pro cantu la abbàides dae ogni parte, custa est propiu una lìtera chi t'est arribada, bidu chi la ses leghende. Ti l'apo iscrita deo. Deo so unu èssere umanu o belle gasi. Su nòmine meu est giai iscritu in ogni parte e duncas no lu repito fintzas in sa lìtera. Ti avviso chi ti iscrio una monta de lìteras, a pustis de custa. Ti avviso fintzas chi ti las imbio, sinono ite lìteras diant èssere? Ti avviso de prus chi totu sas medas lìteras chi ti imbio fortzis a sa fine devenint fintzas unu libru chi apo a publicare e chi m'at a fàghere guadangiare una monta de dinari o a su mancu meda o comunque carchi cosighedda. Ti avviso fintzas chi ti imbio custas lìteras fintzas pro Internet, comente oe est meda de moda. Ispero chi sos italianos no mi còpient. Si totus ti iscrient gasi medas lìteras comente apo detzìdidu de fàghere deo, chie ischit cantos pòveros àrbores ant a dèpere impreare pro fàghere totu sa carta chi bi serbit. E fintzas in Internet, chie ischit cantos eletrones diant èssere isperditziados.
Iscusa si paret chi no isco iscrìere cun totu sas frases imbrogliadas chi est bellu pònnere in libros ma fintzas in lìteras. Sa veridade, unu pagu lu isco fàghere, ma est mègius chi lu evito, a su mancu a sa prima. Fintzas si isco chi custa est una lìtera (apo giai aprontadu fintzas sa busta e su bollu pro sa versione de carta), isco fintzas comunque chi est fintzas su cumintzu de unu libru, e fintzas sa prima parte de unu muntone de paràulas andadas una borta in Internet pro bi abarrare pro semper. A pustis de totu est su chi t'apo giustu naradu, o mègius iscritu. E bidu chi comunque fortzis est fintzas su cumintzu de unu libru, deo apo pensadu chi fiat mègius no bi pònnere luego totu cussa cosa imbrogliada cun sas paràulas imbrogliadas chi posca sa gente no bi cumprendet nudda e betat su libru.
Iscusàdemi si ando a cabu unu pagu fintzas a despropòsitu de nudda.
Bide, Maurizio Costanzo Show, si custa lìtera devènneret a beru su cumintzu de unu libru, posca fortzis calicunu lu bidet in una libreria cun su tìtulu suo chi faghet s'ogu (apo pensadu chi bi cheret unu tìtulu chi faghet meda s'ogu) e tando l'aberit pro bìdere si si lu cheret acatare e leghet sa prima cosa chi li càpitat. Ebbè, medas aberint su libru comente benit benit, e pro issos deo no potzo fàghere nudda, uhi a mie! Mi tocaiat fàghere su libru totu gasi, comente est immoe, chi però no est chi mi praghet propiu meda. Est a nàrrere, mi praghet, ma no pro totu su libru.
Ispero chi bi cumprendas carchi cosa de su chi so nende.
Meda gente imbetzes aberit su libru dae su cumintzu o a sa fine, pro bìdere si li praghet. Bene, pro cussos chi l'aberint a sa fine bi apo a pensare a sa fine de su libru, chi immoe est unu pagu chitzo bidu chi est giustu cumintzadu. Ma pro cussos chi imbetzes l'aberint a sa prima, semper pro bìdere si li praghet e si si lu depent acatare, tando apo pensadu de iscrìere gasi, unu pagu a sa portada de sa gente (Ispero de no èssere Presuntuosu), chene totu cussas difficultades chi proite mai si depent andare a chircare in unu libru cando unu fortzis cheriat isceti s'ispassiare giustamente? Si posca a calicunu chi est leghende no li praghet totu custu, tando podet proare a aberire in mesu a su libru, chi fortzis at a èssere unu pagu diversu e tando si lu acatat su matessi. S'importante est chi si lu acatat. Si calicunu leghet custas rigas in unu libru ispiadu in una libreria, andet luego a sa cassa a si lu acatare, bi lu cussìgio deo chi so s'autore.
Però tue, Maurizio Costanzo Show, no lu ischis galu chi custu est unu libru, proite t'est giustu arribada custa lìtera, chi pro cantu la abbàides dae ogni parte est propiu una lìtera e de seguru no podet giai èssere fintzas unu libru, fintzas si comunque est una cosa istrana in Internet.
E deo ti imbio una monta de lìteras, una a sa die, isperende chi mi tzèrries fintzas a mie in sa trasmissione tua chi est gasi importante a bi andare, comente ischint totus.
Siat chi mi tzèrries o chi no mi tzèrries, cando sas lìteras ant a èssere gasi medas chi si nde podet fàghere unu libru, tando deo apo giai detzìdidu chi nde fatzo unu libru, e ti imbio custu libru pro lu reclamizare in sa trasmissione tua comente faghent totu cussos chi iscrient sos libros de sutzessu. E tando deo penso chi tue m'as a invitare si no m'aias invitadu in antis, o m'as a torrare a invitare si l'aias giai fatu, proite a pustis de totu custu est su primu libru chi faeddat deretu de tie (o fintzas "a tie"), e si a pustis de totu tue as giutu a in antis gasi medas libros chi insomma no est chi fiant totu cabudòperas fintzas si fiant semper meda bellos, de seguru t'at a fàghere piaghere presentare unu libru chi ti riguardat.
Cando tando ti imbio su libru meu giai prontu, custa no at a èssere prus una lìtera, ma unu libru. Gasi no isco si immoe ses leghende sa lìtera o su libru o sa pàgina de Internet, bidu chi custas rigas bi sunt intro totu sas tres, e deo las iscrio una borta ebbia.
No betes custa lìtera, caru Maurizio Costanzo Show. No est su primu libru chi so iscriende. Nd'apo giai iscritos a su mancu chimbe ma inoghe in Itàlia b'est unu pagu de iscuncertu e tando sunt totus belle inèditos. Ma in paisos alluntanados imbetzes mi los publicant (no isco proite) e tando incue so giai famadu e mi pedint sos autògrafos e mi faghet totu gasi meda piaghere chi apo detzìdidu chi est mègius devènnere famadu fintzas in Itàlia, chi est prus a curtzu de sos paisos alluntanados. (Si no bi credes chi so famadu in paisos alluntanados ti imbio una videocasseta in ue si bidet chi imbetzes lu so).
Immoe serro custa lìtera mia zero, ispieghende però galu in su paràgrafu imbeniente, pro chie no at cumpresu, su chi fintzas deo apo fatu fadiga a cumprèndere, o mègius it'est custa lìtera, o mègius custu libru. Iscusàdemi si devèngio prus imbrogliadu. Custas lìteras sunt (ant a èssere) prus a prestu tratzas lassadas dae unu cherbeddu ebbia (su meu), fatas de sutatratzas de cherbeddos de sos àteros, misciadas cun medas cuintales de bonu ledàmine. Insomma, bi nd'at pro totu sos gustos! Cando custas lìteras (chi mentras iscrio no bi sunt, ma mentras tue leghes fortzis giai bi sunt o nono) si cojant pro fàghere unu libru de carta, ant a dare a su legìtimu e paghende acatadore de su matessi libru, e fintzas, si cumprendet, a sos amigos iscroccones o iscroccones e bastat, s'ocasione de sighire sos surcos de cussu cherbeddu (chi posca est semper su meu), e de s'agatare in sa conca issoro pensamentos chi in sa mia si cumprendet chi sunt ispuntados, propiu cando fia iscriende (miràbile e pruvida cumbinatzione!). Ocasione chi at a àere isvilupu fintzas in su tziberispàtziu, in ue custu libru meu at a esistire pro semper, in Internet, in ue sas lìteras chi deo ti imbio si faghent connòschere fintzas a s'umanidade a chie las interessant. Unu ebbia muntone de paràulas e frases pro tres identidades formales diversas. Lìtera, libru beru, lìtera-libru virtuale. Su traballu meu est unu e trinu. No b'at unu filu, o fortzis bi at a èssere - chie l'ischit! Sas ideas creschent burdas in una mente bene cuncimada (in sas mentes no cuncimadas no creschet nudda, ma b'est carchi taddàrigu de plàstica), e in sa caòtica ma genuina misciamurca issoro formant a bortas paesàgios prus interessantes meda de cussos chi semper agatamus cun superbia mustrados in sas mentes fintzas pregèviles e istimàbiles de chie a sas ideas suas at impostu sas rigores de una crèschida ordinada e disciplinada. Insomma, semus e sezis abesados a libros ordinados, sequentziales e coerentes. Su chi custu libru o sequèntzia de lìteras est o at a èssere est imbetzes una sèlva chene educatzione. Comente una vida interessante.
Fine de sa lìtera zero.

Roberto Quaglia