in prinzipi l'era el caos, inscì almen se dis o se è ditt e forsi se disarà semper de pü. E alora, che el caos el sia!
Rümor de fond. Balbettii ininteligìbil. Frusciament. Attribüt del caos, ma minga ancamò caos. Fìsica indeterminìstica, quant de ccà e de là, quant quant se lassarann quantizzà e quand? Qual l'è el fil che liga i fil, la metàfora che dissòlv i metàfor?
Che in prinzipi ghe füss el Verb el sann anca i creatür. Ma prima del verb ghe stava la spiral, màgica forma de cui tütt se genera. l'argoment el surg de per sé de on caos pòcch stàbil, che già el se dissòlv in la autocostrüzion de ona parvenza de significaa condivisìbil. La spiral. La spiral. La spiral l'è la forma de la nòstra galàssia. La spiral l'è la forma de ona cuncìglia. La spiral la surg in ògni televisor de per sé quand pontèmm ona telecàmera impizzada vers el schèrm che el ne trasmett la imàgin prodotta. La surg inscì, del nüll, spontanea, perfetta in la soa autoprodotta geometrìa, dinàmica in la soa parvent rotazion armònica. Nissün la l'ha creada. Essa la surg de quell che ciamèmm on effett de retroazion tra la telecàmera e el monitor. Ma el fatt che nün la se ciama inscì la spiega per nagòtt. La spiral l'è ona forma geomètrica importantìssima che mai ne insègnen a scòla, indoe ne dròghen la ment con i fùtil coordinaa di quadraa, di triàngoi e di soo stüpid ipotenüs. Mai on cenn però a la spiral, forma geomètrica complessa e ineffàbil, orìgin de tütt quell de compless che conossèmm, nün compres. Eh, sì, el nòster DNA, quela süperba molècola che la contègn el nòster còdes genètich, ovvèro el progett de costrüzion de ògni mìnima part de nün istess, el gh'ha ona forma elicoidal, pü sìmil a ona spiral che a on quadraa anca irt de ipotenüs.
Ma perché intestardìss sora la spiral? D'acòrd che quasi nissün el s'è tormentaa pü de tant sora i mister de sta forma inscì importanta, ma adess che l'èmm menzionada mütèmm el vers del nòster sguard.
Ecco de noeuv quaich cenn de caos, cüna de ògni faliscia de autèntica novità. Forzèmm el caos a acopiàss sora sé, abandonèmm i significaa, significhèmm i abandon e imbroièmm i alòcch. Giovèmm a quell de giovial che già sèmm senza savè de vèss, cingèmm el nonsens con el lappaa porpacc de on dit sconness de quel cervell che de autèntich dèspota el ne istiga a fornìgh bràngh de significanza conclamada.
Inerpichèmmes sora la metàfora che con l'inerpicàss la sügeriss significaa che svilüpparèmm pü, sprofondèmmes in la soa sòra pü trista e depressa, mascinèmm ran e pan rafferm de ferm, pornopern de alücinada stabilità metalògica, enüclèmm la parola enücleà senza gionger alter.
Ecco perbacch on sacch de sens dens che te pensi on sacch ma te par on poo on pacch. Svacch de bòca e de laringe, còrd vocal inclüs. I müs hinn füs, parol astrüs infinòcchien quartier mental e paramental. El scavezza el sò còll de la cavezza el scavezzacòll, e chi el pò biasimà? On Wagner de magmer musicaler. Crêpes Moana & Mandingo, Panna e Nutella, flambé con ghirigòr de ont. Cervei evaporaa a iosa e a foia prodüsen minga noia, ma a la noia condüsen. Salt de ment schiüden vision de eon de idee, opür no, ma intrìnsecament sì condii de no e ornaa a fòrza.
Pòver chi significaa el cerca indoe significaa latìten, ricch chi significaa el alücina in del medèsim loeugh, opür pòver istess pròpi indülgend a sto gest, ma con minor art.
El regg el caos, o forsi no, el latita de sigür el progett e l'emisfer sinìster el dòrm in del sò cerebrantro endocrànich.
Putaneggiament impüdent e impünii, perché el proseguiss in tì stess? Domanda oziosa, come ozios l'è tütt el süblim, süblim eccels e süblim ìnfim. l'òzi l'è el pà de tütt i idee. Se se i abortiss scaturìssen i vizzi, abòrt de idee. I vizzi, pien de tütt el poter cangiant di idee, ma mónch de essi. I vizzi pòden minga vess vizios. I vizios inveci el hinn.
Odios vizios e vizios nojos, tütt düü neglett e imperfett. Metti che i gatt sìen matt, se te ne fott permetti che còlen i sacch, soo minga se me spieghi ma soo che me spieghi minga e el foo apòsta, perché gh'hoo la facia tòsta.
Basta. Chi el s'impasta apòsta con parol pòst a casacc el finiss malacc. Ghe la foo minga. Ma me compiasi de quant sont pajasc. Cascio el senn foeura de sé e de mì, e diferenza ghe n'è minga. La rima la fà rima perché l'è in rima. Ma la gh'ha minga la mia stima. Se stima che la rima l'avéssom in crapa prima, prima de l'alba del senn, e questo el savèmm con el senn de poeu, praticament adess. A l'alba de l'òmm se viveva in riga e in rima. Vestigia de tütt düü, entità stramb, permàngen incoeu.
Volgèmm la crapa abandonand la rima o quell che rima el par al destin del pròpri obli. On dì fütür la rima la scomparirà infin di üman discors e penser, per semper, come el scomparett el pel de la nòstra pell e scomparirann i dent del giüdizzi e forsi anca i alter. On dì fütür, forsi anca lontan, in quel spazzi metafòrich che second nün l'è el temp. El sücedarà quand i significaa che se agìten in nün se sarann liberaa di àbit scimiesch e post-scimiesch, e vivarann per intregh de la pròpria natüra metafòrica, abandonand, come el serpent el abandona la soa pell smessa, l'antìga natüra formal müsical-rìtmica.
V'è oscür quell che mì fina adess hoo espress? Sìene liet. L'è oscür anca a mì o inscì fingi che el sia in del timor che el sia denver malgrad a mì el para minga vèssel.
Scüsee, eh.

Roberto Quaglia