inviti chiunque el stia legend ste righ, el sia lü o lee màscol o dòna o tütt düü o nissün di düü, a pensà minga al sess de chi l'ha scrivüü quell che tì te seet legend. Chi scriv, per tì incoeu el gh'ha minga sess, anzi, chi scriv incoeu l'esist minga, per tì. Ghe hinn domà ste parol e tì te i leget.
Nissün inscì l'ha scrivüü ste parol. Ste parol rispèccien on pont de vista asèttich, lontan, asessüaa, come quell de on extraterrèster ideal. Ecco, se pròpi te voeut imaginà quaidün che el sia el responsàbil de quell che tì te leget, consìderem el tò òspit extraterrèster.
Sont inscì virtüalment on extraterrèster, gentilment ospitaa de la toa ment e di soo dintòrni, ovvèro la società de cui te seet part. Conossi minga i vòster concett de Ben e de Mal, perché gh'hoo minga i vòster preconcett, e inscì per evità de fà l'ün o l'alter foo nagòtt, ma natüralment parli, e descrivi quell che vedi. Speri de fà minga del Mal o del Ben semplicement parland, ma in fin di cönt l'è l'ünica licenza che me ciapi.
Del pont de vista extraterrèster, i consüetüdin sessüal de ona società che se conoss minga hinn vün di argoment de pü efficac trastüll. Parlaroo alora de quell de pü büff che hoo osservaa in sti vòster abitüdin.
Per còsmica decenza intri minga in del particolar di vòster fìsich incastr amoros. Me astegni anca del ripèt sciocament tütt quell a vialter perfettament nòt, per minga anojàvv. Defatti ve parlaroo de quell che hoo osservaa di vòster comportament sessüal minga quand ghe stà on rapòrt sessüal conclamaa, ma quand ghe n'è minga.
Quell che in mòd particolar l'ha defatti atiraa la mia atenzion l'è la cüriosa modalità vòstra de relazionàss tra on sess e l'alter pròpi quand ghe stà total assenza de rapòrt sessüal conclamaa.
Ovviament ghe n'è nagòtt de dì de quand i màscoi e i dònn hinn completament separaa i ün di alter, fìsicament e sensorialment, perché alora nagòtt tra màscoi e dònn el accad.
Ma apena se retròven a condivìd i stess spazzi, ecco che la situazion la cambia. Anca se se conóssen minga, màscoi üman e dònn üman gh'hann on recìproch comportament sessüal. Fann ovèro ròb che càusen effett de natüra sessüal sora quij del sess opòst.
Sti effett pòden natüralment vess piasèvol o spiasèvol, e hinn defatti semper o l'ün o l'alter o tütt düü.
Particolarment büff, del mè pont de vista extraterrèster, hinn i effett negativ. L'è defatti la soferenza la faccenda pü intrigant per chi la subiss minga, e la deventa anca la pü büffa quand in di causa che la detèrmina se còj l'element assürd e inscì la natüra grottesca. Del mè pont de vista extraterrèster, còj ste ròb l'è on gioeugh de fioeu extraterrèster.
Com'è che se registra on effett negativ? Ebbè, podaríom dì che ghe stà on effett negativ quand on màscol o ona dòna, a causa de la vixina presenza de quaidün del sess opòst, el prova on sens de malèss emozional. In cert cas, hoo notaa, el par denver che màscoi e dònn che se conóssen minga fann a gara per infligìss a vicenda sti malèss emozional.
El malèss emozional pü frequentement provaa del màscol, trovàndes vixin a ona dòna, l'è causaa de la semplice osservazion de la dòna, spece se de essa hinn visìbil o evidenziaa i genital, o cert zòn del còrp che fónsen de riciamm sessüal. L'è cürios come basta inscì pòcch per causà malèss emozional in la pü part di màscoi. Evidentement, el màscol l'è assee sensìbil riguard cert sò istint, e quand el subiss on riciamm sessüal el sòffer se ghe l'è minga permess de respònd a lü. Pü fòrt l'è inscì el riciamm sessüal, pü gròss l'è inscì el malèss emozional del màscol al qual l'è minga concess de respònd a sto riciamm.
El malèss emozional pü frequentement provaa de la dòna, trovàndes vixin a on màscol, l'è che el màscol el respònd a i riciamm sessüal con i qual essa la l'ha colpii per sbaj. Voeuri defatti minga pensà che ona dòna la indirizza riciamm sessüal vers màscoi che la voeur minga colpì con essi. La rispòsta del màscol a i riciamm sessüal che l'ha ricevüü, hinn riciamm sessüal anca lor, sebben gh'àbbien forma diversa. Mentre i riciamm de la dòna vers el màscol hinn prevalentement de tipo visiv, quij del màscol vers la dòna hinn spess de tipo vocal-üditiv, quaich vòlta anca tàttil. El màscol el emett donca son de inequivocàbil contegnüü sessüal, opür el tòcca con la man i part de riciamm sessüal feminil che l'hann riciamaa. Ricevend sti riciamm la dòna la tra spess on malèss emozional paragonàbil a quell che tra el màscol ricevend quij de la dòna. Sebben quaich vòlta el màscol üman el emetta sti sò riciamm sonor o tàttil anca senza che la dòna la gh'àbbia precedentement emess i pròpri riciamm visiv, hoo constataa che in la maggioranza di cas l'è la dòna a emètt per prima i pròpri signal visiv, a i qual el màscol, quand el riess minga a reprìmes, el respònd con i soo.
Quell che a i inocent oeugg extraterrèster mè el par spassosìssim perché assürdament grottesch in del contest de la presünta civiltà del inscì ditt vess üman, spece presünta inteligent de sto pianeta altrimenti coerent, l'è che ghe stà in di vess üman granda disparità de giüdizzi rispett al fatt de causà a i individü de sess opòst al pròpri, malèss emozional mediant la emission di caratterìstich pròpri riciamm sessüal. In alter parol, sia màscoi che dònn hinn prevalentement d'acòrd che la dòna la gh'àbbia el pien diritt de colpì qualunque màscol el incontra per strada con i pròpri potent riciamm sessüal visiv, causàndegh eventüal malèss emozional, mentre l'òmm el gh'àbbia minga diritt de colpì qualunque dòna el incontra per strada con i pròpri riciamm sessüal vocal, o moderatament tàttil, causàndegh eventüal malèss emozional. I riciamm sessüal maschil vègnen ciamaa "att de libìdin", perché evidentement sèrven al màscol per comünicà la soa libìdin a la dòna vers la qual el i cumpiss. Cüriosament, i riciamm sessüal feminil vègnen minga ciamaa "att de libìdin", benché evidentement sèrven a la dòna per comünicà la soa libìdin a tütt i màscoi che hinn in grad de vedèla. Del modest mè pont de vista extraterrèster me par che la dòna ümana, mostrand o evidenziand i part sessüal del pròpri còrp, la cumpiss automàticament "att de libìdin" vers chiunque vedèndola inscì el prova el malèss emozional de cui èmm già parlaa.
Voeuraria minga che quaidün el pensass mal de nün extraterrèster perché disi quell che vedi.
La natüra, ovviament, la se cüra minga di pregiüdizzi di specie inferior come quela ümana a cui mì appartegni minga, e in del temp la riequìlibra i asimmetrìe che gh'hann minga sens.
Se in fütür i dònn üman lanciarann semper de pü i lor riciamm sessüal esibend dappertütt nàtegh e pett, semper pü spess gonfi de silicon, el accadarà inscì prima o poeu, fatalment, che i màscoi üman se emancìpen del archetip cültüral che ancamò i trattègn del fà tütt semper l'istess, e se adegüen a fà tütt l'istess, e semper.
Questo l'è quell che mì hoo notaa, del mè pont de vista extraterrèster. Sti problema personalment me tòcchen minga, dato che nün de la mia specie extraterrèster sèmm sessüalment autòcton, e on dì ve spiegaroo cossa questo el significa.
Pensii ben a quell che v'hoo ditt, dato che dòpotütt ve capita minga tütt i dì che on extraterrèster el ve faga notà ròb sora el vòster mòd de vìv che lü el riess a vedè domà perché l'è on extraterrèster, e el gh'ha inscì minga interess personal in la vicenda de la esistenza ümana. Pensìghegh, senza convìncev che mì gh'àbbia tòrt senza nanca avègh pensaa. Pòdi defatti minga avèi tòrt, perché hoo espress nissüna opinion. V'hoo domà contaa cossa se ved de ccà sü de indoe mì ve vedi, e credii minga che gh'àbbia vist mal, perché gh'hoo ona òttima vista. Mettìiv al mè pòst e vardèv, e anca vialter gh'avarii on poo de la mia saviezza extraterrèster.

Roberto Quaglia