me aprofitarò de la to esistensa, de la to atension, de la mia esistensa, de la mia atension e de sta mia létera par sviłupar i fondamenti de la mia "TEORIA DE LA UTILITÀ SOCIAL". No so se la sia granché come teoria, anca parché la xe pì che altro qualcosa che me xe venù in mente ultimamente par sopìr a'l orendo vodo concetual in mi da senpre esistente, parché go senpre rifiutà i preconseti precoti su'l fonsionamento de l'èser uman e àfini che i xe ancuo cussì de moda in tuti i sarvèli.
Premeto che quando parlo de "utilità" e de "social" no me riferiso asolutamente a qualcosa tipo valor che i àbia da èser positivi o negativi o tut'e do. Intendarò senpre le parołe "utilità" e "social" par el asètico significato tècnico so, sensa quełe acesion che le coinvolze un giudisio co le quali usualmente el vien trasfigurà el puro significato so. El xe questo el primo preconseto che gavemo da abolir, se volemo capirghe qualcosa de l'èser uman. Che qualcosa la sia ùtile no significa che la sia bona o giusta. El significa che la xe ùtile in senso fonsional e basta.
Questo premeso, pasemo a'l dunque e ai dintorni.
No'l xe serto na mia invension che l'èser uman el sia un animal social, ovaro che'l ga bisogno de intèser relasion sociali. Queło che mi sostegno el xe che l'èser uman el sia esclusivamente un animal social, ovaro che no'l posa esìster senò in funsion de qualcun o qualcosa esterni a sé. Tuti i pì comuni giudisi nostri su i èseri umani, bon, cativo, egoista, altruista, ecc., i xe categorie sbaglià, fondà su'l sbaglià preconseto che l'indivìduo uman el posa èser pì o manco "socialmente ùtile". Le diferense le esiste, tra indivìdui e indivìdui, ma ripulendo ogni conportamento de qualunque indivìduo da tute le sovrastruture simbòliche co le quali semo abituà a rivestirlo, ne retrovemo in man senpre el steso mìnimo denominator mùltiplo: la utilità social.
No esiste indivìdui socialmente inùtili. Quando qualcun el xe socialmente inùtile el more. (Questo no significa che chiunque el more el sia socialmente inùtile). Ma... cosa xe la utilità social?
Gavemo prima de tuto abàter el preconseto che'l sia ùtile socialmente chi el giova a tuta la società o a queła parte de la società che ne piaze de pì. Fin a quando se ostinemo a descrìver la realtà come voravimo che la realtà la fuse, mai se avisinaremo a la realtà.
El xe socialmente ùtile chiunque el sodisfa na qualunque esizensa dei altri. No necesariamente na esizensa che la ga el nostro consenso. El pol tratarse de na esizensa inte la quale se identifichemo fàsilmente (giutar qualcun a soravìver), opur na esizensa lontana da'l nostro modo de véder le cose (giutar qualcun a copar qualchedun altro). Èser ùtile socialmente significa soło questo.
El xe difìsile abandonar el preconseto che la utilità social la sia necesariamente qualcosa de "bon". Consideremo, par la nostra natura e retàjo cultural, socialmente ùtile la crocerosina che la cura un infermo, ma no el trafichente de droga o el ditator sanguinàrio. E el xe par causa de sto preconseto che no riusimo a capir parché qualcun el posa far el trafichente de droga o l'asasin. A sto punto ghe vol soło desìderse se se vol capir come el fonsiona l'èser uman e la so società o se se vol invese continuar a crogiolarse inte la misèrima ilusion de gaver capìo che ghe xe i boni e i cativi e che noaltri, naturalmente, fasemo senpre parte dei boni. Se se vol capir, ghe vol momentaneamente acantonar i so dogmi, ovaro quełe "quote" de Verità Rivelà solidamente arocà inte la nostra mente, dighe insormontàbili contra le quali le va a fermarse quei mile fiumi e rìvoli che i xe le nostre conosense che le crese, le se trasforma, votà a confluir in un saver dinàmico e tumultuoso, se no'l fuse apunto par quełe stùpide dighe, sòlidi àrzeni contra ogni ulterior conprension.
No esiste èser uman ùtile soło a se steso. Né esiste èser uman ùtile a tuti i altri. El cussì dito lìbero arbìtrio e de sicuro le circostanse le conduse i indivìdui a "scèjer" i referenti ai quali èser ùtili inte la so vita. Ma la selta la xe raramente, se no adiritura mai, na selta realmente tal, na selta medità e consapévole. La xe, pì de questo, l'esersisio de un istinto inà, queł istinto che'l fa de l'èser uman un animal social. L'istinto social uman el conduse l'indivìduo a sercar altri ai quali èser ùtile, a'l liveło pì cònsono a le so spesifisità. Durante l'infansia, se xe ùtili ai genitori come fioi, e se xe ùtili a le altre creature come conpagni de zoghi. Rivà a l'età adulta, tut'e do le funsion le perde adeguatesa. El cussì dito "inserimento inte la società" el xe un momento delicà proprio parché fortìsima la xe la esizensa de pasar da le antiche funsion ai novi roli de utilità. Se se cała a presipìsio inte'l roło de utilità pì idòneo a le so caraterìstiche tra queli resi disponìbili da le circostanse. Ghe xe chi riese a diventar avocato, chi el xe felise de diventar operàio, chi no'l trova de mejo che aruolarse in un esèrsito mersenàrio, chi el intraprende la cariera de tossicòmane. Serte de ste atività a noaltri le piaze, altre no. Chi le intraprende le siele, preferendo l'una a le altre, o copàndose se no'l intravede o riese a imaginarse e a crearse roli che'l senta cònsoni a le so spesifisità. Qualunque sia la strada intrapresa, eła la xe de utilità a qualchedun altro. Se cussì no'l fuse, l'indivìduo el moriria de fame o de altro.
Abandonemo, lo ripeto ancora, el preconseto che'l sia de utilità social queło che'l sia ùtile a la magioransa de la popolasion. El xe falso. El xe un asunto ipòcrita ùtile soło a farne sentir boni. A'l mondo ghe xe 5 miliardi de persone. Aplicando rigorosamente el nostro caro preconseto, el pol èser considerà de utilità social soło queło che'l mira a'l ben de pì de 2,5 miliardi de persone. Cussì, anca inte'l àmbito del nostro preconseto, le contradision le xe insormontàbili. El fato vero el xe che'l xe de utilità social qualunque cosa la vien fata in funsion de qualchedun altro, sia sto altro un grupo social, un nùcleo familiar, un sìngolo indivìduo o un animal.
Adolf Hitler sensa dubio no'l gera ùtile ai ebrei che'l faseva sterminar, ma el lo gera a la popolasion che la ghe gaveva dà tuto el so poder. Sìmilmente, durante la guera del golfo George Bush no'l gera ùtile ai irakeni che'l faseva interar vivi inte le trincee da cari armà adibìi a trator, ma el lo gera a le popolasion ocidentali, noaltri conprese, che continuemo a voler brusar inte le nostre automòbili el petròlio àrabo pagàndolo manco, asè manco de queło che costa l'aqua mineral. El ditator che'l scatena na guera no'l xe ùtile a tuti queli che i more, ma el lo xe ai vinsitori che i soravive. El tossicòmane no'l xe ùtile a le vìtime che'l roba, ma el lo xe a'l spaciator, e anca a l'industria de le autoradio. L'asasin no'l xe ùtile a la so vìtima, ma el lo xe a'l mandante. El mafioso no'l xe ùtile a'l comersiante che'l tajeza, ma el lo xe a'l polìtico a'l quale el procura voti, el polìtico coroto no'l xe ùtile a queli che i lo ga eleto, ma el lo xe a'l corutor. Galileo Galilei no'l gera ùtile ai so contenporanei che i lo ga perseguità, ma el lo gera ai descendenti che i lo ga savù capir. El pìcolo delinquente no'l xe ùtile ai so derobà, ma el lo xe ai so familiari che co i schei robà el mantien, o a le so fémene che po cussì el inpenise de regali o sénplisemente a la banca indove el ricicla el maltolto. L'editor no'l xe ùtile a le foreste che le vien sterminà par fornirghe la carta, ma el lo xe ai so letori. L'animalista no'l xe ùtile ai èseri umani che i comersia in animali morti, ma el lo xe a i animali che'l serca de salvar. El vegetarian no'l xe ùtile ai vegetali, che'l xe costreto a far strage par nutrirse, ma el lo xe a i animali, che no i vien copà par lu. El trafichente internasional de droga no'l xe ùtile a le famije roinà dei fioi drogà, ma el lo xe ai spaciatori che i vende a'l detàjo e a le banche svìsere, che le ricicla i so schei ilegali. E infine anca l'eremita, che no'l xe ùtile a nissun uman, parché el vive in isolamento, el lo xe a'l can o a l'altro imancàbile animal che "ghe tien conpagnia".
La società umana la xe na intricatìsima giungla de nesi de recìproca utilità. Ciamemo egoista chi sénplisemente no'l ga intension de èser ùtile a noaltri o a chi noaltri voravimo che'l se rendese ùtile. De sicuro anca lu el xe ùtile a qualcun. El rico goloso spiłorsio che no'l moła na lira a nissun par tuta la vita, da noaltri tìpicamente inquadrà come la quintesensa de l'egoista" (ovaro "de chi el xe ùtile soło a se steso"), el xe invese ùtile a le banche che le dopara el so danaro, nonché ai eredi. Lo ciamemo egoista sénplisemente parché noaltri no semo le banche né i eredi, né se identifichemo con lori.
Questo no significa che'l sia moralmente egual giutar un infermo o trafichar eroina, e chiunque el pensase che mi lo penso el saria un defisiente. Ma el trafichente de eroina el la pensa proprio cussì, senò no'l faria queło che'l fa, e se volemo capir parché el lo fa gavemo da capir cosa ne pensa lu, no cosa ne pensemo noaltri. Ebe, lu el vede un mercà, queło de l'eroina, e el pensa che qualcun el rifornirà queł mercà, se no'l lo farà lu. E se no ghe xe el mercà, lu el vede i produtori, che i ga bisogno de un mercà, e se qualche luogo el se presta a diventar un mercà, el lo diventarà de sicuro, sia che'l sia lu a ocuparsene, sia che'l sia un altro. A noaltri el pol no piaser sto so modo de rasonar, ma el xe el so modo de rasonar, e gavemo da capirlo se volemo capir i fenòmeni a lu corelà. El capir, lo ripeto, el xe cosa diversa da'l giustificarlo.
Ogni tendensa umana la genera misteriosamente na tendensa contraria. Ciapè na opinion qualunque, strilièla a'l mondo, e el se dividarà in persone che le condivide e persone che le contrasta. Questo el vale par qualunque opinion. Strilè che i sisni i xe bei, e asè i obietarà che i ga el coło tropo longo. Manifestè amor par i gati, e asè i dirà che i li òdia, insultè i cani, i serpenti, i scorpioni, e qualcun el se alsarà a difesa lori, cantè el vostro amor par Dio, e qualcun el lo bestemiarà, bestemièlo e asè i lo amarà de pì, esaltè l'amor e altri i lo ripudiarà par l'òdio, ciamè la paze e altri i ciamarà la guera, afermè che queło che mi go fin a deso scrito el xe sterco purìsimo, e altri i lo ciaparà a Vanzeło.
El mito de l'altruismo e el mito de l'egoismo i va cussì abolìi. Che se asuma ognun la lùsida responsabilità de desìder autonomamente quala funsion de utilità a vantajo de chi lu o eła el vol e el posa rivestir inte la so vita. E che'l rispeta queli che i ga fato selte diverse. El mondo el podaria cussì diventar un luogo un poco pì vivìbile.
E soratuto, la selta de vita che ognun che mìnimamente el pensa el ga da cussì far, la xe se preferir la conosensa anca amara del pì plausìbile dei nesi tra le cose (in pràtica la realtà), e cussì sta conosensa e relativa sagesa onestamente perseguir, opur preferir sterilmente ginzilarse par tuta la vita co le ripetitive e confortanti selebrasion del imòto e senpre giusto e fitisiamente superior so punto de vista. Scusè la frase conplicà, ma la me xe venù de geto. Se no ve xe piasùa desmentegàtela in presa.
E par finir in belesa, scusème se no son alberoni, ma anca lu el se scusa de no èser mi o quantomanco el se scusa de no gaver spiegà esaurientemente e con so parołe queło che invese el xe tocà a mi de pensar, a mi che oltre che no èser un sosiòlogo patentà, come lu invese tuti i considera che'l sia, no guadagno gnanca un saco de schei a gaver sti pensieri che no i me conpète, intanto che lu, a'l quale i conpète, invese i bei schei el li guadagna sensa gaverli (e susità pensieri).

Roberto Quaglia