esiste inte'l nostro paese do Italie. No sto parlando de la division tra Nord e Sud. De questo i parla za tuti i altri e nissun dize gnente de novo. Sto parlando de do società italiane parałele, che le convive inte le menti de tuti i italian. Una la xe la clàssica "Società Italiana", che ognun el pol vìver con la so esperiensa direta. I so afeti, el so lavoro o la so disocupasion, ovaro le relasion direte con i altri èseri umani. La xe na società de un tipo che la esiste da quando esiste l'Omo, parché l'Omo el xe un animal sosial.
L'altra la xe queła che mi ciamo "la Società Televisiva Italiana".
La Società Televisiva Italiana la xe prima de tuto fata da un picolo sìrcolo de indivìdui, che i fa la pì alta de le caste indove la xe divisa la Società Italiana. La Società Televisiva Italiana la xe però asè pì de na casta. Eła la xe par esenpio El Grando Pignaton Indove Boje Tuti i Miti. La xe anca un saco de altre robe, e col tenpo sercaremo de méterghene a fogo el pì nùmero che se pol.
La Società Televisiva Italiana la xe viva inte i sarvèli de tuti noaltri italian. Anca se i sitadini comuni, che no i conpar mai su'l video, no i ne fa parte a pien tìtolo, i ne fa isteso parte a tìtolo pì picolo. Come ogni altra società, la Società Televisiva Italiana la pol èser paragonà a un organismo; i protagonisti del video i ne xe el sarvèło con tante face, i milioni de telespetatori i ne xe el groso e potente corpo. Corpo e sarvèło i xe tacà streto. Par esìster, ognun el ga bisogno de l'altro.
Tuti i miti che'l sarvèło uman el se ga senpre sibà par méterse in mezo a la vita, i vien ancuo sortìi fora del calderon de la Società Televisiva Italiana. Inte la Società Televisiva Italiana no ghe xe soło i nostri personaji, i mikebongiorno, i emiliofede, i giulioandreotti. Ghe xe col steso tìtolo personaji forestieri, i stallonerambo, i boriseltsin, i billclinton, i mickjagger. I personaji forestieri i fa quasi senpre anca parte de Società Televisive Forestiere, e par sto motivo, inte l'imaginario coletivo, i val de pì.
Tuti i protagonisti de la Società Televisiva Italiana i xe se capisse dei miti. Qualcuni i xe miti positivi, altri i xe miti negativi. Qualcuni i inpersona el mito de la tranquilità, altri queło de la smania. Ma nissun de lori el pol schivar el ruolo de mito. Come par i antichi miti inte la società clàssica, ognun de lori el esiste inte la Società Televisiva Italiana par inpersonar na funsion ben presisa. Inte l'esistensa de ognun de lori el sitadin comun siegamente el crede, anca se no'l ga mai vù la prova serta de un contato personal. Quanti, in mezo a 50 milioni de telespetatori, el ga mai incontrà sgarbi de persona, cussì acertando che sgarbi el esiste davero, che'l ga un riscontro anca inte la Società Italiana, fora che inte la Società Televisiva Italiana? Se crede ancuo a l'esistensa de sgarbi come na volta se credeva a l'esistensa de odino. Vivemo inte l'època pì mitològica che l'umanità la ga mai provà. El mito el xe cussì in mezo, inte'l mondo de deso, che no par caso el lenguajo dei zóveni el se ga ciapà la parola, soło in aparensa banalizàndone el significà. Quando la tosatela la dize che vascorossi el xe un mito, la dize la verità.
Inte la Società Italiana no se pol far de manco de la Società Televisiva Italiana. El xe pì messo da parte un fioło che no'l sa come che i parla i puffi o chi i xe i tartarugheninja che un fioło "diverso" al modo de na volta. Un omo grando che no'l sia agiornà su'l canpionato de balon el xe suspeto. Se po' sto omo grando el tentena a dir un so judisio sora sgarbi, el nùmero de le persone con cui el pol parlar el sìsola par tera. Anca no conòser i spot publicitari el pol èser periculoso quando no persin fatal. La xe pràtica senpre pì speso queła de méter in mezo, tra un discorso e l'altro, el slogan de un spot publicitario. El ricordar un slogan el diventa anca volentiera strumento de risada. Se a la fine, par colmo de azardo, el nostro suposto omo grando el volesse sostegnir in pùblico de no gaver gnanca na mìnima idea chi'l sia mikebongiorno, né de averne mai sentìo nominar el nome, el saria vardà no diverso da come se varda un mato che no se ricùpera, o ancora pezo, un erètico.
La gran parte de queło che se dize tra i italian de deso, par motivi che i sta fora de le fadighe de lavoro, el riguarda de streto la Società Televisiva Italiana. Pì speso de quando uno el se mete in contato con le so amisisie (inte la Società Italiana), uno el se mete in contato con la Television (ovaro la Società Televisiva Italiana), inpisàndola.
Aver suceso inte la vita, ovaro inte la Società Italiana, el xe infinitamente manco prestigioso che aver suceso a la Television, ovaro inte la Società Televisiva Italiana.
La Società Televisiva Italiana, inte la comun scala dei valori, la xe donca asè pì inportante de la Società Italiana. No par caso el xe asè difìsile rivar a farne parte a pien tìtolo, e el xe de fato questo uno dei prinsipali sogni e anbision de senpre pì italian. Conparir a la Television, inte'l mondo osidental de deso, la xe oramai diventà n'esperiensa màstica a tuti i efeti, come analizaremo inte una de le pròsime létere.
Par ancuo el xe tuto, caro Maurizio Costanzo Show, sublime e mèjo sìnbolo de la Società Televisiva Italiana.

Roberto Quaglia