del medio evo), na persona la podarà "véder" diretamente inte'l so sarvèło qualunque film el sia mai stà girà, sentir qualunque canson chiunque el àbia mai cantà, adiritura "viver", in modalità a noaltri ancora ignote, avenimenti sucesi sècoli prima. Quanto sto disendo no'l xe za deso gnente de tropo straordinàrio, quando i progresi inte'l sviłupo de le tècniche de realtà virtual i lasa presagir l'inaugurasion de na era de esistensa anca interamente fitìsia za par l'inisio del sècolo che vien, ovaro tra manco de un desènio. Parché inte la storia umana la realtà la ga senpre scavalcà la pì sfrenà de le fantasie, se ne podaria arguir che qualunque ipòtesi la mente umana la posa imaginar par el futuro de la nostra spece, purché no in totale contrasto co le pì evidenti de le leji de natura, la sia destinà no soło a averarse, ma a èser adiritura scavalcà dai eventi reali.
El xe questo un pensiero davero intrigante, caro Maurizio Costanzo Show. Soło in sto sècolo orde de scritori i se entusiasma a scrìver de queło che'l futuro el ofrirà a l'umanità. I ga sbaglià, inte i sècoli e inte i sècoli pasà, tute le persone pì dote, mai prevedendo un futuro sostansialmente diverso da'l so presente. I sbaliarà alora anca tuti i scritori de fantasiensa contenporanei, e anca lori, come i so predecesori, par difeto? Le so storie za de par sé mirabolanti e incredìbili, le sarà superà da na realtà ancora pì alusinante? Se la lògica no la xe na opinion, el sarà cussì, anca se la nostra mente la se opone naturalmente a sta ipòtesi, no acetando che da qualche parte (in sto caso inte'l "futuro") ghe posa èser incògnite che eła no la posa tegnir soto el so controło.
Ti sì cussì virtualmente imortal, caro Maurizio Costanzo Show. Queło che in ti vien dito el riecheggiarà qualche volta, qua e là, inte le menti de indivìdui che i ga ancora da nàser. Come a noaltri riva le sfocà e acelerà imàgini in bianco e negro dei primi film de inisio sècolo, piene de protagonisti che da longo tenpo i ga finìo de èser, el farà un giorno tenerésa o altre sensasion a qualcun el fato de vardarse le bidimensionali sequense de le to trasmision, scoltar i personaji che i ga visù in ti reviver quełe che le aparirà come le asurde e sorpasà so conversasion.
Ghe xe qualcosa de sovranatural in tuto questo. Gnente che in ti sucede el sparise. "Verba volant" se diseva na volta. Par mileni, le parołe no le ga lassà trase. Né i gesti. Tuto spariva sucedendo. D'ora in poi, par queło che te riguarda, no'l sarà pì cussì. Ogni parola sporca de sgarbi la xe restà, riproponìbile a l'infinito, giudicàbile e rigiudicàbile fin a la fine dei tenpi o de l'Omo o dei suporti indove ti, Maurizio Costanzo Show, ti sì e ti sarè registrà. Ogni manifestasion de belesa, in ti e inte la to trasmision, no la xe stà efìmera, la esiste ancora, e la se manifestarà quando la richiamaremo inte'l modo oportuno. Par el momento el modo oportuno el xe queło de rimandarla in onda, o rivedérse na caseta registrà. Un giorno, come za dito, el podarà bastar la soła pròpria intension. Se acederà ai ricordi audiovisivi coletivi con sforsi mentali àfini a queli che noaltri normalmente za tuti i giorni doparemo par ricordar queło che savemo. Par queł tenpo, l'istrusion la sarà forse conpletamente avulsa dai libri, che inte la forma de ancuo comunque no i esistarà pì. (Prima de tuto parché no esistarà pì la carta. La carta la vien de fato fata dai àrboli e inte'l corso del sècolo che vien l'Umanità la darà probabilmente fondo a le ùltime riserve de foreste che ancuo ancora resiste e ogni tipo de àrbol el sparirà par senpre da la tera e con lu la carta. In secondo luogo la carta dei libri atualmente esistenti la se sarà spontaneamente deconposta, parché cussì la fa la carta: la speta par un poco che qualcun la lese, po discretamente la se deconpone dopo poche sentenara de ani a'l màsimo, sparindo insenbre a le so parołe inquiline.) La cultura la consistarà inte la capacità de trovar, inte'l smisurà database de tuto el scìbile digitalizà (o senò registrà), informasion, imàgini e corelasion de documenti. El scìbile digitalizà (come a mi deso me piaze ciamarlo), el sarà in un serto senso un anbiente mental, un anbiente imenso e conpleso. La diferensa tra l'ignorante e la persona colta la sarà data da la mejor o pezo acquisision de le tècniche necesarie a districarse drento. I pì inteligenti i inpararà tècniche pì conplese. La sarà, queła de cui deso confusamente stemo fantasticando, inevitabilmente na esistensa pretamente mental. Questo no'l sarà comunque par gnente na pèrdita. Quanto ne sucederà o ne parà de sucédarne, ne parà a tuti i efeti real e cussì de fato el lo sarà. Anca malatie e morte le sarà purtropo reali anca no eséndolo. Queło che'l sarvèło el xe fermamente convinto che ghe sta sucedendo, efetivamente ghe sucede, conpresa la morte (dura lex, sed lex psicosomaticae). Ma i vantaji de sta società mental ventura i sarà eclatanti: l'èser uman el trascendarà par l'enèsima volta i so lìmiti precedenti, mantegnendo le so pasion, i so visi animali e tare genètiche inquadrà in un novo sofisticatìsimo sistema che inte la nostra imaginasion deso confusamente el apare come inposìbile e misterioso (come inposìbile e misterioso el apariria el sistema de vita atual nostro a l'Omo Medieval), ma che ai Òmeni e Fémene del futuro el aparirà sénplisemente - come senpre el xe stà dopo ogni gradin de sviłupo - normal, scontà, e anca noioso. Caro Maurizio Costanzo Show, la mia orasion de ancuo davanti a ti la xe finìa. Rimeto i mii concèti ai pòsteri opur no e cussì sia.

Roberto Quaglia