in prinsìpio el gera el caos, cussì almanco se dise o se ga dito e forse se dirà senpre de pì. E alora, che'l caos el sia!
Rumori de fondo. Balbetii inintelizìbili. Frusiamento. Atributi del caos, ma no ancora caos. Fìsica indeterminìstica, quanti de qua e de là, quanti quanti se lassarà quantizar e quando? Qual xe el filo che'l lega i fili, la metàfora che la disolve le metàfore?
Che in prinsìpio ghe fuse el Verbo lo sa anca le creature. Ma prima del verbo ghe gera la spirale, màgica forma da cui tuto se genera. L'argomento el sorze de par sé da un caos poco stàbile, che za el se disolve inte la autocostrusion de na parvensa de significato condivisìbile. La spirale. La spirale. La spirale la xe la forma de la nostra galàsia. La spirale la xe la forma de na conciglia. La spirale la sorze in ogni televisor de par sé quando puntemo na telecàmera inpisà verso el schermo che'l ne trasmete la imàgine prodota. La sorze cussì, da'l nula, spontanea, perfeta inte la autoprodota so geometria, dinàmica inte la parvente so rotasion armònica. Nissun la ga creà. Eła la sorze da queło che ciamemo un efeto de retroasion tra la telecàmera e el monitor. Ma el fato che noaltri la ciamemo cussì par gnente la spiega. La spirale la xe na forma geomètrica inportantìsima che mai ne insegna a scoła, indove ne droga la mente co le fùtili coordinà dei quadrati, dei triàngoli e de le so stùpide ipotenuse. Mai un seno però a la spirale, forma geomètrica conplesa e inefàbile, orìgine de tuto queło de conpleso che conosemo, noaltri conprese. Eh, sì, el nostro DNA, queła superba molècoła che la contien el nostro còdice genètico, ovaro el progeto de costrusion de ogni mìnima parte de noaltri stesi, el ga na forma elicoidal, pì sìmile a na spirale che a un quadrato anca irto de ipotenuse.
Ma parché intestardirse su la spirale? D'acordo che quasi nissun el se ga tormentà pì de tanto su i misteri de sta forma cussì inportante, ma deso che la gavemo mensionà mudemo el verso del nostro sguardo.
Eco de novo qualche seno de caos, cuna de ogni favila de autèntica novità. Forsemo el caos a acopiarse su sé, abandonemo i significati, significhemo i abandoni e abindolemo aloch. Zovemo a queło de zovial che za semo sensa saver de èser, sinzemo el nonsenso co'l lapà porpacio de un dio sconeso da queł sarvèło che da autèntico dèspota el ne istiga a fornirghe brani de significansa conclamà.
Inerpichémose su la metàfora che co l'inerpicarse la suzerise significati che no sviłuparemo pì, sprofondémose inte la pì trista e deprèsa so sorèła, masinemo rane e pan rafermo da fermo, pornoperno de alusinà stabilità metalògica, enuclemo la parola enuclear sensa zontar altro.
Eco perbaco un saco de sensi densi che ti pensi un saco ma te par un poco un paco. Svaco de boca e de larinze, corde vocali incluse. Le muse le xe fuse, parołe astruse le infinocia quartieri mentali e paramentali. El scavesa el so coło da la cavesa el scavesacoło, e chi lo pol biasimar? Un Wagner de magmer musicaler. Crêpes Moana & Mandingo, Pana e Nutella, flambé con ghirigori de onto. Sarvèli evaporà a iosa e a foja no i produse noia, ma a noia i conduse. Salti de mente i s'ciude vision de eoni de idee, opur no, ma intrìnsecamente sì condìo de no e ornà a forsa.
Poareto chi significati serca indove significati latita, rico chi significati alusina inte'l medèsimo luogo, opur poareto lo steso proprio indulzendo a sto gesto, ma con minor arte.
Rege el caos, o forse no, latita par serto el progeto e l'emisfero sinistro el dorme inte'l so serebrantro endocrànico.
Putanezamento inpudente e inpunìo, parché ti prosighi in te steso? Domanda osiosa, come osioso el xe tuto el sublime, sublime ecelso e sublime ìnfimo. L'osio el xe el pare de tute le idee. Se le se abortise scaturise i visi, aborti de idee. I visi, pieni de tuto el poder canziante de le idee, ma monchi de lore. I visi no i pol èser visiosi. I visiosi invese lo xe.
Odiosi visiosi e visiosi noiosi, tut'e do neglèti e inperfeti. Meti che i gati i sia mati, se te ne fote permeti che i cola i sachi, no so se me spiego ma so che no me spiego e lo fao aposta, parché go la facia tosta.
Basta. Chi el se inpasta aposta con parołe poste a caso el finise malacio. No ghe la fao. Ma me conpiaso de quanto son pajaso. Cavo el seno fora de sé e de mi, e diferensa no ghe xe. La rima la fa rima parché la xe in rima. Ma no la ga la mia stima. Se stima che la rima la gavesimo in testa prima, prima de l'alba del seno, e questo lo savemo co'l seno de poi, praticamente deso. A l'alba de l'omo se viveva in riga e in rima. Vestìgia de tut'e do, entità stranbe, le permane ancuo.
Volzemo la testa abandonando la rima o queło che rima el par a'l destino de oblìo pròprio. Un giorno futuro la rima la sparirà infine dai umani discorsi e pensieri, par senpre, come el xe sparìo el peło da la nostra pele e sparirà i denti del giudisio e forse anca i altri. Un giorno futuro, forse anca lontan, in queł spasio metafòrico che secondo noaltri el xe el tenpo. El sucederà quando i significati che i se àgita in noaltri i se sarà liberà dai àbiti simieschi e post-simieschi, e i vivarà par intiero de la so natura metafòrica, abandonando, come el serpente el abandona la so pele smesa, l'antica natura formal musical-rìtmica.
Ve xe oscuro queło che mi fin a deso go espreso? Sìene liete. El xe oscuro anca a mi o cussì finzo che'l sia inte'l timor che'l sia davero malgrado a mi el para no èserlo.
Scusè, eh.

Roberto Quaglia