invîto chiunque o stâ lezéndo ste rîghe, segge lê ò lê màscio ò fémmina ò tûtti dôi ò nisciùn di dôi, a no pensâ a-o sèsso de chi o l'à scrîto quéllo ch'ti stæ lezéndo. Chi o scrîve, pe tì ancheu o no l'à sèsso, ànsi, chi o scrîve ancheu o no existe, pe tì. Ghe són sôlo ste paròlle e tì ti ê lêzi.
Nisciùn coscì o l'à scrîto ste paròlle. Ste paròlle rispêgian 'n pónto de vìsta asètico, lontàn, asessoòu, cómme quéllo de 'n extraterèstre ideâle. Ècco, se pròpio ti vêu imaginâ quarchedùn ch'o segge o responsàbile de quéllo ch'ti lêzi, conscìderame o teu òspite extraterèstre.
Són coscì virtoalménte 'n extraterèstre, gentilménte ospitòu da-a teu ménte e i seu dintórni, vêuo dî a societæ de cûi ti t'ê pàrte. No conóscio i vòstri concètti de Bén e de Mâ, perché no ò i vòstri preconcètti, e coscì pe evitâ de fâ l'ùn ò l'âtro no fàsso ninte, ma naturalménte pàrlo, e descrîvo quéllo ch'véddo. Spêro de no fâ do Mâ ò do Bén sénpliceménte parlàndo, ma in fìn di cónti a l'é l'ùnica licénsa ch'me pîggio.
Da-o pónto de vìsta extraterèstre, e consoetùdine sessoâli de 'na societæ ch'no se conósce són ùn di argoménti de ciù efiçâce trastûllo. Parliò alôa de quéllo de ciù bùffo ch'ò osservòu in tâli vòstre abitùdine.
Pe còsmica deçénsa no intro into particolâre di vòstri fìxichi incàstri amorôxi. Me astêgno pûre da-o tòscaménte repéte tûtto quéllo a vôtri perfètamente nòto, pe no annoiâve. In efètti ve parliò de quéllo ch'ò osservòu di vòstri conportaménti sessoâli no quànde gh'é 'n rapòrto sessoâle conclamòu, ma quànde no gh'é.
Quéllo ch'a-a mainêa particolâre o l'à defæti atiròu a mæ atençión o l'é a vòstra curiôza modalitæ de relaçionâve tra 'n sèsso e l'âtro pròpio quànde gh'é totâle asénsa de rapòrto sessoâle conclamòu.
Evidenteménte no gh'é ninte da dî de quànde i màsci e e fémmine són conpletaménte separæ i ùn da-i âtri, fixicaménte e sensorialménte, perché alôa ninte tra màsci e fémmine o capìte.
Ma apénn-a se atrêuvan a condivìdde i mæximi spàçi, ècco ch'a situaçión a càngia. Ànche se no se conóscian, màsci umàn e fémmine umànn-e àn 'n reçìproco conportaménto sessoâle. Fàn vêuo dî de-e cöse ch'càuzan efètti de natûa sessoâle in sci quélli do sèsso opòsto.
Tâli efètti pêuan naturalménte èse piaxévoli ò spiaxévoli, e són defæti sénpre ò l'ùn ò l'âtro ò tûtti dôi.
Particolarménte bùffi, da-o mæ pónto de vìsta extraterèstre, són i efètti negatîvi. A l'é defæti a soferénsa a facénda ciù intrigànte pe chi no a â subìsce, e a devénta ascì a ciù bùffa quànde inte càuze ch'a â determìnn-a se cêuge l'eleménto assùrdo e coscì a natûa grotésca. Da-o mæ pónto de vìsta extraterèstre, cêugge ste cöse o l'é 'n zêugo da figeu extraterèstri.
Cómm'o l'é ch'se registra 'n efètto negatîvo? Beh, poriéiscimo dî ch'gh'é 'n efètto negatîvo quànde 'n màscio ò 'na fémmina, pe câuza da vixìnn-a prezénsa de quarchedùn do sèsso opòsto, o pròva 'n sénso de malèsse emoçionâle. In quàrche câxo, ò notòu, o pâ pe davéi ch'màsci e fémmine ch'no se conóscian fàssan a gâra pe inflìzise a viçénda tâli malèssci emoçionâli.
O malèsse emoçionâle ciù frequenteménte provòu da-o màscio, atrovàndose inti prèssi de fémmina, o l'é causòu da-a sénplice osservaçión da fémmina, speçialménte se de quélla són vixìbili ò evidençiæ i genitâli, ò tâli zòne do còrpo ch'fùngan da richiàmo sessoâle. O l'é curiôzo cómme o bàste coscì pöco pe causâ malèsse emoçionâle inta ciù gràn pàrte di màsci. Evidenteménte, o màscio o l'é tànto sensìbile riguàrdo çèrti seu istìnti, e quànde o subìsce 'n richiàmo sessoâle o sòffre se no ghe l'é permìsso de rispónde a quéllo. Ciù fòrte o l'é coscì o richiàmo sessoâle, ciù grànde o l'é coscì o malèsse emoçionâle do màscio a-o quæ no ghe l'é concèsso de rispónde a tâle richiàmo.
O malèsse emoçionâle ciù frequenteménte provòu da-a fémmina, atrovàndose inti prèssi de 'n màscio, o l'é ch'o màscio o rispónde a-i richiàmi sessoâli co-i quæ lê a l'à colpîo pe sbàglio. No vêuggio defæti pensâ ch'a 'na fémmina a indirîssa richiàmi sessoâli vèrso màsci ch'a no vêugge colpî con quélli. A respòsta do màscio a-i richiàmi sessoâli ch'o l'à riçevûo, són richiàmi sessoâli ascì lô, ànche s'l'àbbian fórma despâeìa. Méntre i richiàmi da fémmina vèrso o màscio són prevalenteménte de tîpo vixîvo, quélli do màscio vèrso a fémmina són despésso de tîpo vocâle-auditîvo, quàrche vòtta ascì tàtile. O màscio o emétte dónca seunni de inequivocàbile contegnûo sessoâle, ò pûre o tócca con màn e pàrti de richiàmo sessoâle féminìli ch'ô l'àn richiamòu. Riçevéndo tâli richiàmi a fémmina a tîa despésso 'n malèsse emoçionâle paragonàbile a quéllo ch'o tîa o màscio riçevéndo quélli da fémmina. Ànche se quàrche vòtta o màscio umàn o emétte tâli seu richiàmi sonôri ò tàtili ascì sénsa che a fémmina a l'àbbie preçedenteménte emisso i seu richiàmi vixîvi, ò constatòu che inta magiorànsa di câxi a l'é a fémmina a emétte pe primma i seu segnâli vixîvi, a-i quæ o màscio, quànde o no reûsce a reprìmise, o rispónde co-i seu.
Quéllo ch'a-i mæ inoçénti éuggi extraterèstri o pâ spassozíscimo perché assurdaménte grotésco into contèsto da prezùnta civiltæ do cosídétto èsse umàn, speçialménte prezùnta inteligénte de sto pianéta âtriménti coerénte, o l'é ch'gh'é inti èsi umàn grànde disparitæ de giudìçio rispètto a-o fæto de causâ a-i indivìddoi de sèsso opòsto a-o seu, malèsse emoçionâle mediànte l'emisción di seu caraterìstichi richiàmi sessoâli. In âtre paròlle, segge màsci che fémmine són prevalenteménte d'acòrdo ch'a fémmina a l'àbbie o pìnn-o drîto de colpî quæ se sîa màscio o incóntre pe stràdda co-i seu poténti richiàmi sessoâli vixîvi, causàndoghe eventoâle malèsse emoçionâle, méntre l'òmmo o no l'àbbie drîto de colpî quæ se sîa fémmina o incóntre pe stràdda co-i seu richiàmi sessoâli vocâli, ò moderataménte tàtili, causàndoghe eventoâle malèsse emoçionâle. I richiàmi sessoâli màsci vêgnan ciamæ "àtti de libìdine", perché evidenteménte sèrvan a-o màscio pe comunicâ a seu lìbido a-a fémmina vèrso a quæ ê cómpie. Curiozaménte, i richiàmi sessoâli féminìli no vêgnan ciamæ "àtti de libìdine", ànche s'evidenteménte sèrvan a-a fémmina pe comunicâ a seu lìbido a tûtti i màsci ch'són in grâdo de védla. Da-o mæ modèsto pónto de vìsta extraterèstre me pâ ch'a fémmina umànn-a, mostràndo ò evidençiàndo e pàrti sessoâli do seu còrpo, a cómpie automaticaménte "àtti de libìdine" vèrso chiunque vedéndola coscì o pròva o malèsse emoçionâle de cûi émmo za parlòu.
No voriéiva ch'quarchedùn o pensésse mâ de niâtri extraterèstri perché dîggo quéllo ch'véddo.
A natûa, evidenteménte, a no se cûa di pregiudìçi de-e spêce inferiôri cómme quélla umànn-a cûi mì no apartêgno, e into ténpo a reequilìbra e asimmetrîe ch'no l'àn sénso.
Se in futûro e fémmine umànn-e lanceràn sénpre de ciù i seu richiàmi sessoâli ezibéndo dôvonque nàtighe e séni, sénpre ciù despésso gónfi de silicón, o sucederâ coscì prìmma ò dòppo, fatalménte, ch'i màsci umàn se emancìpan da l'archetìpo culturâle ch'ancón ê retêgne da-o fâ tûtti sénpre altretànto, e se adêgoan a fâ tûtti altretànto, e sénpre.
Questo o l'é quéllo ch'mì ò notòu, da-o mæ pónto de vìsta extraterèstre. Sti problêmi personalménte no me tóccan, dæto ch'niâtri da mæ spêce extraterèstre sémmo sessoalménte autòctoni, e 'n giórno ve spieghiò cöse questo o significa.
Pensæ bén a quéllo ch've l'ò dîto, dæto ch'dòppotùtto no ve càpita tûtti i giórni ch'un extraterèstre o ve fàsse notâ de-e cöse in sciô vòstro mòddo de vîve ch'lê o reûsce a védde sôlo perché o l'é 'n extraterèstre, e o no l'à coscì interèssci personâli inta viçénda de l'existénsa umànn-a. Pensæghe, sénsa convìnçive ch'mì àbbie tòrto sénsa manco avéighe pensòu. No pòsso defæti avéi tòrto, perché no ò espresso nisciùnn-a opinión. V'ò sôlo contòu cöse se vedde da quasciù da dôve mì ve véddo, e no credéi ch'àbbie vìsto mâ, perché ò 'na ótima vìsta. Mettéive a-o pòsto mæ e goardæve, e ascì vôtri avéi 'n pö da mæ saviézza extraterèstre.

Roberto Quaglia