esìstono dint'ô paese nuosto duje Italie. Nun sto parlanno d''a spartenza tra Nord e Sud. 'E chesto pàrlano già tutte ll'ate e nisciuno dice niente 'e nuovo. Sto parlanno 'e duje società taliane parallele, ca cunvìveno dint'a ll'amménte 'e tutte 'e taliane. Una è 'a clàsseca "Società Taliana", ca ognuno po' vìvere cu ll'esperienza soja deritta. Ll'affette suoje, 'o lavoro suo o 'a disoccupazione soja, ovèro 'e relazione deritte cu ll'ate essere umane. È 'na società 'e 'nu tipo ca esiste 'a quanno esiste ll'Ommo, pecché ll'Ommo è 'n animale sociale.
Ll'ata è chella ca io chiammo "'a Società Televisiva Taliana".
'A Società Televisiva Taliana è primma 'e tutto fatta 'a 'na piccola cerchia 'e individue, ca fanno 'a cchiù auta 'e 'e caste addó sta spartuta 'a Società Taliana. 'A Società Televisiva Taliana è però assaje cchiù 'e 'na casta. Essa è pe esempio 'O Gruosso Pignatone Addó Vólleno Tutte 'E Mite. È pure 'nu sacco 'e ate cose, e cu 'o tiempo cercarrammo 'e ne mèttere a fuoco 'o cchiù nùmmero ca se po'.
'A Società Televisiva Taliana sta viva dint'a 'e cerville 'e tutte nuje taliane. Pure si 'e cittadine cummune, ca nun cómpàreno maje ncopp'ô video, nun ne fanno parte a pieno tìtulo, ne fanno 'o stesso parte a tìtulo cchiù piccolo. Comme ogne ata società, 'a Società Televisiva Taliana po' essere paragunata a 'n organismo; 'e prutagunista d''o video ne sò 'o cerviello cu tante facce, 'e meliune 'e telespettature ne sò 'o gruosso e putente cuorpo. Cuorpo e cerviello stanno attaccate stritto. Pe esìstere, ognuno tène abbisuogno 'e ll'ato.
Tutte 'e mite ca 'o cerviello umano s'è sempe cibato pe se mèttere 'mmiezo â vita, vénono oje sciute fora d''o calderone d''a Società Televisiva Taliana. Dint'â Società Televisiva Taliana nun ce stanno sulo 'e persunagge nuoste, 'e mikebongiorno, 'e emiliofede, 'e giulioandreotti. Ce stanno cu 'o stesso tìtulo persunagge furastiere, 'e stallonerambo, 'e boriseltsin, 'e billclinton, 'e mickjagger. 'E persunagge furastiere fanno quase sempe pure parte 'e Società Televisive Furastiere, e pe stu mutivo, dint'a ll'immaginario cullettivo, vàleno 'e cchiù.
Tutte 'e prutagunista d''a Società Televisiva Taliana sò se capisce 'e mite. Certune sò mite pusitive, ate sò mite negative. Certune 'mpèrzonano 'o mito d''a tranquillità, ate chillo d''a smania. Ma nisciuno 'e lloro po' scanzà 'o ruolo 'e mito. Comme pe ll'antiche mite dint'â società clàsseca, ognuno 'e lloro esiste dint'â Società Televisiva Taliana pe 'mpèrzonà 'na funzione bona precisa. Dint'â esistenza 'e ognuno 'e lloro 'o cittadino cummune ciecamente crede, pure si nun ha maje avuto 'a prova certa 'e 'nu cuntatto personale. Quante, 'mmiezo a 50 meliune 'e telespettature, ha maje 'ncuntrato sgarbi 'e perzona, accussì appuranno ca sgarbi esiste overamente, ca tène 'nu riscontro pure dint'â Società Taliana, fora ca dint'â Società Televisiva Taliana? Se crede oje a ll'esistenza 'e sgarbi comme 'na vota se credeva a ll'esistenza 'e odino. Campammo dint'a ll'època cchiù mitològeca ca ll'umanità ha maje pruvato. 'O mito è accussì 'mmiezo, dint'ô munno 'e mò, ca nun pe caso 'o lenguaggio d''e guagliune s'è pigliato 'a parola, sulo a 'o pare banalizzànnone 'o significato. Quanno 'a guagliuncella dice ca vascorossi è 'nu mito, dice 'a verità.
Dint'â Società Taliana nun se po' fa a meno d''a Società Televisiva Taliana. È cchiù miso 'a parte 'nu criaturo ca nun sape comme pàrlano 'e puffi o chi sò 'e tartarugheninja ca 'nu criaturo "divèrzo" a 'o muodo 'e na vota. 'N ommo gruosso ca nun sia aggiurnato ncopp'ô campionato 'e pallone è suspietto. Si po' chist'ommo gruosso tentenna a dìcere 'nu giudizio suoje 'ncoppa a sgarbi, 'o nùmmero d''e perzone cu chi po' parlà sciulìa nfaccia 'n terra. Pure a nun cunóscere 'e spot pubblicitarie po' essere periculuso quanno nun perzìno fatale. È pràteca sempe cchiù spisso chella 'e mèttere 'mmiezo, tra 'nu discurzo e ll'ato, 'o slogan 'e 'nu spot pubblicitario. 'O ricurdà 'nu slogan addiventa pure vulentiere strumento 'e risata. Si â fine, pe culmo 'e azzardo, 'o nuosto suppunuto ommo gruosso vulesse sustené 'mpubbreco 'e nun tené manco 'na minima idea chi sia mikebongiorno, né 'e averne maje sentuto annummenà 'o nomme, sarrìa guardato nun divèrzo 'a comme se guarda 'nu pazzo ca nun se ricupera, o ancora peggio, 'n erètico.
'A gran parte 'e chello ca se dice 'mmiezo a 'e taliane 'e mò, pe mutive ca stanno fora d''e fatice 'e lavoro, riguarda stritto 'a Società Televisiva Taliana. Cchiù spisso 'e quanno uno se mette 'n cuntatto cu ll'amicizie soje (dint'â Società Taliana), uno se mette 'n cuntatto cu 'a Televisione (ovèro 'a Società Televisiva Taliana), appicciànnola.
Avé successo dint'â vita, ovèro dint'â Società Taliana, è 'nfinitamente meno prestiggiuso ca avé successo â Televisione, ovèro dint'â Società Televisiva Taliana.
'A Società Televisiva Taliana, dint'â cummone scala d''e valure, è dunque assaje cchiù 'mpurtante d''a Società Taliana. Nun pe caso è assaje difficile arrivà a ne fa parte a pieno tìtulo, e è defatte chesto uno d''e principale suonne e ambizione 'e sempe cchiù taliane. Cómparé â Televisione, dint'ô munno occidentale 'e mò, è ormaje addiventata 'n esperienza màsteca a tutte ll'effette, comme analizzarrammo dint'a una d''e prossime lettere.
Pe oje è tutto, caro Maurizio Costanzo Show, sublime e meglio sìmbulo d''a Società Televisiva Taliana.

Roberto Quaglia