pe quanto 'a guarde 'a tutte 'e parte, chesta è proprio 'na lettera ca t'è arrivata, visto ca 'a staje liggenno. Te ll'aggio scritta io. Io songo 'n essere umano o pressappoco. 'O nomme mio sta già scritto 'a tutte 'e parte e allora nun 'o repeto pure dint'â lettera. Te avviso ca te scrivo 'na montagna 'e lettere, doppo chesta. Te avviso pure ca te 'e mmanno, sennò che llettere sarriano? Te avviso 'e cchiù ca tutte 'e ttante lettere ca te manno fórzo â fine addivèntano pure 'nu libbro ca pubbrecarraggio e ca me farrà guadagnà 'na montagna 'e denare o almeno assaje o comunque quaccosella. Te avviso pure ca te manno sti lettere pure pe Internet, comme oje è tanto 'e moda. Spero ca 'e taliane nun me còpiano. Si tutte quante te scrìvono accussì tante lettere comme aggio deciso 'e fa io, chi sape quante pòvere àrbere hann'a aduperà pe fa tutta 'a carta ca ce serve. E pure ncopp'a Internet, chi sape quante elettrune jarriano sprecate.
Scusa si pare ca nun saccio scrìvere cu tutte 'e frase 'mbrugliate ca è bello mèttere dint'a libbre ma pure dint'a lettere. 'A verità, 'nu poco 'o ssaccio fa, ma è meglio ca ll'evito, almeno â primma. Pure si saccio ca chesta è 'na lettera (aggio già appriparato pure 'a busta e 'o bollo p''a versione 'e carta), saccio pure comunque ca è pure 'o accumiénzo 'e 'nu libbro, e pure 'a primma parte 'e 'nu muntone 'e parole jute 'na vota ncopp'a Internet pe ce restà pe sempe. Doppo tutto è chello ca t'aggio appena ditto, ovèro scritto. E visto ca comunque fórzo è pure 'o accumiénzo 'e 'nu libbro, io aggio penzato ca era meglio nun ce mèttere sùbbeto tutta chella rrobba 'mbrugliata cu 'e parole 'mbrugliate ca po' 'a gente nun ce capisce niente e jetta 'o libbro.
Scusàteme si vaco a capo 'nu poco pure a sproposito 'e niente.
Vid', Maurizio Costanzo Show, si chesta lettera addiventasse overamente 'o accumiénzo 'e 'nu libbro, po' fórzo quaccheduno 'o vede int'a 'na libbrarìa cu 'o tìtulo suo ca fa ll'uocchio (aggio penzato ca ce vo' 'nu tìtulo ca fa assaje ll'uocchio) e allora 'o arape pe vedé si s''o vo' accattà e legge 'a primma cosa ca lle capita. Ebbè, assaje aràpono 'o libbro comme vène vène, e pe lloro io nun pòzzo fa niente, uhi a me! Me tuccava fa 'o libbro tutto accussì, comme sta mò, ca però nun è ca me piace proprio assaje. Cioè, me piace, ma nun pe tutto 'o libbro.
Spero ca ce capisce quaccosa 'e chello ca sto dicenno.
Assaje gente 'mméce arape 'o libbro 'a ll'accumiénzo o â fine, pe vedé si lle piace. Be', pe chille ca ll'àrapono â fine ce penzarraggio â fine d''o libbro, ca mò è 'nu poco priesto visto ca è appena accummenciato. Ma pe chille ca 'mméce ll'àrapono â primma, sempe pe vedé si lle piace e si s''hann'a accattà, allora aggio penzato 'e scrìvere accussì, 'nu poco â purtata d''a gente (Spero 'e nun essere Presuntuoso), senza tutte chelli difficortà ca pecché maje s'hann'a jì a cercà dint'a 'nu libbro quanno uno fórzo vuleva sulo se spassà giustamente? Si po' a quaccheduno ca sta liggenno nun lle piace tutto chesto, allora po' pruvà a arapì ammiezo ô libbro, ca fórzo sarrà 'nu poco divèrzo e allora s''o accatta 'o stesso. Ll'importante è ca s''o accatta. Si quaccheduno legge sti rrighe dint'a 'nu libbro spiato int'a 'na libbrarìa, vaga sùbbeto â cassa a s''o accattà, ce 'o cunziglio io ca songo ll'autore.
Però tu, Maurizio Costanzo Show, nun 'o ssaje ancora ca chesto è 'nu libbro, pecché t'è appena arrivata chesta lettera, ca pe quanto 'a guarde 'a tutte 'e parte è proprio 'na lettera e 'e sicuro nun po' già essere pure 'nu libbro, pure si comunque è 'na rrobba strana ncopp'a Internet.
E io te manno 'na montagna 'e lettere, una ô juorno, speranno ca chiamme pure a me dint'â trasmissione toja ca è accussì 'mpurtante a ce jì, comme sàpono tutte quante.
Sia ca me chiamme o ca nun me chiamme, quanno 'e lettere sarranno accussì tante ca ce se po' fa 'nu libbro, allora io aggio già deciso ca ce faccio 'nu libbro, e te manno stu libbro pe 'o reclamizzà dint'â trasmissione toja comme fanno tutte chille ca scrìvono 'e libbre 'e successo. E allora io penzo ca tu m'inviterraje si nun m'avive invitato primma, o me reinviterraje si ll'avive già fatto, pecché doppo tutto chesto è 'o primmo libbro ca parla deritto 'e te (o pure "a te"), e si doppo tutto tu haje purtato annanze accussì tante libbre ca 'nzomma nun è ca èrano tutte capolavore pure si èrano sempe assaje belle, 'e sicuro te farrà piacere presentà 'nu libbro ca te riguarda.
Quanno allora te manno 'o libbro mio già pronto, chesta nun sarrà cchiù 'na lettera, ma 'nu libbro. Accussì nun saccio si mò staje liggenno 'a lettera o 'o libbro o 'a pàggina 'e Internet, visto ca sti rrighe ce stanno into tutt'e tre, e io 'e scrivo 'na vota sola.
Nun jettà chesta lettera, caro Maurizio Costanzo Show. Nun è 'o primmo libbro ca sto scrivenno. N'aggio già scritte almeno cinche ma ccà 'n Italia ce sta 'nu poco 'e scuncierto e allora sò tutte quante quase inèdite. Ma int'a paise luntane 'mméce me 'e ppubbrécano (nun saccio pecché) e allora llà songo già famuso e me chiédono ll'autografe e me fa tutto accussì assaje piacere ca aggio deciso ca è meglio addiventà famuse pure 'n Italia, ca sta cchiù vicino d''e paise luntane. (Si nun ce cride ca songo famuso int'a paise luntane te manno 'na videocassetta addó se vede ca 'mméce 'o songo).
Mò chiudo chesta lettera mia zero, spiegànno però ancora dint'ô prossimo paràgrafo, pe chi nun ha capito, chello ca pure io aggio fatto fatica a capì, ovèro ch'è chesta lettera, o meglio stu libbro. Scusàteme si addivento cchiù 'mbrugliato. Sti lettere sò (sarranno) 'o cchiù tracce lassate 'a 'nu solo cerviello ('o mio), fatte 'e sottotracce 'e cerville 'e ll'ate, mmiscate cu parìcchie quintale 'e bbuono lutàmme. 'Nzomma, ce ne sta pe tutte 'e gguste! Quanno sti lettere (ca mèntre scrivo nun ce stanno, ma mèntre tu liegge fórzo già ce stanno o no) se spòsano pe fa 'nu libbro 'e carta, daranno ô leggìtimo e paganno accattatore d''o stesso libbro, e pure, se capisce, a ll'amice scruccune o scruccune e bbasta, ll'occasione 'e seguì 'e ssurche 'e chillu cerviello (ca po' è sempe 'o mio), e truvàrse dint'â cocozza loro 'e penziere ca dint'â mia se capisce ca sò spuntate, proprio quanno stevo a 'e scrìvere (miràbbele e pruvida cumbinazione!). Occasione ca avarrà sviluppo pure dint'ô cibberspazio, addó stu libbro mio esistarrà pe sempe, ncopp'a Internet, addó 'e lettere ca io te manno se fanno canóscere pure a ll'umanità a chi ll'interèssano. 'Nu solo muntone 'e parole e frase pe tre identità furmale divèrze. Lettera, libbro overo, lettera-libbro virtuale. 'O lavoro mio è uno e trino. Nun ce sta 'nu filo, o fórzo ce sarrà - chi 'o ssape! 'E idee créscono sarvàteche dint'a 'na mente bona cuncimata (dint'a ll'amménte nun cuncimate nun cresce niente, ma ce sta quacche ramarro 'e plàsteca), e dint'â loro caòteca ma genuina mmescafrancesca fórmano 'e vvote paesaggie cchiù interessante assaje 'e chille ca sempe truvammo cu superbia mustrate dint'a ll'amménte pure pregevole e stimàbbele 'e chi a ll'idee soje ha 'mposto 'e rigure 'e 'na crescita ordinata e disciplinata. 'Nzomma, simmo e site avezzate a libbre ordinate, sequenziale e coerente. Chello ca stu libbro o sequenza 'e lettere è o sarrà è 'mméce 'na sèlva senza educazione. Comme 'na vita interessante.
Fine d''a lettera zero.

Roberto Quaglia