io me revolgo a te, cu 'n attiggiamento pare a chi - int'a ate tiempe o int'a ate poste - se revolge â divinità, o a chi - int'a ate tiempe o int'a ate poste - se revolge ô cunfessore o ô psicanalista o ô re o ô presidente o ô capatribù o ô partito o a Satanasso. Me revolgo a te pecché, fora 'e definizione cchiù chiare, tu può essere visto comme 'o meglio emblema 'e 'n entità ca ormaje nun se po' fa a meno dint'â società taliana: 'a Televisione.
Me revolgo accussì a te danno a te ll'identità ca cchiù me cummene 'e te dà. Parlarraggio cu te facenno fenta cu me stesso ca tu m'ascute, e 'o ssapé ca nun è accussì nun me darrà fastidio, pecché 'a verità saccio benissimo ca tu nun si chello ca pe cummudità io faccio fenta cu me stesso ca tu si.
Caro Maurizio Costanzo Show, ch'è ca si, allora? Pecché si 'mpurtante? Ma... si 'mpurtante? Be', 'n Italia tutte quante pàrlano spisso 'e te, e pure si 'a semànteca è 'n'opinione, ne vène ca tu si 'mpurtante. Ch'è ca si allora? Si 'nu prugramma televisivo? Senza dubbio sì. Sarrìa curaggiuso 'o nnegà. Ma si overamente sulo 'nu prugramma televisivo? Si tu fusse overamente sulo 'nu prugramma televisivo, 'n Italia nun se parlarrìa accussì assaje 'e te, e tu nun sarrisse accussì 'mpurtante. Doppo tutto, 'a Televisione taliana (cu 'e ciente programme suoje locale o nazziunale) è pô 99% chiena 'e programme televisive ca nun sò 'o Maurizio Costanzo Show, 'a vita overa 'e ognuno 'e nuje è teoricamente fatta pe cchiù d''o 99% 'e fatte ca nun sò televisive, e pure accussì tu tiene 'nu posto 'e riliévo dint'â mente d''a maggior parte d''e cittadine taliane, e addiviente perzìno 'n entità ca nun se po' fa a meno quanno se penza e se discute 'ncoppa a tante e tante argumiente. Ch'è ca si, dunque? È chello ca cercarraggio 'e scummiglià dint'a chesta lettera mia, e suprattutto dint'a chelle ca venarranno dint'a 'e juorne e 'e mise ca vénono, ovèro dint'a ll'ate pàggine 'e stu cuntenitore.
Comme vide, caro Maurizio Costanzo Show, io t'aggio pigliato comme sìmbulo pe parlà cu me stesso, almeno fino a quanno quaccheduno m'ascutarrà. Putevo sderrubbà sti parole doppo 'a 'ntestazione "Caro Diario..." o doppo aver ditto 'nu mantra religiuso ca m'arapesse a 'n esperienza màsteca o doppo aver miso d'accordo cu 'nu psicanalista 'o prezzo d''a prestazione soja 'e stà a ascutà 'o sderrubbo d''e penziere mieje.
'Mméce aggio scegliuto a te.
Nun è 'na casualità. È 'na decisione ca nun se po' evità, sciuta d''o capì 'a mudernità toja a paragone 'e ll'ate categurìe simbòleche (Pataterno ecc.), d''o ricanóscere 'a forza simbòleca ca nun se resiste ca tu haje pigliato 'mpressa dint'ô core d''a società taliana.
Caro Maurizio Costanzo Show, tu nun si 'na perzona, nun si Maurizio Costanzo (ll'ommo ca t'ha criato e vattiato), nun si ll'impiegato o 'o funzionario ca legge sti lettere ô Maurizio Costanzo Show cu 'o dovere 'e scègliere, filtrà, jettà â munnezza. Si 'a Divinità Mudèrna, 'o Totem d''o Casale, 'o Sacerdote d''o Reale.
Nun vònno chesti - 'e mmeje - essere sulo paroluni gruosse ca fanno effetto. Dint'a 'e lettere ca venarranno, jarraggio a funno dint'a 'e significate ca chelle tènono 'nchiuse. Ma nun 'o farraggio cu 'a pompa accadèmeca 'e chi tène 'e tìtule e 'e càttedre ca lle fanno lècita e duvuta 'a mustra 'e pompa accadèmeca. Nun saccio ancora comme 'o farraggio, ma 'o farraggio a muodo mio, qualunque cosa chesta frase vo' dìcere. Areto a 'e parole meje ce sta 'n individuo senza tìtule accadèmece, senza studie sistemàtece, senza nisciuna 'ntrasata (pe nun parlà 'e integrazione) dint'â società d''o ssapé, senza 'na mentalità chiena 'e certezze nozionìsteche, 'e dogme religiuse o scientìfece. Fuio 'a 'a cunzulante pràteca 'e fa sempe e sulo 'e stesse sentiere d''a mente, 'e s'annammurà 'e ll'opinione, ca sìano 'e ll'ate o 'e soje. Cu 'e opinione me piace sulo a fa ll'amore alleggio, lassànnole quanno a ll'uocchie mieje pàreno vecchie, tenenno defatte ll'opinione (proprio accussì) ca 'e opinione raramente sò quaccosa 'e certamente overo, sennò 'e chiammarriano "date 'e fatto" e nun opinione, e ll'uómmene nun se mettarriano 'n guerra dint'a 'e spisso pateteche prove 'e fa vìncere ll'une (pe sòleto 'e soje) ncopp'a ll'ate (pe sòleto chelle 'e ll'ate).
Ch'è ca songo io allora?
Songo, primma 'e tutto, 'e parole ca sònano dint'â mente 'e chi sta liggenno o sta sentenno léggere sti rrighe. Songo, secunno, ll'immàggine ca certune 'e chille ca stanno liggenno sti rrighe se sò fatto o se stanno facenno 'e me. Songo, terzo, 'a somma 'e immàggine e ricuorde e metàfore cu 'a quale io stesso faccio sapé sulo a me stesso chello ca io songo, songo stato 'mpassato e me piacesse essere 'o juorno ca vène.
Troppo 'mbrugliato? Nun me 'mbruoglie, caro Maurizio Costanzo Show, tu vaje cchiù assaje d''a semplicità ca pure t'annozze, e nun ce sta niente ca riguarda 'e fatice umane ca tu nun puozze tené dint'a te e ca tu nun tarraje. 'O ruolo tuo, 'mmiezo e gruosso assaje, è 'o destino tuo.
Dint'ô mumento ca io me revolgo a te, tu già me tiene dint'a te, caro Maurizio Costanzo Show, me tiene pure si nun haje ancora dato 'a chesto 'na pùbbreca voce, manno ll'immàggine mia e 'e parole meje dint'a tutte 'e case taliane. Me tiene pecché io songo trasuto dint'a te cu chesta lettera, accussì comme 'o religiuso s'allaccia ô Dio suo cu 'a prièra.
Mò ca 'o nesso è miso, caro Maurizio Costanzo Show, arrivo â fine 'e chesta primma lettera. Tant'ate venarranno, una ô juorno (overa o ca pare), fino a quanno tutte ll'argumiente ca me piacerrà 'e dìcere nun sarranno state ditte fora. 'A somma d''e llettere farrà 'nu libbro. Juorno appriesso juorno te manno tutte 'e lettere, e â fine te manno pure 'o libbro. Pe via overa e pe via virtuale. Pe posta e pe Internet. 'Nu carreco 'e significate 'nderizzate a te e, pe canuscenza, a ll'umanità.

Roberto Quaglia