p''e spettatore tuoje cchiù piccerille, oje te cunto 'na fàvola, 'a fàvola d''a Criatura Scarugnata.

Ce steva 'na vota 'na criatura scarugnata, ca guardava sempe 'a televisione. 'A matina jeva a scola, comme tutte 'e criature d''a età soja, ma 'o dopopranzo se piazzava sempe annanze â televisione e nun se moveva cchiù, fino a quanno era ll'ora 'e ì a lietto.
Dato ca guardava sempe 'a televisione, sta criatura scarugnata nun teneva amice, fora chille ca stévano dint'â televisione. Essa era cunvinta 'e tené tante amice, pecché 'a televisione era tutta china 'e simpàteche perzone ca parèvano proprio amice suoje. Ce stévano tante tante cartune, e èrano tutte amice suoje. Purtroppo però 'a criatura scarugnata se senteva 'o stesso assaje sola, pure si teneva tutte chille strane amice dint'â televisione. Chesta era 'a primma d''e scarogne soje.
A scola ll'ate criature lle cuntàvano ca 'o juorno primma avèvano jucato tutto 'o dopopranzo. E 'a criatura scarugnata rispunneva ca essa nun aveva jucato, ma ca aveva guardato 'e amice suoje dint'â televisione a jucà pe essa. Quanno 'e criature nun scarugnate jèvano 'a dummèneca dopopranzo 'n bicicletta, 'a criatura scarugnata guardava 'mméce quacche figura ca jeva 'n bicicletta dint'â televisione.
'A cumpagna 'e banco soja lle diceva sempe quanto se divarteva a jucà cu 'e bàmbole nove soje. Chella criatura scarugnata nun se divarteva a jucà cu 'e bàmbole nove soje, pecché nun teneva tiempo. Passava defatte tutto 'o tiempo suo a guardà 'e criature dint'â televisione a jucà cu 'e bàmbole nove lloro.
Passàjeno 'e anne, e 'a criatura scarugnata cresceva, ma rummaneva sempe 'na criatura, pure si cresciuta, e sempe scarugnata. ll'ate criature se ricurdàvano 'e quanno èrano state cchiù piccerille, e ne parlàvano tra lloro. 'A criatura scarugnata nun riusceva a se ricurdà 'e quanno era stata cchiù piccerella, pecché se ricurdava sulamente 'e quanno èrano state cchiù piccerille tutte 'e amice suoje dint'â televisione. Quanno a scola cuntava quaccosa a ll'ate criature nun scarugnate, puteva sempe cuntà sulo chello ca aveva visto dint'â televisione, pecché dint'â vita soja nun aveva maje visto ato. "Te piace passeggià dint'ô vuosco?" lle chiedeva ogne tanto 'nu cumpagno.
E 'a criatura scarugnata rispunneva: "Ô Granne Puffo lle piace assaje passeggià dint'ô vuosco". Po' aggiungeva "A Cappuccetto Rosso pure, ma add'à stà attenta ô Lupo." Ma essa nun ce era maje stata dint'ô vuosco.
Pure a Natale, 'a criatura scarugnata era scarugnata, pecché ll'ate criature cuntàvano d''e bbielle regale ca avèvano ricevuto 'a Babbo Natale ca era trasuto 'e nascosto dint'a 'e case lloro, e essa 'mméce se ricurdava sulamente d''e bbielle regale ca 'e criature dint'â televisione avèvano ricevuto 'a Babbo Natale ca era trasuto mica tanto 'e nascosto dint'â Televisione.
Passàjeno ate anne, e 'a criatura scarugnata era sempe 'na criatura, pure si sempe cchiù cresciuta, e sempe cchiù scarugnata.
Nun se ricurdava defatte niente, 'e tutte 'e anne ca èrano passate, ma se ricurdava sulamente chello ca aveva visto 'n televisione. Nun se ricurdava manco cchiù comme èrano fatte 'e genitore suoje, pecché nun apparèvano maje 'n televisione e allora essa nun 'e guardava, e allora doppo 'nu poco pure lloro avèvano fernuto 'e guardà a essa.
"Pòvera me!" se dicette 'nu juorno 'a criatura scarugnata "Nun me ricordo cchiù manco comme è fatta màmmema!"
Pruvaje allora a nun guardà 'a televisione pe vedé 'a mamma soja, ma nun ce riuscette. 'A tutte 'e parte guardava, vedeva sulamente 'a televisione. S'era abituata a 'a guardà accussì tanto ca ormaje nun vedeva cchiù niente ato. Pure a scola, tutte 'e cumpagne suoje sparèttero annanze a 'e uocchie suoje, sostituite 'a tante piccole televisione ca sautellàvano ccà e llà. 'A 'nzignante se trasfurmaje 'n 'nu granne granne televisorone cu dinto sulamente 'a faccia 'e 'na strega ca 'a sgridava 'n cuntinuazione.
"Pòvera me!" se diceva 'a criatura scarugnata "Songo sempe cchiù scarugnata! Oh, comme vurrìa fernì 'e guardà sempe 'a televisione!"
Ma era ahimè troppo tarde! Ormaje essa era pe sempe 'na vìttema d''a televisione! Nun teneva cchiù penziere suoje, ma sulo penziere ca 'a televisione aveva misso dint'a essa. Nun teneva ricorde suoje, ma sulo ricorde proveniente dâ televisione.
Po' 'nu juorno 'a criatura scarugnata perdette pure 'o nomme suo, e è pe chesto ca 'o nomme suo nun appare 'n sta fàvola. Nisciuna d''e perzone ca apparèvano dint'â televisione aveva maje pronunciato 'o nomme suo, e allora essa ll'aveva scurdato.
Quanno 'nu juorno 'a criatura scarugnata sparette, nisciuno se ne addunaje, manco essa, dato ca essa se addunava sulamente d''e cose ca succedèvano dint'â televisione, e dint'â televisione essa nun era maje sparita dato ca nun ce era maje manco apparuta.
Nisciuno oje se ricorda cchiù d''a pòvera criatura scarugnata ca guardava troppo 'a televisione.
Nisciuno fora 'a perzona bbona ca ha scritto sta fàvola pe sarvà tutte 'e criature ca guàrdano troppo 'a televisione 'mméce 'e se divertì jucanno comme se deve, e rìsecano accussì pure lloro 'e scomparì d''o munno, comme 'a criatura scarugnata ca oje nisciuno se ricorda cchiù.

Roberto Quaglia