mi domandi cualchi volte o pluitost in chest moment pe prime volte se Tu tu vedis cussience. Cuant che o dîs "Tu" no intint naturalmentri Maurizio Costanzo, ni chel che al è metût a lei dutis lis cussì clamadis letaris al Maurizio Costanzo Show. O intint pròpit Te, "Maurizio Costanzo Show", entitât evidentementri astrate epûr in se une vore concretissime, parcè che pont di riferiment di milions di talians e risultive di notorietât pai elets bussâts de Tô atenzion. Mi domandi se Tu tu vedis cussience e la domande, se tu mi permetis, e je dal dut leciti, parcè che di là di ogni dubi scetic Tu cumò tu sês une des divinitâts plui consideradis de Italie di vuê.
Si crôt ancjemò avonde in Diu, al è vêr, ma simpri plui dispès cul benefici dal dubi. Mai invezit no ai viodût fin cumò nissun dubitâ de tô esistence Terene ma no par chest mancul sante. Lis epifaniis modernis, cioè lis aparizions, a son a colôrs e si puedin videoregjistrâ, a sucedin cun sincronisim perfet su ducj i teleschermis, e come ogni autentiche esperience mistiche si lis considere reâls di là di ogni dubi imagjinari. Trope diference cu lis plui classichis e antighis manifestazions ogjetivis di Diu! Epûr, in altris timps, a forin crodudis reâls tant come la television vuê, no di mancul. Ancjemò al inizi de Ere Moderne lis possessions diabolichis a jerin un dât di fat che no si podeve dubitâ, e la int lis crodeve un fat reâl (come che e ten reâl la television vuê) a tâl pont, di brusâ su lis peris lis striis. Tai conventi des muinis a imperversavin lis estasis mistichis cuasi tant che lis possessions diabolichis, e i esorcisims a jerin spetacui publics di ogni dì ator dai cuai si ingrumave la int, che e faseve il tifo o pal esorcist o pe indemoniade, stant che alore nol jere ancjemò di mode il campionât di balon. Cualchi convent al prosperave adiriture su la vendite dai biliets par assisti ai esorcisims. No jerin mai tancj, tal stes timp, i conventi che a podevin vantâ une buine indemoniazion, e cussì cui che al veve i mieçs si meteve in viaç di ogni bande dal paîs par lâ a gustâsi il spetacul dal esorcisim public di cualchi muinie indemoniade, o ben, se o preferîs dîlu in altre maniere, a levin a viodi un esorcisim in trasferte. Ciertis muinis particolarmentri bravis tal jessi possedudis dal demoni a deventavin vêris stelis, un pôc come Cicciolina & Company vuê. Mi domandarês: cemût podevie une muinie jessi indemoniade in maniere plui o mancul brave? E podeve, e podeve. Oltri a ufrî aes dicinis o centenârs di spetadôrs un campionari variât des blestemis plui oscenis di mode, une buine possedude, manovrade dai siei demonis, e faseve a richieste ancje piroetis complicadis, salts mortâi e altris numars di varietât. Il repertori classic al tignive naturalmentri simpri dentri lis convulsions cu la sbrume ae bocje, une vore utilis par evitâ di rispuindi aes domandis trapule. I sintoms de possession a tacavin cualchi volte di bessôi, plui dispès impiâts diret dal esorcist che al cîr di fâ saltâ fûr i demonis cidins.
Il regjist dal esorcisim al è difat l'esorcist, che dome la sô presince e je dispès avonde par dâ il vie al invasament.
In chest secul la isterie (une des etichetis dopradis par ilusionâsi di capî la nature esate di chescj fenomens) no je plui une vore di mode. E fâs une piçule ecezion, sui teleschermis talians, il ream di Ambra cu lis sôs gnovis possedudis. Il demoni nol jentre, la isterie un pôc sì, ametût che jo e vualtris o intindìn par isterie la stesse robe.
Ma la epoche de ossession dal diaul, dai conventi indemoniâts, de cjace aes striis, no je lontane di nô come che nus plâs fâ fente che e sedi. Chest mont antîc ma no masse, che a nô vuê nus semee cussì ignorant e soredut cussì mat, dome pocjis gjenerazions indaûr nol pareve mat a cui che lu viveve, a cui che vivintlu alore come fat normâl cumò nus semee mat lui stes. Altris matetâts a son crodudis normâls vuê, e no son mancul pericolosis o letâls. Tal medievo une minorance e jere lucide e e ricognosseve par mat ce che vuê ancje a nô nus semee mat. E ancje cumò, te matetât che e regne messedade cu la demence, cualchidun al ten la ment clare e cumò come alore nol è scoltât. Come tantis altris tal mont e plui di tantis altris in Europe, la societât taliane e mostre, tal so compuartament di insiemi, te sô maniere di concepî dut, de politiche al balon, lis stessis taris che a tormentarin i nestris vons mats e che nô si comprasìn di cjalâ cul voli superiôr di une presunte maturitât. A cambiin lis modis, ma lis taris dal pinsîr a son simpri chês.
Ve un biel toc su chest scrit di un dai pensadôrs plui lucits dal vincjesim secul, Aldous Huxley, (cjolt di I diaui di Loudun):
«...o viodìn cumò che ducj i mâi de religjon a puedin florî cence nissune fede tal sorenaturâl, che materialiscj convints a son pronts a adorâ lis lôr creazions fatis mâl come se a fossin l'assolût, e che chei che si disin umaniscj a perseguitaran i lôr aversaris cun dut il zêl di incuisidôrs impegnâts tal stermini di fedêi di un Satane personâl e trascendent. Schemis di compuartament di chest gjenar a vegnin prime e a sorevivin aes crodincis che, in ogni moment, a somein motivâju. Pocjis personis cumò a crodin tal diaul; ma tantissimis a amin compuartâsi come che si compuartavin i lôr vons cuant che il spirt maligni al jere une realtât che no si podeve discuti come la sô entitât contrarie. Par justificâ il lôr compuartament, a trasformarin lis lôr teoriis in dogmis, i lôr regolaments in principis essenziâi, i lôr cjâfs politics in dius e ducj chei che no jerin dacuardi in demonis incarnâts. Cheste trasformazion idolatriche dal relatîf tal assolût e dal fin masse uman tal divin, ur rint pussibil sodisfâ lis passions plui bassis cu la cussience nete e te certece di fâ pal Massim Ben. E cuant che lis convinzions dal moment a cjapin, a lôr volte, une aparence stupide, int vignarà inventade une gnove serie, in maniere che la matetât di simpri e puedi continuâ a vistîsi de sô maschere tradizionâl di legalitât, di idealisim e di vere religjon.»
Tu, tu che tu stâs leint, sêstu pardabon sigûr o sigure di no fâ part di chei, di chei che a rindin cussì misare la ment altrimentri maraveose dal Jessi Uman? Gjave cumò la maschere ai tiei dogmis e domanditi: "Àno sens?" Pense a chei che tu odeis, ai Triscj, e domanditi: "Parcè lôr sono Triscj e jo Bon/Buine?" Se no ti cjape nancje un dubi, se la fede tai TIEI Valôrs e je assolude, tu fasis part de umanitât che e fâs schifo. Ma no sta preocupâti. No ti 'nt inacuarzarâs mai. E chei come me ti saran simpri antipatics, o piês.

Roberto Quaglia