te rendet cont che te seet virtualment immortal? Disi "virtualment" per minga fàla tropp foeura del bolàcch. Ma tütt quell che in tì el sücced el scompar minga sücedend, come el sücced ai fenòmen clàssich. Ogni istant de la toa manifestazion l'è fedelment conservaa con la procedüra màgica de la videoregistrazion, e l'è minga aterraa in del passaa. Nagott ne vieta de pensà che tra cert milenni i imàgin e discors de cui el consist sìen esibii in on musé elettrònich del fütür... (cossa el voeur dì on musé elettrònich? quell che hoo scrivüü l'è ona banalità imana; l'elettrònica l'è atüala incoeu come el motor a vapor el l'era in del sècol passaa; tra migliara de ann...) ...o pussee prest, in on musé mental, qualunca roba sta invenzion la podarà vess. Nagott ne vieta defatt de imaginà che in on imprecisaa fütür tütt quell che in del passaa l'è staa scrivüü, cantaa, sonaa, res in imàgin, el pòssa vess direttament accessìbil a la ment de ognidün mediant el sol esercizi de la propria intenzion. In alter parol, mediant tècnich per nün atüalment inimaginàbil (come inimaginàbil de sicür füren i tècnich informàtich ai abitant del medi evo), ona persòna la podarà "vedè" direttament in del sò cervell qualunca film el sia mai staa giraa, sentì qualunca canzon chissessia el gh'àbbia mai cantaa, adiritüra "viv", in modalità a nün ancamò ignòt, avveniment sücced sècoi prima. Quant sont adree a dì l'è minga giamò adess nagott de tropp straordinari, quand i progress in del svilüpp di tècnich de realtà virtuala làssen presagì l'inaugurazion de ona era de esistenza anca interament fittizia giamò per l'inizi del sècol che vegn, ovèro tra men de on decenni. Perché in la storia umana la realtà la gh'ha semper scavalcaa la pussee sfrenada di fantasie, se ne podaría argüì che qualunca ipòtesi la ment umana la pòssa imaginà per el fütür de la nòstra speci, purché minga in total contrast con i pussee evident di legg de natüra, la sia destinada minga domà a averàss, ma a vess adiritüra scavalcada di event real.
L'è quest on pensér denver intrigant, car Maurizio Costanzo Show. Domà in sto sècol orde de scrittor se entüsiàsmen a scriv de quell che el fütür el ofrirà a l'ümanità. Sbagliàven, in di sècoi e in di sècoi passaa, tütt i persònn pussee dòtt, mai prevedend on fütür sostanzialment divers del lor present. Sbagliarann alora anca tütt i scrittor de fantascienza contemporani, e anca lor, come i lor predecessor, per difett? I lor storie giamò de per sè mirabolant e incredìbil, sarann süperaa de ona realtà ancamò pussee alücinant? Se la lògica l'è minga ona opinion, el sarà inscì, anca se la nòstra ment la s'opon naturalment a sta ipòtesi, minga acetand che in quaic part (in sto cas in del "fütür") ghe pòssen vess incògnit che lee la pòssa minga tegnì sota el sò control.
Te seet inscì virtualment immortal, car Maurizio Costanzo Show. Quell che in tì el vegn ditt el riecheggiarà quaic voeulta, chì e là, in di ment de individü che gh'hann ancamò de nàsser. Come a nün ríven i sfocaa e acceleraa imàgin in gianch e negher di primm film de inizi sècol, pien de protagonisti che de long temp hann finii de vess, el farà on dì tenerezza o alter sensazion a quaicedun el fatt de vardàss i bidimensional sequenz di toe trasmission, scoltà i personagg che hann vivüü in tì reviv quii che appararann come i assürd e sorpassaa lor conversazion.
Gh'è quaicoss de sovranatüral in tütt quest. Nagott che in tì el sücced el scompar. "Verba volant" se diseva ona voeulta. Per milenni, i parol hann minga lassaa tracc. Né i gest. Tütt el scompariva sücedend. D'ora in poi, per quell che te rigoarda, el sarà pü inscì. Ogni parola sporca de sgarbi l'è restada, riproponìbil a l'infinii, giüdicàbil e rigiüdicàbil fina a la fin di temp o de l'Òm o di supòrt indove tì, Maurizio Costanzo Show, te seet e te saré registraa. Ogni manifestazion de belezza, in tì e in la toa trasmission, l'è minga stada efìmera, la esist ancamò, e la se manifestarà quand la richiamarèmm in del mœud opportün. Per el moment el mœud opportün l'è quel de rimandàla in onda, o rivedèss ona cassetta registrada. On dì, come giamò ditt, el podarà bastà la sola propria intenzion. Se accedarà ai regord audiovisiv colettiv con sforz mental àffin a quii che nün normalment giamò tütt i dì doperom per regordà quell che savom. Per quel temp, l'istrüzion la sarà forsi completament avülsa di liber, che in la forma de incoeu comunque esistarann pü. (Prima de tütt perché esistarà pü la carta. La carta la vegn defatt facia di àlber e in del cors del sècol che vegn l'Ümanità la darà probabilment fond ai ültim riserv de forest che incoeu ancamò resìsten e ogni tip de àlber el scomparà per semper de la terra e con lü la carta. In second loeugh la carta di liber atüalment esistent la se sarà spontaneament decomposta, perché inscì fa la carta: la spetta per on poo che quaicedun la leng, poeu discretament la se decompon dopo poch centenara de ann al màssim, scomparend insema con i sò parol inquilin.) La cultüra la consistarà in la capacità de trovà, in del smisüraa database de tütt el scìbil digitalizzaa (o se de no registraa), informazion, imàgin e correlazion de document. El scìbil digitalizzaa (come a mì adess me pias ciamàll), el sarà in on cert senso on ambient mental, on ambient immens e compless. La differenza tra l'ignorant e la persòna colta la sarà dada de la mejor o pesg acquisizion di tècnich necessari a districàss dent. I pussee inteligent impararann tècnich pussee compless. El sarà, quela de cui adess confüsament semm adree a fantasticà, inevitabilment ona esistenza prettament mental. Quest el sarà comunque per nagott ona perdida. Quant ne succedarà o ne parirà de ne sücced, ne parirà a tütt i efett real e inscì de fatt el sarà. Anca malatii e mort sarann purtropp real anca essèndoi minga. Quell che el cervell l'è fermament convint che ghe sta sücedend, effettivament ghe sücced, compresa la mort (dura lex, sed lex psicosomaticae). Ma i vantacc de sta società mental ventüra sarann eclatant: l'esser üman el trascendarà per l'ennèsima voeulta i sò lìmit precedent, mantegnend i sò passion, i sò vizzi animal e tar genètich inquadraa in on noeuv sofisticatìssim sistema che in la nòstra imaginazion adess confüsament el appar come impossìbil e misterios (come impossìbil e misterios el apparirìa el nòster sistema de vita atüal a l'Òm Medieval), ma che ai Òmen e Fèmen del fütür el aparirà semplicement - come semper l'è staa dopo ogni gradin de svilüpp - normal, scontaa, e anca noios. Car Maurizio Costanzo Show, la mia orazion de incoeu denanz a tì l'è finida. Rimeti i mè concett ai pòster oppür no e inscì sia.

Roberto Quaglia