a invît chiónqued al séppa drî a lèzer sti réghi, séppa ló o äla mâstil o fàmmina o tótt e dû o inción di dû, a an pinsèr brîṡa al sèss ed chi l'à scrétt quall ch'té t î drî a lèzer. Chi al scrîv, par té incû an gh à sèss, anzi, chi al scrîv incû an eṡésta brîṡa, par té. Ai é såul sti parål e té t äli lêż.
Inción dånca l'à scrétt sti parål. Sti parål äli rispêcien un pónt ed vésta asêttich, luntàn, asesuè, cme quall d'un extraterèster idêèl. Ecco, s'pròpri t vå imaginèr quelcdón ch'al séppa al responsâbil ed quall ch't lêż, cunsîderum al tå ûspit extraterèster.
A sån dånca virtualmänt un extraterèster, gentilmänt ospitè dala tå mänt e i så dintûren, ważvàira la societè ed cui t î pèrt. An cgnóss brîṡa i våster concèt ed Bän e ed Mèl, parché an ò brîṡa i våster preconzèt, e dånca par evitèr ed fèr l'ón o l'èter an fâg gnínt, mo naturalmänt a parl, e a descrîv quall ch'a vèd. A spêr ed brîṡa fèr dal Mèl o dal Bän sänplizemänt parländ, mo in fén di cånt l'é l'ónica licänza ch'a m ciâp.
Dal pónt ed vésta extraterèster, äli consuetûdin sesuèli d'una societè ch'an s cgnóss brîṡa äli én ón di argomänt ed pió efficâz traṡtóll. A parlarò alåra ed quall ch'ed pió bóff a i ò observè in tèl våstri abitûdin.
Par cåṡmica decänza an entr brîṡa int al particolèr di våster féṡich incâster amoråuṡ. A m astègn pûr dal sciocamänt repêter tótt quant a vuèter perfetamänt nòt, par an anuièrv. In efèt av parlarò ed quall ch'a i ò observè di våster cumpurtamänt sesuèl brîṡa quand ai é un rapôrt sesuèl conclamè, mo quand an ai é brîṡa.
Quall che in môd particolèr l'à difâti atirè la mî atenziån l'é la våstra curiåuṡa modalitè ed relazionèrv tra un sèss e l'èter pròpri quand ai é totèl asänza ed rapôrt sesuèl conclamè.
Oviamänt an ai é gnínt da dîr ed quand i mâsti e äli fàmmin i én completamänt separè i ón dai èter, féṡicamänt e sensorialmänt, parché alåra gnínt tra mâsti e fàmmin al capita.
Mo apêna i s artråven a cundivîder i stàss spâzi, ecco che la situaziån la câmbia. Anc s'an s cgnóssen brîṡa, mâsti umàn e fàmmin umèni i an un rezéproch cumpurtamänt sesuèl. I fan ważvàira däli cås ch'äli cauṡen efèt ed natûra sesuèl in vatta a chi dal sèss opåst.
Tèl efèt i pålen naturalmänt èser piaṡêvvol o dspiaṡêvvol, e i én difâti sänper o l'ón o l'èter o tótt e dû.
Particolarmänt bóff, dal mî pónt ed vésta extraterèster, i én i efèt negatîv. L'é difâti la sofferänza la fazända pió intrigànt par chi an la subéss brîṡa, e la dvänta anc la pió bôfa quand int äli cauṡ ch'äli la determínen as côl l'elemänt asórd e dånca la natûra grotèsca. Dal mî pónt ed vésta extraterèster, côier sti cås l'é un żûgh da ragazû extraterèster.
Cme l'é ch'as registra un efèt negatîv? Beh, a psrén dîr ch'ai é un efèt negatîv quand un mâstil o una fàmmina, a cauṡa dla vṡéna preṡänza ed quelcdón dal sèss opåst, al pråva un säns ed malèser emozionèl. In quèlch câṡ, a i ò notè, al pèr dabån ch'mâsti e fàmmin ch'an s cgnóssen brîṡa i fâghen a gèra par infliżeres a vicanda tèl malèser emozionèl.
Al malèser emozionèl pió frequentemänt pruvè dal mâstil, truvàndes qué vṡén a una fàmmina, l'é cauṡè dala sänplice osservaziån dla fàmmina, spêzie s'ed äla i én viṡébbil o evidenziè i genitèl, o tèl zån dal côrp ch'äli fónżen da richiâm sesuèl. L'é curiåuṡ cme al bâsta acsé påch par cauṡèr malèser emozionèl int la pió granda pèrt di mâsti. Evidentemänt, al mâstil l'é bän sensébbil a rigôrd ed zêrt så istint, e quand al subéss un richiâm sesuèl al sofr s'an i é permàss ed rispånder a låu. Pió fôrt l'é dånca al richiâm sesuèl, pió grand l'é dånca al malèser emozionèl dal mâstil al quèl an é cunzès ed rispånder a tèl richiâm.
Al malèser emozionèl pió frequentemänt pruvè dala fàmmina, truvàndes qué vṡén a un mâstil, l'é ch'al mâstil al rispånda ai richiâm sesuèl con i quèl lî la l à culpé par ṡbâli. An vói difâti pinsèr ch'una fàmmina la indiréza richiâm sesuèl vêrs mâsti ch'an våla brîṡa côier con låur. La rispôsta dal mâstil ai richiâm sesuèl ch'l'à ricevó, i én richiâm sesuèl anca låur, anc s'i âbien fårma dṡvêrsa. Mäntr i richiâm dla fàmmina vêrs al mâstil i én prevalentemänt ed tîp viṡîv, chi dal mâstil vêrs la fàmmina i én spass ed tîp vochèl-auditîv, däli vôlt anc tâtil. Al mâstil al emétt dånca sån d'inequivocâbil cuntgnó sesuèl, opûr al tåca con man äli pèrt ed richiâm sesuèl femminén ch'äli l an richiamè. Ricevänd tèl richiâm la fàmmina la câva spass un malèser emozionèl paragonâbil a quall ch'al câva al mâstil ricevänd chi dla fàmmina. Anc s'däli vôlt al mâstil umàn al emétta tèl så richiâm sonår o tâtil anc sänza che la fàmmina la âbia precedentemänt emàss i så richiâm viṡîv, a i ò constatè che int la magioranza di câṡ l'é la fàmmina a emétter par prémma i så segnèl viṡîv, ai quèl al mâstil, quand an rîṡ a reprémmres, al rispånd con i så.
Quall ch'ai mî inozänt ûć extraterèster al pèr spassoṡéssum parché aṡurdamänt grotèsch int al contèst dla preṡónta ziviltè dal acsé détt èser umàn, spêzie preṡónta inteligänta ed st'pianêta altrimänti coeränt, l'é ch'ai é int i èser umàn granda disparitè ed giudézzi rispèt al fât ed cauṡèr ai individui ed sèss opåst al så, malèser emozionèl mediànt l'emisiån di så caratteréstech richiâm sesuèl. In ètri parål, sî mâsti che fàmmin i én prevalentemänt d'acôrd che la fàmmina la âbia al pîn dirétt ed côier qualsîasi mâstil al incåntra par strè con i så potänt richiâm sesuèl viṡîv, cauṡàndegh eventuèl malèser emozionèl, mäntr l'Òm an âbia dirétt ed côier qualsîasi fàmmina al incåntra par strè con i så richiâm sesuèl vochèl, o moderatamänt tâtil, cauṡàndegh eventuèl malèser emozionèl. I richiâm sesuèl mâstil i vénnen ciamè "ât ed libédin", parché evidentemänt i servéssen al mâstil par comunichèr la så libido ala fàmmina vêrs la quèl al i compéss. Curiosamänt, i richiâm sesuèl femminén an vénnen brîṡa ciamè "ât ed libédin", anc s'evidentemänt i servéssen ala fàmmina par comunichèr la så libido a tótt i mâsti ch'i én bón ed vàdderla. Dal mî modèst pónt ed vésta extraterèster am pèr che la fàmmina umèna, mostränd o evidenziänd äli pèrt sesuèli dal så côrp, la compéssa automâticamänt "ât ed libédin" vêrs chiónqued vdàndla acsé al pråva al malèser emozionèl ed cui a gh avän bèle parlè.
An vrévv ch'quelcdón al penséss mèl ed nuèter extraterèster parché a dâg quall ch'a vèd.
La natûra, oviamänt, an s cûra brîṡa di pregiudézzi däli spêci inferiåuri cme cla umèna a cui mé an apartègn brîṡa, e int al tänp la riequilîbra äli asimetrî ch'an an säns.
Se in futûr äli fàmmin umèni äli lanzaràn sänper ed pió i så richiâm sesuèl eṡibänd datócc' cûl e tétt, sänper pió spass gånf ed silicån, al capitarà dånca prémma o dåp, fatalmänt, ch'i mâsti umàn i s emancipéssen dal archetîp culturèl ch'ancåura al i tratén dal fèr tótt sänper ètartànt, e ch'i s adeguéssen a fèr tótt ètartànt, e sänper.
Quasst l'é quall ch'mé a i ò notè, dal mî pónt ed vésta extraterèster. Sti problêma personalmänt an m tåchen brîṡa, dâto che nuèter dla mî spêci extraterèster a sän sesualmänt autòcton, e un dé av spiegarò csa quasst al significhéppa.
Pensè bän a quall ch'av ò détt, dâto che dåpotótt an v capita brîṡa tótt i dé ch'un extraterèster av fâga notèr däli cås in vatta al våster môd ed vîver ch'ló al rîṡ a vàdder såul parché l'é un extraterèster, e an gh à dånca interès personèl int la vicanda dl'eṡistänza umèna. Pensèghi, sänza convénzerv ch'mé a âbia tôrt sänza gnanc avairegh pinsè. An pås difâti avair tôrt, parché an ò espràss inciåna opiniån. Av ò såul cuntè csa as vadd da quasó da indóv mé av vèd, e an cardî brîṡa ch'a âbia vést mèl, parché a i ò un'utma vésta. Mettîv al påst mî e guardèv, e anca vuèter a avrî un påch dla mî savièza extraterèster.

Roberto Quaglia