t at rénd cånt ch't î virtualmänt immortèl? A dâg "virtualmänt" par an la fèr brîṡa tröp fòra dal bulâg. Mo tótt quall ch'in té al capita an svanéss brîṡa capitänd, cme al capita ai fenåmen clâsich. Ògni istànt dla tå manifestaziån l'é fedelmänt conservè con la prozedûra mâgica dla videoregistraziån, e an é brîṡa sepolté int al pasè. Gnínt a s vieta ed pinsèr che tra quèlch milêni äli imâgini e discûrs di quèl t î fât i séppen eṡibé in un muṡèo eletrånich dal futûr... (csa vål dîr un muṡèo eletrånich? quall ch'a i ò scrétt l'é una banalitè imèna; l'eletrånica l'é atuèl incû cme al motåur a vapåur al l êra int al sêcol pasè; tra miglièra d'ân...) ...o piotåst, in un muṡèo mentèl, qualsîasi cåsa st'invenziån la psrà èser. Gnínt a s vieta difâti d'imaginèr ch'in un imprecîṡ futûr tótt quall che int al pasè al fó scrétt, cantè, sunè, raiṡ in imâgini, al påsa èser direttamänt acesébbil ala mänt d'ognón mediànt al sål eṡercézzi dla så intenziån. In ètri parål, mediànt têcniche par nuèter atualmänt inimaginâbil (cme inimaginâbil certamänt äli fónn äli têcniche informâtichi ai abitànt dal mêdi êvo), una persåna la psrà "vàdder" direttamänt int al så zarvèl qualsîasi film al séppa mâi stè żirè, sintîr qualsîasi canzåna chiónqued al âbia mâi cantè, adiritûra "vîver", in modalitè a nuèter ancåura ignåti, avenimänt avgnó sêcol prémma. Quant a stâg diänd an é bèle adès gnínt ed tröp straordinèri, quand i progrès int al svilóp däli têcniche ed realtè virtuèl äli lâsen preṡagîr l'inauguraziån d'un'êra d'eṡistänza anc interamänt fitézzia bèle par l'inézzi dal prôsim sêcol, ważvàira tra manc d'un decåni. Parché int la stòria umèna la realtè la gh à sänper scavalchè la pió sfrenè däli fantasî, as in psrévv argouîr che qualsîasi ipåteṡi la mänt umèna la påsa imaginèr par al futûr dla nostra spêci, purché brîṡa in totèl contràst con äli pió evidänti däli lażż ed natûra, la séppa destinè brîṡa såul a averères, mo a èser adiritûra scavalchè dai evänt reèl.
L'é quasst un pinsîr dabån intrigànt, chèr Maurizio Costanzo Show. Såul in st'sêcol ård ed scritûr i s entuṡiâṡmen a scrîver ed quall ch'al futûr al ufrirà a l'umanitè. I ṡbagliónn, int i sêcol e int i sêcol pasè, tótti äli persåni pió dòti, mâi prevedänd un futûr sostanzialmänt dṡvêrs dal så preṡänt. I ṡbagliaràn alåra anc tótt i scritûr ed fantasiénza contemporâni, e anc låur, cme i så predecesûr, par difèt? Äli så bèle ed par sé mirabolànti e incredébbil stòri, äli saràn superè da una realtè ancåura pió aluzinànt? Se la lågica an é brîṡa un'opiniån, al srà acsé, anc s'la nostra mänt la s opånga naturalmänt a st'ipåteṡi, an azetänd ch'da quèlch pèrt (in st'câṡ int al "futûr") ai psén èser incågniti ch'äla an påsa avair sätta al så contròl.
T î dånca virtualmänt immortèl, chèr Maurizio Costanzo Show. Quall ch'in té al vén détt al riecheggiarà däli vôlt, qué e là, int äli mänt d'individui ch'i an ancåura da nâser. Cme a nuèter äli arîven äli ṡfochè e accelerè imâgini in biânch e naigher di prémm film d'inézzi sêcol, érti ed protagonésta che da lóng tänp i an zesè d'èser, al farà un dé tenerèza o ètri sensaziån a quelcdón al fât ed guardères äli bidimensionèli sequänz däli tå trasmisiån, ascoltèr i personâg̈ ch'i an vivó in té arvîver cäli ch'äli comparìràn cme äli så asórdi e surpasè conversaziån.
Ai é quèl ed sovranaturèl in tótt quasst. Gnínt ch'in té al capita al svanéss. "Verba volant" as diṡêva una vôlta. Par milêni, äli parål an an brîṡa lasè trâzz. Né i gèst. Tótt al svanêva capitänd. Da adès in pó, par quall ch'at riguèrda, an srà pió acsé. Ògni parolâza ed sgarbi l'é armasta, riproponébbil a l'infiné, giudicâbil e rigiudicâbil fén ala fén di tänp o dl'Òm o di supôrt indóv té, Maurizio Costanzo Show, t î e t srè registrè. Ògni manifestaziån ed belèza, in té e int la tå trasmisiån, an é brîṡa stè efémera, la eṡésta ancåura, e la s manifestarà quand a la richiamarän int al môd opartón. Par al mumänt al môd opartón l'é quall ed rimandèrla in ånda, o arvàddres una caséta registrè. Un dé, cme bèle détt, la psrà bastèr la så såula intenziån. As acedrà ai ricôrd audioviṡîv coletîv con ṡfôrz mentèl afén a chi ch'nuèter normalmänt bèle tótt i dé a druvän par arcurdèr quant a savän. Par chal tänp, l'istruziån la srà fårsi completamänt avólsa dai lébber, che int la fårma odiêrna comónqued an eṡistaràn pió. (Prémma ed tótt parché an eṡistarà pió la cârta. La cârta la vén difâti fâta dai èlber e int al côrs dal prôsim sêcol l'Umanitè la darà probâbilmänt fånd ali ûltmi riṡêrv ed forèst ch'incû ancåura äli reṡésten e ògni tîp d'èlber al scumparirà par sänper dala têra e con låu la cârta. In secånd lågh la cârta di lébber atualmänt eṡistänt la s srà spontaneamänt decompåsta, parché acsé la fa la cârta: la aspèta par un påch che quelcdón la lêż, dåp discretamänt la s decompån dåp påchi centinèra d'ân al mâsim, scumparänd insàmm ali parål så inquilén'ni.) La cultûra la costituirà int la capacitè ed truvèr, int al ṡmiṡurè database ed tótt al scibil digitalizè (o altrimänti registrè), informaziån, imâgini e corelaziån ed documänt. Al scibil digitalizè (cme a mé adès am pièṡ ciamèrel), al srà in un zêrt säns un ambiänt mentèl, un ambiänt imäns e complès. La diferänza tra l'ignorànt e la persåna cålta la srà dè dala miåura o pîṡ acuiṡiziån däli têcniche necesèri a districhères in låu. I pió inteligänt i impèraràn têcniche pió complèsi. La srà, cla ed cui adès confuṡamänt a sän fantastichänd, inevitabilmänt un'eṡistänza pretamänt mentèl. Quasst an srà comónqued par gnínt una pêrdita. Quant a s capitarà o a s parrà capitères, a s parrà a tótt i efèt reèl e dånca ed fât al al srà. Anc malatî e môrt äli saràn purtråp reèli pûr an eṡändel. Quall ch'al zarvèl l'é fermamänt cunvént ch'ai séppa capitänd, efetivamänt ai capita, comprais la môrt (dura lex, sed lex psicosomaticae). Mo i vantâg̈ ed sta societè mentèl ventûra i saràn eclatànt: l'èser umàn al trascendrà par l'enêṡima vôlta i så lémit precedänt, mantgnänd äli så pasiån, i så vézzi animèl e târe genêtichi inquadrè in un nåv sofistichendéssum sistêma che int la nostra imaginaziån adès confuṡamänt al pèr cme impossébbil e misteriåuṡ (cme impossébbil e misteriåuṡ al parrévv al nåster atuèl sistêma ed vétta a l'Òm Medievèl), mo che ai Òmen e Dòni dal futûr al parrà sänplizemänt - cme sänper l'é stè dåp ògni gradén ed svilóp - normèl, scontè, e anc noiåuṡ. Chèr Maurizio Costanzo Show, la mî oraziån odiêrna al cospèt tå l'é terminè. Armétt i mî concèt ai pòster opûr nå e acsé séppa.

Roberto Quaglia