mi me revolzo a ti, con un ategiamento sìmile a chi - in altri tenpi o in altri posti - se revolze a la divinità, o a chi - in altri tenpi o in altri posti - se revolze al confesor o al psicanalista o al re o al presidente o al capotribù o al partìo o a Satanaso. Me revolzo a ti parché, fora de definision pì ciare, ti pol èser visto come el mèjo enblema de n'entità che oramai no se pol far de manco inte la società italiana: la Television.
Me revolzo cussì a ti dàndote l'identità che pì me convien dar. Parlarò con ti fasendo finta con mi steso che ti me scolti, e el saver che no xe cussì no'l me darà fastidio, parché la verità so benìssimo che ti no ti sì queło che par comodità mi fasso finta con mi steso che ti sì.
Caro Maurizio Costanzo Show, cosa xetu, alora? Parché ti sì inportante? Ma... ti sì inportante? Beh, in Italia tuti quanti i parla speso de ti, e anca se la semàntica la xe n'opinion, ne vien che ti sì inportante. Cosa xetu alora? Ti sì un programa televisivo? Sensa dubio sì. El saria coraioso negarlo. Ma ti sì davero soło un programa televisivo? Se ti fussi davero soło un programa televisivo, in Italia no se parlaria cussì asè de ti, e ti no ti saressi cussì inportante. Dopotuto, la Television italiana (con i sento so programi locali o nasionali) la xe par el 99% piena de programi televisivi che no i xe el Maurizio Costanzo Show, la vita vera de ognun de noaltri la xe teoricamente fata par pì del 99% de fati che no i xe televisivi, e anca cussì ti ga un posto de rilievo inte la mente de la major parte dei sitadini italian, e ti diventi persin n'entità che no se pol far de manco quando se pensa e se discute sora tanti e tanti argomenti. Cosa xetu, donca? El xe queło che sercarò de descovrir inte sta me létera, e soratuto inte quełe che vegnarà inti zorni e inti mesi che vien, ovaro inte le altre pàgine de sto contenitor.
Come ti vedi, caro Maurizio Costanzo Show, mi te go ciapà come sìnbolo par parlar con mi steso, almanco fin a quando qualchedun el me scoltarà. Podevo butar zo ste parołe dopo la intestasion "Caro Diario..." o dopo aver dito un mantra religioso che'l me verzesse a n'esperiensa màstica o dopo aver messo d'acordo con un psicanalista el preso de la so prestasion de star a scoltar el butar-zo dei me pensieri.
Invese go sielto ti.
No la xe na casualità. La xe na decision che no se pol evitar, sortìa dal capir la to modernità a paragon de le altre categorie sinbòliche (Padreterno ecc.), dal riconòser la forsa sinbòlica a cui no se resiste che ti ga ciapà de colpo inte'l cuor de la società italiana.
Caro Maurizio Costanzo Show, ti no ti sì na persona, no ti sì Maurizio Costanzo (l'omo che'l te ga creà e batezà), no ti sì l'inpiegà o el funsionario che'l leze ste létere al Maurizio Costanzo Show col dover de sièlzer, filtrar, butar inte la scoassa. Ti sì la Divinità Moderna, el Totem del Vilajo, el Saserdote del Real.
No le vol èser queste - le mie - soło parołone grose che fa efeto. Inte le létere che vegnarà, ndarò a fondo inti significà che le tien sarà drento. Ma no lo farò con la ponpa acadèmica de chi el ga i tìtoli e le càtedre che ghe fa lècita e dovùa la mostra de ponpa acadèmica. No so ancora come lo farò, ma lo farò a modo mio, qualunque cosa sta frase la voja dir. Drio a le me parołe ghe xe un indivìduo sensa tìtoli acadèmici, sensa studi sistemàtici, sensa nissuna entrada (par no parlar de integrasion) inte la società del saver, sensa na mentalità piena de sertese nosionìstiche, de dogmi religiosi o sientìfici. Scampo da la consolante pràtica de far senpre e soło i stessi sentieri de la mente, de inamorarse de le opinion, che le sia dei altri o le so. Con le opinion me piaze soło far l'amor pian, lassàndole quando ai me oci le par vece, tegnendo de fato l'opinion (propio cussì) che le opinion raramente le xe qualcosa de sertamente vero, senò le ciamaria "dati de fato" e no opinion, e i òmeni no i se metaria in guera inte le speso patetiche prove de far vìnser le une (de sòlito le so) sora le altre (de sòlito quełe dei altri).
Cosa son mi alora?
Son, prima de tuto, le parołe che sona inte la mente de chi sta lezendo o sta sentendo lèzer ste righe. Son, secondo, le imàgini che qualcuni de queli che sta lezendo ste righe i se ga fato o i se sta fasendo de mi. Son, terso, la soma de imàgini e ricordi e metàfore con le quali mi steso fasso saver soło a mi steso queło che mi son, son stà in pasà e me piaseria èser el zorno che vien.
Masa intrigà? No te intrigar, caro Maurizio Costanzo Show, ti vè asè pì in là de la sénplicità che pur te sofega, e no ghe xe gnente che riguarda le fadighe umane che ti no ti posa tegnir drento de ti e che ti no ti tegnarà. El to ruolo, in mezo e groso asè, el xe el to destin.
Inte'l momento che mi me revolzo a ti, ti za me tien drento de ti, caro Maurizio Costanzo Show, ti me tien anca se no ti ga ancora dà a questo na pùblica voze, mando la me imàgine e le me parołe inte tute le case italiane. Ti me tien parché mi son entrà drento de ti con sta létera, cussì come el religioso el se lega al so Dio con la preghiera.
Deso che el neso el xe messo, caro Maurizio Costanzo Show, rivo a la fine de sta prima létera. Tante altre vegnarà, una al zorno (vera o che par), fin a quando tuti i argomenti che me piaserà dir no i sarà stà dii fora. La soma de le létere la farà un libro. Zorno drio zorno te mando tute le létere, e a la fine te mando anca el libro. Par via vera e par via virtual. Par posta e par Internet. Un càrego de significà indirisà a ti e, par conossensa, a l'umanità.

Roberto Quaglia