pe-i teu spetatôri ciù picìn, ancheu te cónto 'na fâvoa, a fâvoa da Figgétta Sfortunâ.

Gh'êa 'na vòtta 'na figgétta sfortunâ, ch'a goardâva sénpre a televixón. De matìn a andâva a scêua, cómme tûtte e figgétte da seu etæ, ma de dòppodisnâ a se piazzâva sénpre davànti a-a televixón e a no se mescciâva ciù, fìnn-a a quànde o l'êa l'ôa de anâ a léto.
Dæto ch'a goardâva sénpre a televixón, sta figgétta sfortunâ a no l'avéiva amîxi, feua che quélli ch'êan drénto a televixón. Lê a l'êa convìnta de avéi tànti amîxi, perché a televixón a l'êa tûtta pìnn-a de sinpàtiche persónne ch'e semegiâvan pròpio seu amîxi. Gh'êa tànti tànti cartoìn, e êan tûtti seu amîxi. Pûrtròppo però a figgétta sfortunâ a se sentîva o mæximo tànto sôla, ànche s'a l'avéiva tûtti quélli stràni amîxi drénto a-a televixón. Questa a l'êa a primma de-e seu sfortùnn-e.
A scêua i âtri figeu ghe contâvan ch'o giórno prìmma avéivan zugòu tûtto o dòppodisnâ. E a figgétta sfortunâ a rispondéiva ch'lê a no l'avéiva zugòu, ma ch'a l'avéiva goardòu i seu amîxi drénto a-a televixón zugâ pe lê. Quànde i figeu no sfortunæ andâvan a domênega dòppodisnâ in biçicletta, a figgétta sfortunâ a goardâva inveçe quàrche figûa ch'a andâva in biçicletta drénto a televixón.
A seu conpàgna de bànco ghe dixéiva sénpre quànto a se divertîva a zugâ co-e seu nêuve pigòtte. Quélla figgétta sfortunâ a no se divertîva a zugâ co-e seu nêuve pigòtte, perché a no l'avéiva ténpo. A passâva defæti tûtto o seu ténpo a goardâ i figeu drénto a-a televixón a zugâ co-e seu nêuve pigòtte.
Passàn i ànni, e a figgétta sfortunâ a cresciéiva, ma a restâva sénpre 'na figgétta, ànche se cresciûa, e sénpre sfortunâ. I âtri figeu se regordâvan de quànde êan stæti ciù picìn, e ne parlâvan tra lô. A figgétta sfortunâ a no reuscîva a regordâse de quànde a l'êa stæta ciù pìccola, perché a se regordâva sôlo de quànde êan stæti ciù picìn tûtti i seu amîxi drénto a televixón. Quànde a scêua a contâva quarcösa a-i âtri figeu no sfortunæ, a podéiva sénpre contâ sôlo quéllo ch'a l'avéiva vìsto drénto a televixón, perché inta seu vìtta a no l'avéiva mâi vìsto âtro. "Te piâxe pasezâ into bòsco?" ghe dimandâva ògni tànto 'n conpàgno.
E a figgétta sfortunâ a rispondéiva: "A-o Grande Puffo ghe piâxe tànto pasezâ into bòsco". Dòppo a azonzéiva "A Cappuccetto Rosso ascì, ma a dêve stâ aténta a-o Lô." Ma lê a no gh'êa mâi stæta into bòsco.
Ascì a Denâ, a figgétta sfortunâ a l'êa sfortunâ, perché i âtri figeu contâvan di bèi regâli ch'avéivan riçevûo da Babbo Natale ch'o l'êa intròu de ascôzo inte seu câze, e lê inveçe a se regordâva sôlo di bèi regâli ch'i figeu drénto a-a televixón avéivan riçevûo da Babbo Natale ch'o l'êa intròu mìga tànto de ascôzo drénto a Televixón.
Passàn âtri ànni, e a figgétta sfortunâ a l'êa sénpre 'na figgétta, ànche se sénpre ciù cresciûa, e sénpre ciù sfortunâ.
A no se regordâva defæti ninte, de tûtti i ànni ch'êan passæ, ma a se regordâva sôlo quéllo ch'a l'avéiva vìsto in televixón. A no se regordâva manco ciù cómme êan fæti i seu genitôri, perché no compaîvan mâi in televixón e alôa lê a no ê goardâva, e alôa dòppo 'n pö ascì lô avéivan piantòu de goardâ lê.
"Pôvia mì!" a se disse 'n giórno a figgétta sfortunâ "No me regòrdo ciù manco cómm'a l'é fæta mæ moæ!"
A provò alôa a no goardâ a televixón pe védde seu moæ, ma a no ghe reuscî. Da tûtte e pàrti a goardâva, a vedéiva sôlo a televixón. A s'êa avesâ a goardâla coscì tànto ch'òrmâi a no vedéiva ciù ninte d'âtro. Ascì a scêua, tûtti i seu conpàgni sparîn davànti a-i seu éuggi, sostituîi da tànte pìccole televixoìn ch'e salteâvan chì e là. A maèstra a se trasformò inte 'n grànde grànde televixoón con drénto sôlo a fàccia de 'na stria ch'a â sgriâva in continoaçión.
"Pôvia mì!" a se dixéiva a figgétta sfortunâ "Són sénpre ciù sfortunâ! Oh, cómme voriéiva piantâ de goardâ sénpre a televixón!"
Ma o l'êa ohimè tròppo tàrdi! Òrmâi lê a l'êa pe sénpre 'na vìttima da televixón! A no l'avéiva ciù pensci seu, ma sôlo pensci che a televixón a l'avéiva misso drénto de lê. A no l'avéiva remembri seu, ma sôlo remembri provegnénti da-a televixón.
Dòppo 'n giórno a figgétta sfortunâ a pèrse ascì o seu nómme, e o l'é pe questo ch'o seu nómme o no compâre inte sta fâvoa. Nisciùnn-a de-e persónne ch'compaîvan drénto a televixón a l'avéiva mâi prononçiòu o seu nómme, e alôa lê a l'avéiva dezmentegòu.
Quànde 'n giórno a figgétta sfortunâ a sparî, nisciùn o se n'acòrse, manco lê, dæto ch'lê a se acorzéiva sôlo de-e cöse ch'sucedéivan drénto a-a televixón, e drénto a televixón lê a no l'êa mâi sparîa dæto ch'a no ghe l'êa mâi manco comparsa.
Nisciùn ancheu o se regòrda ciù da pôvia figgétta sfortunâ ch'a goardâva tròppo a televixón.
Nisciùn feua che a persónna bónn-a ch'a l'à scrîto sta fâvoa pe sarvâ tûtti i figeu e e figgétte ch'goàrdan tròppo a televixón inveçe de divertîse zugàndo cómme se dêve, e rîxegan coscì ascì lô de scomparî da-o móndo, cómme a figgétta sfortunâ ch'ancheu nisciùn o regòrda ciù.

Roberto Quaglia