capita quacche vota ca se senta 'a voglia o 'o bisogno (doje sensazione sòre) 'e penzà o 'e dìcere o 'e scrìvere quaccosa 'e 'ntelligente, unite ô timore 'e nun essere 'n grado. Se tène 'a consapevolezza ca se putarrìa, pure sapenno ca 'n chillu istante nun se po'. 'E penziere sò cunfuse, ma nun tanto 'a nun sapé ca 'o sò. È 'na condizione frustrante, pecché ce se addona 'e arrivà a 'nu passo 'a penziere ca suddisfarrìano 'a esigenza ca nuje avvertimmo 'e 'e penzà, senza ca però lloro sùrgano o pure sulamente appàiano pe 'n istante dint'â mente nosta. Ce sentimmo stùpede, assaje 'e cchiù 'e chi maje ha penzato 'e ll'essere semplicemente pecché nun lle è maje venuto 'mmente, fórzo pecché 'o è.
Succede po' ca sti istante se protràggano, addiventanno periode e 'ntere fase d''a vita. 'N tale circustanze, 'a cuscienza fatica a rummané ancorata a 'na linea 'e penziere pe cchiù 'e quacche breve minuto. ll'entropia, tanto pe aduperà 'na parola difficile, è 'n agguato e colpisce a funno. Che vo' dìcere sta frase? Facite finta 'e niente. Tanto pe rénnere ll'idea ô meglio, nun ce farrammo scrùpolo 'e lassà ca stu fenòmeno se applica a nuje stesse ccà e mò. Sapènnolo 'n antìcepo, 'o lettore patarrà 'e meno, oppure no.
Simmo tutte 'ncastrate dint'â realtà, qualunque cosa sta frase voglia dìcere oppure dice suo malgrado. 'A realtà è 'nu pizzo buffo, pure pecché nun tène 'nu paesaggio ben definito. Defatte, 'e elemente cchiù semovente d''o paesaggio palèsano 'na grottesca attitùdene a passà chella parte d''o paesaggio ca lloro àmano etichettà cu 'o vocàbbolo "tiempo" a litigà ncopp'ô aspetto d''o paesaggio stesso. Troppo crìpteco? Ogne tanto 'o paesaggio è incomprensìbbile, 'o saccio, e è bene ca 'o sapite pure vuje, oppure no.
Dint'â realtà 'o paesaggio è tutto. Almeno d''o punto 'e vista 'e chella parte d''o paesaggio ca tène uocchie pe guardà, ovèro pe esempio nuje. Avite notato comme se fa cchiù concreto 'o discurzo quanno se tira 'n ballo chella si no trascuràbbile entità ca ce piace chiammà "nuje"? Nun ll'avite notato. Ma manco io, 'o cunfesso. Faceva sulo finta. Sto facenno finta 'n tutte 'e siense. E certo faccio pure senzo facenno finta accussì.
Qualunque discurzo se faccia, â fine se fernisce sempe a parlà d''a realtà. Maje protagonista fuje cchiù scanusciuta d''a diva nosta 'e sta lettera e 'e sta vita.
E si nun esistesse? Sarrìa 'nu bbuono colpo 'e scena. Tutte 'e cchiù penziruse penzature a penzà invano pe vite 'ntere a quaccosa ca nun ce sta. Nun è manco accussì sciocco penzà ca 'n realtà 'a realtà nun ce sia pe niente. Si ce fosse, quaccheduno ll'avarrìa truvata, 'a quacche parte, e ll'avarrìa mustrata attuorno, a ll'ate, e lloro (ll'ate), avarrìano istantaneamente capito ca se trattava proprio d''a realtà. 'A realtà vera nun po' lassà dubbie, nun po' venì interpretata. 'A realtà vera po' sulamente essere una, inconfondìbbile, evidente. Chille ca pretènnono 'e ce cuntà ca hanno truvato quaccosa ca secondo lloro sarrìa 'a realtà, ma ca a nuje pare 'na strunzata o peggio (o meglio... tanto nun cagna niente), evidentemente hanno pigliato 'n abbaglio, si no ce avarrìano istantaneamente cunvinte tutte.
'A realtà accussì è 'na ipòtese maligna, pecché 'a cercà intasa 'e già poco durèvole vite noste, distogliènno 'a attenzione nosta 'a chello ca cchiù conta. Nun saccio 'e che se tratta (chello ca cchiù conta), pecché evidentemente pure io songo 'ncastrato dint'a sta storia d''a realtà, comme fra parèntese pure tutte vuje (e pe "vuje" intenno chiunque 'n sta etichetta ama se ricanóscere, pe esempio chi legge, ma sulo pe esempio).
Simmo circundate dâ realtà, nun 'n senzo reale (avimmo stabilito ca nun esiste), ma 'n senzo metafòreco. Ovèro, 'a realtà ce ha 'ngaggiato dint'â trappula custituita dâ inesistenza soja.
Addovunque guardammo, amammo o odiammo crédere (ma sempe credimmo) 'e vedé 'a realtà. Ma pure addovunque ascutammo, tuccammo, addurammo, assaggiammo. Ce cumpiacimmo o ce dulimmo 'e percepì realtà addovunque. Eppure avarrìamo avé suspiette. Quante vvote vedimmo 'nu bìpede a forma 'e femmena umana o 'e màsculo umano e esclamammo penzànnolo: "Che bella figa (o figo)" e quaccheduno ô fianco nuosto obbietta ca figa o figo essa o isso pe niente nun è. È già 'n ste piccole cose ca 'a realtà se sputtana, tradenno 'a evidente inesistenza propia. Figuràmmoce 'e cose cchiù gruosse, comme quanno 'a realtà ca nun ce sta se traveste (o accussì ce pare) 'a Bene e 'a Male, causanno dissidie pure cchiù gruosse 'e chille inerente a 'e preferenze sessuale.
'A realtà ce perseguita, perfetta dint'â ostinata, indifferente e assoluta inesistenza soja.
Putarrìamo pure fernì 'e ne parlà, almeno nuje ca ce stammo addunanno ca nun ce sta. Se ne òccupano già 'n troppe, ca pretènnono a ogne occasione 'e ce spiegà che cosa 'a realtà sia, e a tale fine ce angùstiano senza tregua né impossìbbile pietà. Defatte, nun è fórzo ca pretennenno 'e spiegà cu tanta precisione chello ca 'a realtà non sia, nuje se cummetta 'n ùrtema ànalisi 'o stesso gesto ca cumpie chi tenta 'e spiegà chello ca essa sia? Nun è ll'errore insito proprio dint'â dimanna 'n sé?
Piantàmmela cu 'e dimanne sterile.
'A inesistenza d''a realtà addiventa evidente quanno 'e allucinazione ce còglieno. 'E metàfore intrapsìcheche collàssano e se confòndono, tradenno 'a natura lloro, appunto, 'e semplice metàfore, e nun 'e fedele specchio d''a realtà. 'A mente umana o chello ca nuje chiammammo accussì, è defatte 'nu mero costrutto 'e metàfore organizzate. Tìpeco 'e 'na metàfora è 'a funzione 'e rappresentà quaccosa comme ll'ànalogo 'e quacche cos'ato. Nisciuna metàfora è accussì 'a realtà. Pecché qualunque cosa, a cui nuje se penza, a ben penzàrce, è esclusivamente 'a metàfora 'e quacche cos'ato, che cosa ne cunzegue?
Ma nun vulévamo 'a fernì cu 'e dimanne sterile?
Sarrìa cchiù gradèvole occupà 'o tiempo nuosto a assaporà 'a descrizione 'e 'nu bbuono pranzetto culinario o pure sessuale, oppure ce godé direttamente 'o pranzo o 'o sesso o tutt'e dduje 'nzieme o quacche cos'ato ca nun me vène 'mmente pecché doppotutto tengo pure io 'e manie mije e penzo ca nun me biasimarrite troppo si ste manie cuinvòlgono 'a masticazione 'e magnà e 'a degustazione 'e siesse, garantenno comunque, a chiunque tra ste righe vaga assorbènnone 'o vago senzo, ca sti magnà e sti siesse tengo sempe cura 'e selezionà cu granne gusto pecché è proprio 'n funzione d''o gusto ca stu gusto m'induce ca me 'e gusto 'e gusto.
Me pare ca chesto pòzza p'oje abbastà, e pure sapenno ca chesto è illusorio oppure no 'a pianto ccà e accussì sia almeno pe 'nu poco.

Roberto Quaglia