esisten in del noster paes doe Italie. Sto minga parland de la division tra Nord e Sud. De quest parlen giamò tütt i alter e nissün el dis nagott de nœuv. Sto parland de doe società italiann paralel, che convìven in di ment de tütt i italian. Vüna l'è la clàssica "Società Italiana", che ognidun el pö viv con la soa esperienza diretta. I sò afett, el sò lavor o la soa disocupazion, ovèro i relazion dirett con i alter vess üman. L'è ona società de on tipo che esist de quand esist l'Òmm, perché l'Òmm l'è on animal social.
L'altra l'è quela che mì ciami "la Società Televisiva Italiana".
La Società Televisiva Italiana l'è primma de tütt fada de ona piscinina cerchia de individü, che fann la pussee alta di cast indove l'è spartida la Società Italiana. La Società Televisiva Italiana l'è però assee pussee de ona casta. Lee l'è per esempi El Gross Pignaton Indove Bójen Tütt i Mit. L'è anca on sacch de alter robb, e col temp cercaremm de mètenn a fœugh el pussee nümer che se pö.
La Società Televisiva Italiana l'è viva in di cervei de tütt nün italian. Anca se i citadin comün, che compàren mai sül video, ne fann minga part a pien titol, ne fann istess part a titol pussee piscinin. Come ogni altra società, la Società Televisiva Italiana la pö vess paragonada a on organismo; i protagonista del video ne hinn el cervell con tanti faccia, i milion de telespettator ne hinn el gross e potent corp. Corp e cervell stann tacaa strengg. Per esist, ognidun el gh'ha bisogn de l'alter.
Tütt i mit che el cervell üman el s'è semper cibaa per mètes in mezz a la vita, vègnen incoeu sortii foeura del calderon de la Società Televisiva Italiana. In la Società Televisiva Italiana ghe hinn minga domà i nòster personagg, i mikebongiorno, 'e emiliofede, 'e giulioandreotti. Ghe hinn col stess titol personagg forestee, i stallonerambo, 'e boriseltsin, 'e billclinton, 'e mickjagger. I personagg forestee fann quasi semper anca part de Società Televisiv Forestee, e per sto motiv, in l'imaginari coletiv, vàlen de pü.
Tütt i protagonista de la Società Televisiva Italiana hinn se capiss di mit. Certün hinn mit positiv, alter hinn mit negativ. Certün impersònen el mit de la tranquillità, alter quell de la smania. Ma nissün de lor el pö scansà el roeul de mit. Come per i antich mit in la società clàssica, ognidun de lor el esist in la Società Televisiva Italiana per impersonà ona funzion ben precisa. In la esistenza de ognidun de lor el citadin comün ciecament el cred, anca se el gh'ha mai avüü la prova certa de on contatt personal. Quanti, in mezz a 50 milion de telespettator, el gh'ha mai incontraa sgarbi de persòna, inscì aprovand che sgarbi el esist denver, che el gh'ha on riscontr anca in la Società Italiana, foeura che in la Società Televisiva Italiana? Se cred incoeu a l'esistenza de sgarbi come ona voeulta se credeva a l'esistenza de odino. Campemm in l'època pussee mitològica che l'ümanità la gh'ha mai provaa. El mit l'è inscì in mezz, in del mond de adess, che minga per cas el lenguagg di gioven el s'è ciapaa la parola, domà a l'apparenza banalizzàndonn el significaa. Quand la tosanella la dis che vascorossi l'è on mit, la dis la verità.
In la Società Italiana se pö minga fànn a men de la Società Televisiva Italiana. L'è pussee miss de part on fioeu che el sa minga come parlen i puffi o chi hinn i tartarugheninja che on fioeu "different" al mœud de ona voeulta. On òmm grand che el sia minga agiornaa sül campionaa de balón l'è suspett. Se poeu sto òmm grand el tentenna a dì on sò giüdizi sora sgarbi, el nümer di persònn con chi el pö parlà el sghija in terra. Anca a conoss minga i spot pubblicitari el pö vess periculos quand minga perfin fatal. L'è pràtica semper pussee spess quela de mett in mezz, tra on discors e l'alter, el slogan de on spot pubblicitari. El regordà on slogan el diventa anca volentera strüment de risada. Se a la fin, per colm de azzard, el noster sopost òmm grand el voress sostegnì in püblich de gh'avè nanca ona minima idea chi el sia mikebongiorno, né de avènn mai sentii nominà el nòm, el saría vardaa minga different de come se varda on matt che el se ricùpera minga, o ancamò pesg, on erètich.
La gran part de quell che se dis in mezz ai italian de adess, per motiv che stann foeura di fadigh de lavor, la riguarda strengg la Società Televisiva Italiana. Pussee spess de quand vün el se met in contatt con i sò amicizie (in la Società Italiana), vün el se met in contatt con la Television (ovèro la Società Televisiva Italiana), impizzàndola.
Avè sucess in la vita, ovèro in la Società Italiana, l'è infinitament men prestigios che avè sucess a la Television, ovèro in la Società Televisiva Italiana.
La Società Televisiva Italiana, in la comün scala di valor, l'è donca assee pussee important de la Società Italiana. Minga per cas l'è assee difficil rivà a fànn part a pien titol, e l'è de fatt quest vün di principai insogni e ambizion de semper pussee italian. Comparì a la Television, in del mond occidental de adess, l'è oramai diventaa on'esperienza màstica a tütt i efett, come analizzaremm in vüna di pròssim letter.
Per incoeu l'è tütt, car Maurizio Costanzo Show, sublim e mej sìmbol de la Società Televisiva Italiana.

Roberto Quaglia