parlemo ancuo de Zènova. No ghe ne parla mai nissun, in Italia, e el xe un pecà, parché ghe saria su questo asè cose de sublime cativeria da dir. Zènova la xe na gran sità, pì de Venesia, Firense e Bologna. La pàtise però na crònica emarginasion da'l prosenio de l'atension nasional, emarginasion de cui i xe rei i zenovesi stesi. I zenovesi i xe de fato veri e propri prìnsipi de la emarginasion, ma no de la sòlita e tìpica emarginasion dei pì poveri e dereliti, cussì difusa in tuta Italia e in tuto el mondo. Zènova la xe maestra a emarginar i so sitadini pì vivi. Ma no par cativeria. De fato, pì che in queło che se ga apena dito, Zènova la xe perfeta inte l'asurdo gesto de emarginar adiritura se stesa da'l mondo. Fin da la so orìgine separà da'l resto de la società da'l mar e dai monti, Zènova la se ne xe separà anca a liveło mental (e come gavaria podùo èser senò?). Distirà come pochìsime altre metròpoli su le coline afacià su'l mar, ofrendo cussì de sé un spetàcoło ùnico che no'l vien mai a noia, situà in mezo a una de le pì bełe riviere del mondo, Zènova la xe miracolosamente riusìa a evitar el 100% dei milioni de turisti de tuto el mondo che sensa fermo i se move lassando indrio de sé na scìa de danaro e de benèsare. La locasion geogràfica de Zènova la xe un dono che poche altre sità inte'l mondo le podaria vantar. El clima de inverno el xe tra i pì miti de Italia e de istà el pì ventilà. Sensa che in pasà la fa gnente de clamorosamente sbaglià o apena qualcosełina de giusto, Zènova la podaria deso èser la Miami de Europa. Imaginè, imaginè na spiagia che la va da Vesima a Nervi, interota soło da'l pì groso porto turìstico del mondo, con sentenara e sentenara de albèrghi par tute le sache strache tuto l'ano de richìsimi posesori de panfili e de turisti de l'Europa intiera! Imaginè el centro stòrico zenovese, el pì groso de Europa, gonfio de turisti beati, intasà de gente desiderosa de spénder! Imaginè la sità de agosto, brulicante de umani gaudenti e spendacioni no manco che a Rimini! Gnente fàbriche de Cornigliano in pasivo de schei e produtrisi soło de càncaro! A'l so posto: un luna park permanente afacià su'l mar, a un paso da la spiagia!
A agosto a Zènova no se trova un negòsio verto che'l sia uno.
A Feragosto la sità la xe morta, o in animasion sospesa. Cussì silensiosa da suzerir che na bonba a'l neutron la la àbia sterilizà de la so popolasion. Tuti i zenovesi i sta a spénder in altri canti, quando saria stà cussì fàsile far sì che i fuse i altri, i non-zenovesi, a pasar l'Agosto a Zènova a spénder i so risparmi.
De chi xe la colpa?
El sucede anca speso che un indivìduo no'l sia el colpévole del so destino. No'l sucede la stesa cosa ai pòpoli. I pòpoli i xe responsàbili del so destino. I zenovesi i xe colpévoli de gaverse sputanà l'eredità anbiental che i gaveva a disposision, lassando che'l diventase covo de marsume el centro stòrico che'l gavaria apasionà turisti de tuto el mondo, lassando le so spiage a la mercé del insediamento de fàbriche inprodutive de schei e produtrisi de càncaro, emarginando sistematicamente chiunque el fasese qualunque cosa de cosiensioso, e infine, perseverando ancora inte la orba e autolesionista pazia lori.
Se vive mal a Zènova, ancuo pì de ieri e manco de doman, ogni àngoło scuro el xe posto preferìo dei mijara se no desine de mijara de zóvani zenovesi tossicòmani.
Indove ancora ghe ne sia, l'inteligensa la sofre, a Zènova, a la vista de sta coletiva orbité stratègica, inte la conprension de le orende tare mentali che le ga condoto Zènova a na tal roina in vece de la radiosa prosperità che le so ecesionali risorse le la gavaria reso fàsilmente realizàbile.
El xe par questo che da Zènova el scanpa e el ga da scanpar chiunque inte l'archetipo del zenovese no'l se reconose e no'l se vol rasegnar a reconóserse.
I xe scanpà in tanti. I artisti, tuti. Opur i ga finìo de far i artisti. A Zènova no'l soravive a longo un cantautor, un còmico (par nominar le categorie de artisti che i "va par la magior"). Ma gnanca un scritor, un pitor, un regista teatral, un ator. Se a Parigi o a Venesia un zóvane el sona par strada par guadagnarse qualche schei el xe un artista in erba. Se'l lo fa a Zènova el xe un pitoco. Par qual motivo cantautori e còmici zenovesi i xe in media i mejo d'Italia? Parché fin a quando no i ga abandonà Zènova i ga maserà inte la indiferensa general, costreti da'l so dolor de no èser asolutamente consideri a mejorarse e a mejorarse e a mejorarse, eternamente invan, fin a quando, abandonà finalmente sta orba piasa, i ga podùo mesurarse con chi, inte'l resto de Italia, el gaveva paralelamente fato cose ànaloghe a le lori, ma con manco delusion, manco frustrasion e cussì, minor cresita artìstica.
Quanto go apena dito el xe ovviamente opinàbile, ma chi lo vol opinar el me ga da spiegar, alora, a cosa sia par esenpio dovùa la cussì dita "scoła zenovese" dei cantautori. Poso garantir che no esiste nissuna scoła de sto genere. L'ùnica scoła de Zènova, che la costrense l'artista o el pensator a la rinunsia o a'l mejoramento, la xe l'Indiferensa. L'Indiferensa detà no da'l snobismo, ma da la Otusità. Eła la destruze na mente originale opur la la tenpra.
Girando par el mondo e incontrando, come speso sucede, un italian, te incorzi sùbito se'l xe un zenovese. El lo emana dai oci. Opur, lo capisi da queło che dai oci no'l emana. I zenovesi che ancora i xe drento vivi, quando i se gira fora dai confini de la segregasion zenovese i fa inequivocàbili lanpi dai oci, bagiori de irefrenàbile entusiasmo a descovrir che no tuto el mondo el xe ancora morto. O invese, se a deanbular a l'estero i xe i zenovesi pì tìpici, un opaco veło de nebia el satura el so sguardo spianto par senpre, che se no ti sta atento in presa el te reinfeta co l'umor che a Zènova a ogni modo no ti pol evitar de gaver.
El zenovese el xe sarà, come sarà la xe senpre stà, geogràficamente, la so sità. Sta ciusura, sta avarisia mental, in pasà, la se ga reso de sicuro ùtile a la soravivensa. Ancuo, che i confini geogràfici no i xe pì ostàcoło de comunicasion, sararse a'l mondo no'l xe pì strategia de soravivensa, ma de autoemarginasion e de estinsion. Zènova la sta agonizando, o forse la xe za morta, no so, ma no volìme mal. (a metàfora espresa no se varda in boca)

Roberto Quaglia