per quant te la vardet de tütt i part, questa l'è propri ona lettera che t'è rivada, vist che te la seet legend. Te l'hoo scrivüda mì. Mì sont on vess üman o pressapoch. El mè nòm l'è giamò scrivüü de tütt i part e donca el repeti minga anca in la lettera. Te avisi che te scrivi ona montagna de letter, dopo questa. Te avisi anca che te i mandi, senò che letter saríen? Te avisi anmò che tütt i tanti letter che te mandi forsi a la fin diventen anca on liber che pubblicaroo e che el me farà guadagnà ona montagna de danee o almen assee o comunque quaicossetta. Te avisi anca che te mandi sti letter anca per Internet, come incoeu l'è tant de moda. Speri che i italian me còpien minga. Se tütt quant te scriven inscì tanti letter come hoo decis de fà mì, chi sa quant pover pian hann de doperà per fà tüta la carta che ghe serviss. E anca sü Internet, chi sa quant eletron andaríen sprecaa.
Scüsa se el par che soo minga scriv con tütt i fras imbroiaa che l'è bell mett in di liber ma anca in di letter. La verità, on poo el soo fà, ma l'è mej che el eviti, almen a la prima. Anca se soo che questa l'è ona lettera (hoo giamò preparaa anca la busta e el boll per la version de carta), soo anca comunque che l'è anca el començament de on liber, e anca la prima part de on montón de parol andaa ona voeulta sü Internet per restàgh per semper. Dopo tütt l'è quell che t'hoo apena ditt, ovèro scrivüü. E vist che comunque forsi l'è anca el començament de on liber, mì hoo pensaa che l'era mej mettegh minga sübit tüta quela roba imbroiada con i parol imbroiaa che poeu la gent la capiss nagott e la buta via el liber.
Scüsem se voo a cap on poo anca a sproposit de nagott.
Vardom, Maurizio Costanzo Show, se questa lettera la diventass denver el començament de on liber, poeu forsi quaicedun el vede in ona libreria col sò titol che el fa l'œucc (hoo pensaa che el ghe voeur on titol che el fa assee l'œucc) e alora el derv per vedè se el se el voeur comprà e el leng la prima roba che ghe capita. Ebben, assee dérven el liber come vègn vègn, e per lor mì podi fà nagott, ohi a mì! Me tocava fà el liber tütt inscì, come l'è adess, che però l'è minga che el me pias propri assee. Cioè, el me pias, ma minga per tütt el liber.
Speri che se capiss quaicoss de quell che sto disend.
Assee gent inveci la derv el liber del començament o a la fin, per vedè se ghe pias. Beh, per quii che la dérven a la fin ghe pensaroo a la fin del liber, che adess l'è on poo prest vist che l'è apena començaa. Ma per quii che inveci la dérven a la prima, semper per vedè se ghe pias e se hann de compràll, alora hoo pensaa de scriv inscì, on poo a la portada de la gent (Speri de vess minga Presuntuos), senza tütt quii dificoltà che perché mai hann de andà a cercà in on liber quand vün forsi voreva domà spassàss giüstament? Se poeu a quaicedun che el sta legend ghe pias minga tütt quest, alora el pö provà a dervì in mezz al liber, che forsi el sarà on poo different e alora el se el compra istess. L'important l'è che el se el compra. Se quaicedun el leng sti righ in on liber spiaa in ona libreria, che el vaga sübit a la cassa a compràssel, ghe el consili mì che sont l'autor.
Però tì, Maurizio Costanzo Show, te el seet minga ancamò che quest l'è on liber, perché t'è apena rivada questa lettera, che per quant te la vardet de tütt i part l'è propri ona lettera e de sicür la pö minga giamò vess anca on liber, anca se comunque l'è ona roba strana sü Internet.
E mì te mandi ona montagna de letter, vüna al dì, sperand che te ciamet anca mì in la toa trasmission che l'è inscì important andàgh, come sann tütt quant.
Sia che te me ciamet o che te me ciamet minga, quand i letter saràn inscì tanti che se pö fàgh on liber, alora mì hoo giamò decis che ghe foo on liber, e te mandi sto liber per reclamizzàll in la toa trasmission come fann tütt quii che scriven i liber de sucess. E alora mì pensi che te me invidaree se te m'avevet minga invidaa primma, o te me reinvidaree se te l'avevet giamò faa, perché dopo tütt quest l'è el primm liber che el parla dirett de tì (o anca "a tì"), e se dopo tütt te gh'heet portaa innanz inscì tanti liber che insomma l'è minga che èren tütt capolavor anca se èren semper assee bej, de sicür te farà piasè presentà on liber che el te riguarda.
Quand alora te mandi el mè liber giamò pront, questa la sarà pü ona lettera, ma on liber. Inscì soo minga se adess te seet legend la lettera o el liber o la pàgina de Internet, vist che sti righ ghe hinn dent in tütt e trii, e mì i scrivi ona voeulta sola.
Buta minga via questa lettera, car Maurizio Costanzo Show. L'è minga el primm liber che sto scrivend. N'hoo giamò scrivüü almen cinch ma chì in Italia gh'è on poo de sconcert e alora hinn tütt quant quasi inedit. Ma in di paes lontan inveci me i pubblichen (soo minga perché) e alora là sont giamò famos e me domanden i autograf e el me fa tütt inscì assee piasè che hoo decis che l'è mej diventà famos anca in Italia, che l'è pussee visin di paes lontan. (Se te ghe credet minga che sont famos in di paes lontan te mandi ona videocassetta indove se vede che inveci el sont).
Adess sari sü questa mia lettera zero, spiegand però ancamò in del pròssim paràgraf, per chi el gh'ha capii minga, quell che anca mì hoo faa fadiga a capì, ovèro coss l'è questa lettera, o mej sto liber. Scüsem se diventi pussee imbroiaa. Sti letter hinn (saràn) el pü tracc lassaa de on sol cervell (el mè), faa de sottotracc de cervei di alter, mesedaa con paricc quintai de bon ledamm. Insomma, ghe n'è per tütt i gust! Quand sti letter (che intant che scrivi ghe hinn minga, ma intant che tì te leget forsi ghe hinn giamò o no) se spósen per fà on liber de carta, daràn al legìtim e pagant compradór del medesim liber, e anca, se capiss, ai amis scrocon o scrocon e basta, l'ocasion de seguì i solch de quell cervell (che poeu l'è semper el mè), e trovàss in la lor cücca di pensér che in la mia se capiss che hinn spontaa, propri quand seri adree a scriv (miràbil e provida combinazion!). Ocasion che la gh'avarà svilüpp anca in del ciberspazi, indove sto mè liber el esistarà per semper, sü Internet, indove i letter che mì te mandi se fann conoss anca a l'ümanità a chi ghe interessen. On sol montón de parol e fras per trii identità formai divers. Lettera, liber ver, lettera-liber virtual. El mè lavor l'è vün e trin. Gh'è minga on fil, o forsi ghe sarà - chi el sa! I idee crèssen selvàdegh in ona ment ben concimada (in di ment minga concimaa cress nagott, ma gh'è quaic ramarr de plàstica), e in la lor caòtica ma genuina mescafrancesca fórmen di voeult paesagg pussee interessant assee de quii che semper trovemm con superbia mostraa in di ment anca pregevoi e stimàbil de chi ai sò idee el gh'ha imponü i rigor de ona cressida ordenada e disciplinada. Insomma, semm e sii avezzaa a liber ordenaa, sequenziai e coerent. Quell che sto liber o sequenza de letter l'è o el sarà l'è inveci ona selva senza educazion. Come ona vita interessanta.
Fin de la lettera zero.

Roberto Quaglia