t’adduni ca si’ virtualmenti immurtali? Dicu "virtualmenti" pi nun la fari troppu fora dû bulaccu. Ma tuttu chiddu ca ’n tia succedi nun scumpari succidennu, comu succedi ê fenòmini clàssici. Ogni istanti dâ tò manifestazioni è fidilmenti cunsirvatu câ prucèdura màgica dâ videoregistrazioni, e nun è atterratu ntô passatu. Nenti ni vieta di pinsari ca tra certi millenni li immagini e discursi di cui cunsisti sianu esibìuti ’n nu museu elettrònicu dû futuru... (chi voli diri nu museu elettrònicu? chiddu ca aju scrittu è ’na banalità immani; l’elettrònica è attuali oggi comu lu muturi a vapuri lu era ntô sèculu passatu; fra migghiara di anni...) ...o cchiù prestu, ’n nu museu mintali, qualsiasi cosa sta ’mminzioni putirà essiri. Nenti ni vieta defatti di immaginari ca ’n nu ’mprecisatu futuru tuttu chiddu ca ’n passatu fu scrittu, cantatu, sunatu, risu ’n immagini, possa essiri direttamenti accessibbili â menti di ognunu pû sulu esercizziu dâ propria ’ntinzioni. ’N àutri paroli, pî tècnichi pi nuiautri attualmenti ’nimmaginabbili (comu ’nimmaginabbili certamenti fùru li tècnichi informatichi ê abitanti dû mediu evu), ’na pirsuna putirà "vidiri" direttamenti ntô sò ciriveddu qualsiasi film sia mai statu giratu, sentiri qualsiasi canzuna cu’ sia àbbia mai cantatu, addirittura "vìviri", ’n modalità a nuiautri ancora ’gnoti, avvinimenti succissi sèculi prima. Quantu staju dicennu nun è già ora nenti di troppu straurdinariu, quannu li prugressi ntô sviluppu dî tècnichi di realtà virtuali làssanu prisagiri l’inaugurazioni di ’na era di esistenza puru ’nteramenti fittizia già pi l’accuminzu dû sèculu ca veni, cioè fra menu di nu dicenniu. Pirchì ntâ storia umana la realtà havi sempri scavarcatu la cchiù sfrinata dî fantasìi, si ni putissi arguìri ca qualsiasi ipòtisi la menti umana possa immaginari pû futuru dâ nostra speci, purchì nun ’n tutali cuntrastu cî cchiù evidenti dî leggi di natura, sia distinata nun sulu a s’avvirari, ma a essiri addirittura scavarcata dî eventi reali.
È chistu nu pinseru daveru intrigganti, caro Maurizio Costanzo Show. Sulu ’n stu sèculu ordi di scritturi s’intusiàsmanu a scriviri di chiddu ca lu futuru uffrirà a l’umanità. Sbagghiàru, ntê sèculi e ntê sèculi passati, tutti li pirsuni cchiù dotti, mai privvidennu nu futuru sustanzialmenti diversu dû sò prisenti. Sbagghirannu allura puru tutti li scritturi di fantascienza cuntimpuranei, e puru iddi, comu li sò pridicissuri, pi difettu? Li sò storii già di pi sé mirabbulanti e ’ncredìbbili, sarannu superati di ’na realtà ancora cchiù allucinanti? Si la lògica nun è ’na opinioni, sarà accussì, puru si la nostra menti s’opponi naturalmenti a sta ipòtisi, nun accittannu ca di quarchi parti (’n stu casu ntô "futuru") ci pòzzanu essiri ’ncògniti ca idda nun possa aviri sutta lu sò cuntrollu.
Si’ accussì virtualmenti immurtali, caro Maurizio Costanzo Show. Chiddu ca ’n tia veni dittu riecheggirà quarchi vota, ccà e ddà, ntê menti di individui ca hannu ancora di nàsciri. Comu a nuiautri arrìvanu li sfucati e accelerati immagini ’n jancu e niru dî primi film di accuminzu sèculu, chini di prutagunisti ca di longu tempu hannu finutu di essiri, farà nu jornu tinnirizza o àutri sinsazioni a quarchidunu lu fattu di si taliari li bidimensiunali sequenzi dî toi trasmissioni, ascutari li pirsunaggi ca hannu vissutu ’n tia rivìviri chiddi ca appararannu comu li sò assurdi e surpassati cunvirsazioni.
C’è quarchi cosa di suprannaturali ’n tuttu chistu. Nenti ca ’n tia succedi scumpari. "Verba volant" si dicia nu tempu. Pi millenni, li paroli nun hannu lassatu tracci. Nè li gesti. Tuttu scumpariva succidennu. D’ora ’n poi, pi chiddu ca ti riguarda, nun sarà cchiù accussì. Ogni malaparola di sgarbi è ristata, ripruponibbili a l’infinitu, giudicabbili e rigiudicabbili fina â fini dî tempi o di l’Omu o dî supporti unni tu, Maurizio Costanzo Show, si’ e sarrai registratu. Ogni manifestazioni di biddizza, ’n tia e ntâ tò trasmissioni, nun è stata effímira, esisti ancora, e si manifistirà quannu la richiamiràmu ntô modu opportunu. Pû mumentu lu modu opportunu è chiddu di la rimannari ’n onda, o si rividiri ’na cassetta registrata. Nu jornu, comu già dittu, putirà abbastari la propria sula ’ntinzioni. S’accidirà ê ricordi audiovisivi cullittivi cu sforzi mintali àffini a chiddi ca nuiautri nurmalmenti già tutti li jorna adupiramu pi arricurdari chiddu ca sapemu. Pi ddu tempu, l’istruzioni sarà fòrsi cumplitamenti avulsa dî libbra, ca ntâ forma d’oggi comunqui nun esistirannu cchiù. (Prima di tuttu pirchì nun esistirà cchiù la carta. La carta veni defatti fatta dî arvuli e ntô corsu dû sèculu ca veni l’Umanità darà prubbabbilmenti funnu ê últimi riservi di furesti ca oggi ancora resìtinu e ogni tipu di arvulu scumparà pi sempri dâ terra e cu iddu la carta. ’N secunnu locu la carta dî libbra attualmenti esistenti si sarà spuntaneamenti dicumposta, pirchì accussì fa la carta: aspetta pi nu pocu ca quarchidunu la leggi, po’ discretamenti si dicumponi doppu pochi cintinara di anni ô màssimu, scumparennu ’nsemi cî paroli sò inquiline.) La cultura custituirà ntâ capacità di truvari, ntô smisuratu database di tuttu lu scibbili digitalizzatu (o sinnò registratu), infurmazioni, immagini e currilazioni di documenti. Lu scibbili digitalizzatu (comu a mia ora piaci lu chiamari), sarà ’n nu certu sensu n’ambienti mintali, n’ambienti immensu e cumplessu. La diffirenza tra l’ignuranti e la pirsuna colta sarà data dâ megghiuri o peggiuri acquisizioni dî tècnichi nicissarii a si districari ’n iddu. Li cchiù ’ntilligenti ’mparirannu tècnichi cchiù cumplessi. Sarà, chidda di cui ora cunfusamenti stamu fantasticannu, inevitabbilmenti ’na esistenza prittamenti mintali. Chistu nun sarà comunqui pi nenti ’na pèrdita. Quantu ni succidirà o ni parrà di ni succediri, ni parirà a tutti li effetti reali e accussì di fattu lu sarà. Puru malatii e morti sarannu purtroppu reali puru nun lu essennu. Chiddu ca lu ciriveddu è fermamenti cunvintu ca ci sta succidennu, effettivamenti ci succedi, cumprisa la morti (dura lex, sed lex psicosomaticae). Ma li vantaggi di sta sociità mintali vintura sarannu eclatanti: l’essiri umanu trascindirà pi l’ennèsima vota li propri limiti pricèdenti, mantinennu li propri passioni, li propri vizzi animali e tari genètichi inquadrati ’n nu novu sofisticatissimu sistema ca ntâ nostra immaginazioni ora cunfusamenti appari comu impussibbili e misteriusu (comu impussibbili e misteriusu apparìa lu nostru attuali sistema di vita a l’Omu Medievali), ma ca ê Omini e Fimmini dû futuru apparà semplicimenti - comu sempri è statu doppu ogni gradinu di sviluppu - nurmali, scuntatu, e puru nuiusu. Caro Maurizio Costanzo Show, la mia urazioni d’oggi davanti a tia è finìuta. Rimetti li mei cuncetti ê pòstiri oppuru no e accussì sia.

Roberto Quaglia