invito chiesisiat siat leghende custas rigas, siat issu o issa màsculu o fèmina o ambos o nemos de sos duos, a no pensare a su sessu de chie at iscritu cussu chi tue ses leghende. Chie iscriet, pro tie oje no tenet sessu, antzis, chie iscriet oje no esistit, pro tie. Bi sunt isceti custas paràulas e tue las leghes.
Nemos gasi at iscritu custas paràulas. Custas paràulas rispègiant unu puntu de vista asèticu, atesu, asessuadu, comente cuddu de un'estraterrestre ideale. Acò, si pròpiu cheres immaginare calicunu chi siat su responsàbile de cussu chi tue leghes, cunsidèrami s'òspite estraterrestre tuo.
So gasi virtualmente un'estraterrestre, gentilmente ospitadu dae sa mente tua e dae sos dintornos suos, est a nàrrere sa sotziedade de cui ses parte. No connosco sos cuntzetos bostros de Bene e de Male, proite no tèngio sos precuntzetos bostros, e gasi pro evitare de fàghere s'unu o s'àteru no fatzo nudda, ma naturalmente faeddo, e descrio cussu chi bido. Ispero de no fàghere su Male o su Bene semplicemente faeddende, ma in fine de sos contos est s'ùnica litzèntzia chi mi pigo.
Dae su puntu de vista estraterrestre, sas consuetùdines sessuales de una sotziedade chi no si connoschet sunt unu de sos argumentos de prus efficace trastullu. Apo a faeddare tando de cussu de prus bùffulu chi apo osservadu in custas abitùdines bostras.
Pro còsmica detzèntzia no intro in su particulare de sos fìsicos incastros amorosos bostros. Mi astèngio fintzas dae scioccamente repìtere totu cussu a bois perfetamente notu, pro no bos annoare. Difatis bos apo a faeddare de cussu chi apo osservadu de sos cumportamentos sessuales bostros no cando b'at unu rapportu sessuale conclamadu, ma cando no b'at.
Cussu chi in modu particulare at difatis atiradu s'atentzione mea est sa curiosa modalidade bosta de bos relatzionare intre unu sessu e s'àteru pròpiu cando b'at totale assèntzia de rapportu sessuale conclamadu.
Òviamente no b'at nudda de nàrrere de cando sos màsculos e sas fèminas sunt cumpletamente separados sos unos dae sos àteros, fìsicamente e sensorialmente, proite tando nudda intre màsculos e fèminas acadessit.
Ma apenas si retròvant a cundivìdere sos matessi ispàtzios, acò chi sa situatzione càmbiat. Fintzas si no si connoschent, màsculos umanos e fèminas umanas tenent unu recìprocu cumportamentu sessuale. Faghent est a nàrrere cosas chi càusant efetos de natura sessuale subra cuddos de su sessu opostu.
Custos efetos podent naturalmente èssere piaghèvoles o dispiaghèvoles, e sunt difatis semper o s'unu o s'àteru o ambos.
Particolarmente bùffulos, dae su puntu de vista estraterrestre meu, sunt sos efetos negativos. Est difatis su patimentu sa fatzenda prus intrigante pro chie no la sùbit, e diventat fintzas sa prus bùffula cando in sas càusas chi la detèrminant si coglit s'elementu assurdu e gasi sa natura grottesca. Dae su puntu de vista estraterrestre meu, aferrare custas cosas est unu giogu de pitzocos estraterrestres.
Comente est chi si registrat un'efetu negativu? Bè, diamus a pòdere nàrrere chi b'at un'efetu negativu cando unu màsculu o una fèmina, a càusa de sa vicina presèntzia de calicunu de su sessu opostu, proat unu sensu de malessere emotzionale. In tzertos casos, apo notadu, paret a beru chi màsculos e fèminas chi no si connoschent faghent a gara pro s'infrìnghere a vicenda custos malesseres emotzionales.
Su malessere emotzionale prus frequentemente proadu dae su màsculu, agatèndesi a curtzu a fèmina, est causadu dae sa sìmplitze osservatzione de sa fèmina, ispetzie si de issa sunt visìbiles o evidentziados sos genitales, o tzertas zonas de su corpus chi fùngint dae richiamu sessuale. Est curiosu comente bastat gasi pagu pro causare malessere emotzionale in sa prus parte de sos màsculos. Evidentemente, su màsculu est meda sensìbile riguardu tzertos istintos suos, e cando sùbit unu richiamu sessuale soffrit si no li est permìtidu de rispòndere a issu. Prus forte est gasi su richiamu sessuale, prus mannu est gasi su malessere emotzionale de su màsculu a su cale no li est cuntzèdidu de rispòndere a custu richiamu.
Su malessere emotzionale prus frequentemente proadu dae sa fèmina, agatèndesi a curtzu a unu màsculu, est chi su màsculu rispondet a sos richiamos sessuales cun sos cales issa l'at corfidu pro isballiu. No chèrgio difatis pensare chi una fèmina indiritzat richiamos sessuales conca a màsculos chi no chèrgiat corfire cun issos. Sa risposta de su màsculu a sos richiamos sessuales chi at retzidu, sunt richiamos sessuales fintzas issos, sebbene tèngiant forma diversa. Mentras sos richiamos de sa fèmina conca a su màsculu sunt prevalentemente de tipu visivu, cuddos de su màsculu conca a sa fèmina sunt a s'ispissu de tipu vocale-uditivu, carchi borta fintzas tàtile. Su màsculu emitit duncas sonos de inecuivocàbile cuntenutu sessuale, opuru toccat cun sa manu sas partes de richiamu sessuale femminile chi l'ant richiamadu. Retzende custos richiamos sa fèmina traet a s'ispissu unu malessere emotzionale paragonàbile a cuddu chi traet su màsculu retzende cuddos de sa fèmina. Sebbene carchi borta su màsculu umanu emitat custos richiamos suos sonoros o tàtiles fintzas sena chi sa fèmina apat pretzedentemente emìtidu sos richiamos visivos pròpios, apo constatadu chi in sa majoria de sos casos est sa fèmina a emìtere pro prima sos signales visivos pròpios, a sos cales su màsculu, cando no resessit a si reprìmere, rispondet cun sos suos.
Cussu chi a sos innotzentes ogros estraterrestres meos aparet spassosìssimu proite assurdamente grottescu in su cuntestu de sa presunta tzivilidade de su gasi naradu èssere umanu, ispetzie presunta intelligente de custu pianeta sinono coerente, est chi b'at in sos èsseres umanos manna disparidade de giudìtziu rispetu a su fatu de causare a sos indivìduos de sessu opostu a su pròpiu, malessere emotzionale mediante s'emissione de sos caraterìsticos richiamos sessuales pròpios. In àteras paràulas, siat màsculos che fèminas sunt prevalentemente de acordu chi sa fèmina apat su prenu diritu de corfire cale si siat màsculu atobiadu pro caminu cun sos potentes richiamos sessuales visivos pròpios, causèndeli eventuale malessere emotzionale, mentras s'òmine no apat diritu de corfire cale si siat fèmina atobiada pro caminu cun sos richiamos sessuales vocales pròpios, o moderadamente tàtiles, causèndeli eventuale malessere emotzionale. Sos richiamos sessuales masculinos benint giamados "atos de lìbidine", proite evidentemente servint a su màsculu pro comunicare sa lìbido sua a sa fèmina conca a sa cale los cumpit. Curiosamente, sos richiamos sessuales femminiles no benint giamados "atos de lìbidine", benché evidentemente servant a sa fèmina pro comunicare sa lìbido sua a totu sos màsculos chi sunt in gradu de la bìdere. Dae su modestu puntu de vista estraterrestre meu mi paret chi sa fèmina umana, mustrende o evidentziende sas partes sessuales de su corpus pròpiu, cumpit automàticamente "atos de lìbidine" conca a chiesisiat bidèndela gasi proat su malessere emotzionale de cui amus giai faeddadu.
No dia chèrrere chi calicunu pensaret male de nois estraterrestres proite naro cussu chi bido.
Sa natura, òviamente, no si curat de sos pregiudìtzios de sas species inferiores comente cussa umana a cui deo no aparteno, e in su tempus riequìlibrat sas asimmetrias chi no tenent sensu.
Si in venidore sas fèminas umanas ant a lantzare semper de prus sos richiamos sessuales issoro esibende in dogni logu nàdigas e petus, semper prus a s'ispissu unfrados de silicone, at a acadèssere gasi prima o poi, fatalmente, chi sos màsculos umanos s'emantzìpint dae s'archètipu culturale chi galu los mantenet dae fàghere totus semper su matessi, e s'adeguent a fàghere totus su matessi, e semper.
Custu est cussu chi deo apo notadu, dae su puntu de vista estraterrestre meu. Custos problemas personalmente no mi toccant, dadu chi nois de sa specie estraterrestre mea semus sessualmente autòctonos, e unu die bos apo a ispiegare ite custu significat.
Pensade bene a cussu chi bos apo naradu, dadu chi a pustis de totu no bos capitat totu sos dies chi un'estraterrestre bos fatzat notare cosas subra su modu de bìvere bostru chi issu resessit a bìdere isceti proite est un'estraterrestre, e no tenet gasi interessu personale in sa vicenda de s'esistèntzia umana. Pensàdebi, sena bos cunvìnchere chi deo tèngia torto sena mancu bi àere pensadu. No potzo difatis àere torto, proite no apo espressu peruna opinione. Bos apo isceti contadu ite si bidet dae inoghe subra dae ue deo bos bido, e no creades chi apa bidu male, proite tèngio una òtima vista. Ponìdebos a su postu meu e abbaidàdebos, e fintzas bois azis a àere unu pagu de sa sabidoria estraterrestre mea.

Roberto Quaglia