di cuasi dutis lis bandis che tu le cjalis, cheste e je pròpit une letare che ti è rivade, dât che tu le stâs leint. Te ai scrite jo. Jo o soi un jessi uman o lì ator. Il gno non al è za scrit dapardut e alore no lu ripet ancje te letare. Ti visi che ti scrivarai une vore di letaris, dopo di cheste. Ti visi ancje che tes mandarai, se no ce letaris saressino? Ti visi ancjemò che dutis lis tantis letaris che ti mandarai forsit ae fin a deventaran ancje un libri che o publicarai e che mi fasarà vuadagnâ un grum di bêçs o almancul tancj o in ogni câs alc. Ti visi ancje che ti mandarai chestis letaris ancje vie Internet, come che vuê al va tant di mode. O speri che i talians no mi imitin. Se ducj ti scrivin tantis letaris come che o ai decidût di fâ jo, cui sa trops arbui puars a varan di doprâ par fâ dute la cjarte che e covente. E ancje su Internet, cui sa trops eletrons a laressin strassâts.
Scusimi se al semee che no sai scrivi cun dutis lis frasis complicadis che al è biel meti tai libris ma ancje tes letaris. In realtât un pôc o sai fâlu, ma al è miôr che lu evite, almancul al inizi. Ancje se o sai che cheste e je une letare (o ai za preparât ancje la buste e il franc pe version di cjarte), o sai però ancje che e je l'inizi di un libri, e ancje la part iniziâl di un grum di peraulis finidis une volte su Internet par restâi par simpri. Dopo dut al è ce che ti ai apene dit, cioè scrit. E dât che in ogni câs magari e je ancje l'inizi di un libri, jo o ai pensât che al jere miôr no metii subit dute chê robe ingredeade cu lis peraulis complicadis che po la int no capìs nuie e e bute vie il libri.
Scusait se o voi a cjâf ancje a sproposit.
Viodistu, Maurizio Costanzo Show, se cheste letare e deventàs pardabon l'inizi di un libri, po magari cualchidun lu viôt intune librarie cul so titul che al strice l'voli (o ai pensât che al covente un titul che al stricedi l'voli une vore) e alore lu vierç par viodi se lu vûl comprâ e al lei la prime robe che i capite. Ben, tancj a vierzin il libri a câs, e par lôr jo no pues fâ nuie, puaret me! O varès vût di fâ il libri dut cussì, come che al è cumò, che però nol è che mi plasi pròpit tant. Cioè, mi plâs, ma no par dut il libri.
O speri che tu capissis alc di ce che o stoi disint.
Tantis personis invezit a vierzin il libri dal inizi o ae fin, par viodi se ur plâs. Ben, par chei che lu vierzin ae fin o pensarai ae fin dal libri, che cumò al è un pôc adore dât che al è apene tacât. Ma par chei che invezit lu vierzin al inizi, simpri par viodi se ur plâs e se lu àn di comprâ, alore o ai pensât di scrivi cussì, un pôc a puartade de int (O speri di no jessi Presuntuôs), cence dutis chês dificoltâts che parcè mai bisugnie lâlis a cirî intun libri cuant che un magari al voleve dome distraisi justementri? Se po cualchidun che al sta leint no i plâs dut chest, alore al pues provâ a vierzi tal mieç dal libri, che magari al sarà un pôc diferent e alore lu compre instès. L'impuartant al è che lu compri. Se cualchidun al lei chestis riis dentri di un libri spiât intune librarie, che al ledi subit ae casse a comprâlu, i al consei jo che o soi l'autôr.
Però tu, Maurizio Costanzo Show, no tu sâs ancjemò che chest al è un libri, parcè che ti è apene rivade cheste letare, che di cuasi dutis lis bandis che tu le cjalis e je pròpit une letare e di sigûr no pues jessi za ancje un libri, ancje se in ogni câs e je une robe strane su Internet.
E jo ti mandarai une vore di letaris, une al dì, sperant che tu mi clamis ancje me te tô trasmission che al è tant impuartant lâi, come che a san ducj.
Sedi che tu mi clamis o che no tu mi clamis, cuant che lis letaris a saran tantis che si pues fâ un libri, alore jo o ai za decidût che o fâs un libri, e ti mandarai chest libri par fâi publicitât te tô trasmission come che a fasin ducj chei che a scrivin libris di sucès. E alore jo o pensi che tu mi invidarâs se no tu mi vevis invidât prime, o mi tornarâs a invidâ se tu lu vevis za fat, parcè che dopo dut chest al è il prin libri che al fevele dret di te (o ben "a te"), e se dopo dut tu tu âs promovût tancj libris che insome nol è che a jerin ducj capolavôrs ancje se a jerin simpri une vore biei, di sigûr ti fasarà plasê presentâ un libri che ti rivuarde.
Cuant che alore ti mandarai il gno libri za pront, cheste no sarà plui une letare, ma un libri. Duncje no sai se cumò tu stâs leint la letare o il libri o la pagjine di Internet, viodût che chestis riis a son in ducj trê, e jo lis scrîf une volte sole.
No sta butâ vie cheste letare, Cjâr Maurizio Costanzo Show. Nol è il prin libri che o stoi scrivint. Int ai za scrits almancul cinc ma chi in Italie al è un pôc di distrazion e alore a son ducj praticamentri inedits. Ma in paîs lontans invezit mai publichin (no sai parcè) e alore là o soi za famôs e mi domandin i autografs e dut chest mi fâs tant plasê che o ai decidût che al è miôr deventâ famôs ancje in Italie, che e je plui dongje dai paîs lontans. (Se no tu crodis che o soi famôs in paîs lontans ti mandi une videocassete dulà che si viôt che invezit lu soi).
O sieri cumò cheste mê letare zero, spiegant però ancjemò tal paragraf che al ven, par cui che nol à capît, ce che ancje jo o ai fat fadie a capî, e cioè ce che e je cheste letare, o miôr chest libri. Scusait se o deventi plui complicât. Chestis letaris a son (a saran) soredut olmis lassadis di un cjâf sôl (il gno), fatis di sot-olmis di cjâfs di altris, messedadis a plui cuintâi di bon ledan. Insome, a 'nd è par ducj i gusts! Cuant che chestis letaris (che intant che o scrîf no son, ma intant che tu tu leis forsit a son za o forsit no) si unissaran in matrimoni par fâ un libri di cjarte, a ufrissaran al legjitim e paiant comprador dal libri stes e ancje, evidentementri, ai siei amîs scrocons o scrocons e vonde, la pussibilitât di lâ daûr dai solcs di chel cjâf (che po al è simpri il gno), e di cjatâsi te proprie coce i pinsîrs che te mê a son evidentementri nassûts, pròpit cuant che o jeri daûr a scrivìju (mirabil e providenziâl coincidence!). Pussibilitât che e varà svilup ancje tal cyberspazi, dulà che chest gno libri al esistarà par simpri, su Internet, là che lis letaris che jo ti mandi a son fatis cognossi ancje ae umanitât che ur interessin. Un sôl grum di peraulis e frasis par trê identitâts formâls diferentis. Letare, libri reâl, letare-libri virtuâl. Il gno lavôr al è un e trin. Nol è un fîl, o forsit al sarà - cui sa! Lis ideis a cressin salvadiis intune ment ben concimade (tes ments no concimadis no cres nuie, ma al è cualchi liserte di plastiche), e te lôr messedance cjaotiche ma gjenuine a formin a voltis paisaçs tant plui interessants di chei che o cjatìn simpri mostrâts cun braure tes ments ancje stimadis e preseadis di cui che a lis proprie ideis al à imponût lis regulis di une cressite in ordin e disciplinade. Insome, o sin e o sês usâts a libris ordenâts, in sequence e coerents. Ce che chest libri o sequence di letaris al è o al sarà al è invezit une selve incivîl. Come une vite interessante.
Fin de letare zero.

Roberto Quaglia