par quanto ti la vardi da tute le parti, questa la xe propio na létera che te xe rivà, visto che ti la stè lezendo. Te la go scrita mi. Mi son un èser uman o pressapoco. El me nome el xe za scrito da tute le parti e alora no lo repeto anca inte la létera. Te aviso che te scrivo na montagna de létere, dopo questa. Te aviso anca che te le mando, senò che létere saria? Te aviso de pì che tute le tante létere che te mando forsi a la fine le diventa anca un libro che publicarò e che'l me farà guadagnar na montagna de schei o almanco asè o comunque qualcoseła. Te aviso anca che te mando ste létere anca par Internet, come ancuo el xe tanto de moda. Spero che i italian no i me copia. Se tuti quanti te scrive cussì tante létere come che go decìso de far mi, chi sa quanti pòvari àlbari i gavarà da doparar par far tuta la carta che ne serve. E anca su Internet, chi sa quanti eletroni i saria sprecà.
Scusa se par che no sapia scrìver con tute le frasi intrigà che xe beło méter inti libri ma anca inte le létere. La verità, un fià lo so far, ma el xe mèjo che lo evita, almanco a la prima. Anca se so che questa la xe na létera (go za preparà anca la busta e el bolo par la version de carta), so anca comunque che'l xe anca el scomensamento de un libro, e anca la prima parte de un montarosso de parołe ndà na volta su Internet par restarghe par senpre. Dopotuto el xe queło che te go apena dito, ovaro scrito. E visto che comunque forsi el xe anca el scomensamento de un libro, mi go pensà che'l gèra mèjo no méterghe sùbito tuta queła roba intrigà con le parołe intrigà che po' la gente no la ghe capisse gnente e la buta via el libro.
Scusème se vago a cao un fià anca a sproposito de gnente.
Vidi, Maurizio Costanzo Show, se sta létera la diventasse davero el scomensamento de un libro, po' forsi qualchedun el lo vede in na libraria col so tìtolo che fa l'ocio (go pensà che ghe vol un tìtolo che fa asè l'ocio) e alora el lo verze par véder se el se lo vol conprar e el leze la prima cosa che ghe capita. Ebén, asè i verze el libro come vien vien, e par lori mi no posso far gnente, ahimè! Me tocava far el libro tuto cussì, come che'l sta deso, che però no xe che me piaza propio asè. Cioè, me piaze, ma no par tuto el libro.
Spero che se capissa qualcosa de queło che sto disendo.
Asè gente invese la verze el libro dal scomensamento o a la fine, par véder se ghe piaze. Beh, par queli che lo verze a la fine ghe pensarò a la fine del libro, che deso el xe un fià presto visto che'l xe apena scomensà. Ma par queli che invese lo verze a la prima, senpre par véder se ghe piaze e se i se lo ga da conprar, alora go pensà de scrìver cussì, un fià a la portada de la gente (Spero de no èser Presuntuoso), sensa tute quełe dificoltà che parché mai i se ga da ndar a sercar in un libro quando uno forsi el voleva soło spassarse justamente? Se po' a qualchedun che sta lezendo no ghe piaze tuto questo, alora el pol provar a vèrzer in mezo al libro, che forsi el sarà un fià diverso e alora el se lo conpra isteso. L'inportante el xe che'l se lo conpra. Se qualchedun el leze ste righe in un libro spià in na libraria, che'l vaga sùbito a la casa a conprarselo, ghe lo consijo mi che son l'autor.
Però ti, Maurizio Costanzo Show, no ti lo sa ancora che questo el xe un libro, parché te xe apena rivà sta létera, che par quanto ti la vardi da tute le parti la xe propio na létera e de sicuro no la pol za èser anca un libro, anca se comunque la xe na roba strana su Internet.
E mi te mando na montagna de létere, una al zorno, sperando che ti ciami anca mi inte la to trasmision che la xe cussì inportante ndarghe, come che i sa tuti quanti.
Sia che ti me ciami o che no ti me ciami, quando le létere le sarà cussì tante che se pol farghe un libro, alora mi go za decìso che ghe fasso un libro, e te mando sto libro par reclamizarlo inte la to trasmision come che fa tuti queli che scrive i libri de suceso. E alora mi penso che ti me invitarà se no ti me gavevi invità prima, o ti me reinvitarà se ti lo gavevi za fato, parché dopotuto questo el xe el primo libro che'l parla drito de ti (o anca "a ti"), e se dopotuto ti ga portà avanti cussì tanti libri che insoma no xe che i gèra tuti cavolavori anca se i gèra senpre asè bełi, de sicuro te farà piaser presentar un libro che'l te riguarda.
Quando alora te mando el me libro za pronto, questa no la sarà pì na létera, ma un libro. Cussì no so se deso ti stè lezendo la létera o el libro o la pàgina de Internet, visto che ste righe le xe inte tuti tre, e mi le scrivo na volta soła.
No butar via sta létera, caro Maurizio Costanzo Show. No xe el primo libro che sto scrivendo. Ghe ne go za scriti almanco sinque ma qua in Italia ghe xe un fià de disordine e alora i xe tuti quanti quasi inèditi. Ma inti paesi lontani invese i me li publica (no so parché) e alora là son za famoso e i me domanda i autògrafi e el me fa tuto cussì asè piaser che go decìso che'l xe mèjo diventar famoso anca in Italia, che la xe pì visin dei paesi lontani. (Se no ti credi che son famoso inti paesi lontani te mando na videocaseta indove se vede che invese lo son).
Deso sero sta me létera zero, spiegando però ancora inte'l pròsimo paràgrafo, par chi no'l ga capìo, queło che anca mi go fato fadiga a capir, ovaro cosa che la xe sta létera, o mèjo sto libro. Scusème se divento pì intrigà. Ste létere le xe (le sarà) pì che altro trace lassà da un solo sarvèło (el mio), fate de sototrace de sarvèli dei altri, misià con parece quintali de bon leàme. Insoma, ghe ne xe par tuti i gusti! Quando ste létere (che intanto che scrivo no le ghe xe, ma intanto che ti lezi forsi za le ghe xe o no) le se sposa par far un libro de carta, le darà al legìtimo e pagante conprador del steso libro, e anca, se capisse, ai amisi scroconi o scroconi e basta, l'ocasion de seguir i solchi de queł sarvèło (che po' el xe senpre el mio), e trovarse inte la so suca dei pensieri che inte la mia se capisse che i xe spuntà, propio quando gèro drio scrìver (miràbile e provida conbinasion!). Ocasion che la gavarà sviluppo anca inte'l siberspasio, indove sto me libro el esisterà par senpre, su Internet, indove le létere che mi te mando le se fa conòser anca a l'umanità a chi ghe interesa. Un solo montarosso de parołe e frasi par tre identità formali diverse. Létera, libro vero, létera-libro virtual. El me lavoro el xe uno e trino. No ghe xe un filo, o forsi ghe sarà - chi lo sa! Le idee le crese selvàdeghe in na mente ben consimà (inte le menti no consimà no crese gnente, ma ghe xe qualche ramaro de plàstica), e inte la so caòtica ma genuina misiotesa le forma a volte paesaji pì interesanti asè de queli che senpre trovemo con superbia mostrà inte le menti anca pregévoli e stimàbili de chi a le so idee el ga inposto le regole de na cresita ordenà e disiplinà. Insoma, semo e sìo avesà a libri ordenà, sequensiali e coerenti. Queło che sto libro o sequensa de létere el xe o el sarà el xe invese na selva sensa educasion. Come na vita interesante.
Fine de la létera zero.

Roberto Quaglia