Go da sercar de èser banal, acidenti. Me xe capità in man le brute copie de le létere che za te go scrito e me son incorto che le xe davero brute, ovaro me xe scapà momenti de profondità involontaria, a discàpito de la banalità indispensàbile a far de qualunque prodoto un prodoto bon. El xe un argomento abastansa banal, questo? Lo spero davero. Tuti i dise ormai che qualunque cosa la xe prima de tuto un prodoto. Se lo dise tuti, forse el xe un concèto banal, ovaro proprio queło che sto sercando de prodùser. Se tuto el xe un prodoto, o el xe un bon prodoto bon o el xe un cativo prodoto cativo. Ben, me par che a banalità stemo ndando ben. Chi xe che'l decide quando na cosa la xe davero banal? Sta frase la me xe venù abastansa banal. Me sto mejorando.
Na cosa la pol èser banal par serti e banal par altri, ovaro, voleva dir, banal par serti e no banal par altri. E cosa ne disì de méter serte frasi in corsivo, sensa particolari motivi? No'l xe decisamente banal? Forse el xe lievemente originale. Ghe vol star atenti. L'originalità la te speta a'l varco drio a l'àngoło, e la te ciapa quando manco te lo speti. Ma na cosa la pol èser par gnente banal epuro asè stùpida. El xe mejo na bona banalità o na perentoria stupidità? Na cosa tropo stùpida la finise de èser banal.
Acidenti! L'eceso de banalità el conduse a tradimento a'l so contrario quando manco te lo speti. Ghe vol decrementar la coretesa semàntica - ma che càvolo digo! - ghe vol diminuir la bontà gramaticale par conpensar i rigùrziti de banalità paradosante.
Ghe capiso un beło gnente gnanca mi, ve asicuro davero. Che figura ghe fao, ancuo, con ste parołe che no le me piaze gnanca un fià? Paro semo, o paro ignorante? Opur no paro un beło gnente parché gavì za finìo de lézer? Ma cosa digo? Se i ga finìo de lézer no i se incorze de tute ste parołe che pur le continua a star su'l fojo de carta a la so insaputa, cussì cosa le sta a far?
Qua me sa che la banalità la se ne xe ndà a farse frìzer. Ghe vol un bon luogo comune par salvar cavra e càvoli. Qualcosa del tipo: "La cosa inportante la xe che ghe sia solidarietà". Gnente mal, eh? De fato el danaro no'l fa la felisità, parché la natura la xe matregna e quando manco te lo speti i nodi i vien a'l pètine e qua casca l'àseno. No ghe xe proprio giustisia a sto mondo! El xe proprio vero che no ghe xe da fidarse. Pì conoso le persone e pì amo i animali.
Tuto questo el xe sénplisemente squàlido, scarsamente banal o antibanal, un brano scrito del tipo "voraria ma no poso", na masnada de frasi amasà a caso.
Forse riusimo almanco a diventar noiosi.
Ma parché gavaresimo da diventar noiosi? Volevimo èser banali parché questo el xe queło che ghe piaze a la gente. Ma le noiosagini no le piaze a nissun. Qua stemo proprio sbaliando tuto. Se proprio ghe vol èser noiosi, tanto val dir anca qualcosa de sientìficamente interesante.
Caro Maurizio Costanzo Show, giùtame ti...!
Eco, ghe semo! Superbanalità!
«Caro Maurizio Costanzo Show, go provà tute le strade ma no ghe xe stà gnente da far. Tute le porte le me se xe sarà in facia. Son proprio disperà/a. No so pì cosa far. I me ga consijà de rivòlzerme a ti, e deso ti sì la mia soła speransa. La mia vita la xe diventà un inferno. So che i xe asè le persone che te scrive con problemi anca pì grosi del mio, ma vojo ilùderme che ti vorè darme na man a superar sto mio momento difìsile.
«Tuto el xe scominsià quando el mio sistema nervoso no'l ga pì tegnù soto el peso dei terìbili mii problemi familiari, che te sparmio parché tanto i xe senpre le stese disgrasie, che le sucede a cussì asè persone che le nase sfortunà come mi. El sedimento nervoso de orìgine familiar el se xe propagà a le altre sfere de la mia vita, erodéndola progresivamente fin a l'oso.
«Deso me sento come nudo/a davanti a la vita, che la me soverchia e la me sciaca soto el so terìbile peso. No poso vardar a'l futuro, e quando penso a'l pasà me vien i trémiti. Anca sforsàndome a'l màsimo, no rieso mai a pensar a'l presente par pì de qualche secondo, parché inte'l mio presente no ghe xe gnente de gnente a parte queła granda angòsia che no so come spiegarte, ma la me leva anca el fià.
«Caro Maurizio Costanzo Show, fàme venir a'l to show a sofrir in direta, mi penso che l'esenpio de la mia soferensa el podese giutar asè persone che le sta inte la mia infelize situasion, e forse el me podese giutar a trovar anca na ànima bona che la me voja giutar... go tanto bisogno de giuto... speso penso a mi steso/a come a un oseło ferìo cascà zoso da'l nido inte'l fango, e tuti i me pesta sensa incorzerse e nissun el me racoje e el me rimete inte'l nido...
«Giuto!
Che senso el ga gaver scrito sta roba qua? E par chiunque el la àbia leta, che senso el ga gavù gaverla leta? Ma quante volte el ga senso gaver leto qualcosa che se àbia apena leto? Ogni volta che se lese qualcosa se gavaria da po sùbito dopo far na ràpida anàlisi par capir se el ga gavù senso gaver leto queło che se ga leto. Se sparmiaria giganteschi framenti de vita sprecà!
Scusème par sta inprovisa parvensa de profondità involontaria. Ancuo, lo giuro, gavaria tanto volù èser soło banal. Ma nissun el xe perfeto.

Roberto Quaglia