uno tra i pì difusi preconseti el xe che la morte la sia qualcosa de negativo. Santa Mama Cesa la ne suzerise anca un preconseto contrario, ovaro che la morte la sia in realtà l'inisio de la vera vita, e che cussì, intrinsecamente, la morte la sia ben invese de mal. Ma po, Santa Mama Cesa la ne fa na asè magra figura quando el papa de deso, colpìo da malatie de la carne, no'l se volta fiducioso a la Santa Providensa, ma a'l laico Policlinico Gemelli, ospedal teren asè. Intanto che i piloti de Formula Uno i mete a ogni Gran Premio la so vita inte le man de Dio, intanto che ditadure spietà le fa el steso concedéndose periculosi bagni de fola potensialmente ostile, el Papa no'l osa gnanca mostrarse ai so fedeli sensa la màcabra casa protetiva de cristal trasparente stabilmente posta su la so vetura fuoriserie, dimostrando cussì de gaver manco fiducia inte la protesion divina de queła che i ga piloti e ditadure, e esibendo anca na evidente iper-preocupasion verso queł famoso salto, a parołe senpre decantatìsimo, verso la Vera Vita del Regno dei Cieli.
Ma no voleva scrìver sta létera par far publisità a'l Papa. Voleva méter a nudo, par quanto sia inte le mie posibilità, el fato che'l valor negativo dà a la morte el sia un preconseto, o qualcosa de sto genere.
Savemo che no vivemo par senpre. La nostra vita no la xe infinìa, ma finìa. Eła la ga i lìmiti. Quali xe? El lìmite a'l qual pensemo senpre el xe queło che ciamemo "Morte". Dopo sto lìmite, noaltri no ghe semo. El xe questo però l'ùnico lìmite asoluto de la nostra vita? No, ghe ne xe un altro. Anca inte la diresion contraria ghe xe un lìmite, prima del qual noaltri no ghe semo. Ciamemo sto lìmite "Nàsita". Morte e nàsita in realtà no esiste, i xe concèti che no i ga senso, tant'è vero che i òmeni (e anca asè fémene) no i xe mai riusìi a méterse d'acordo su queło che esatamente le significase. Par serti la vita umana la scomìnsia a l'ato del consepimento. Par altri questo el sucede ben nove mesi dopo. Mi adiritura sostegno che la vita "umana" la scominsiase ancora dopo, quando la creatura no la sia pì un tropismo del tuto sensa spasio mental, e la acquisise el linguajo uman e con questo, finalmente, la cosiensa e la capacità de ricordar, cosientemente, el pasà. Anca su la morte ghe xe serte dispute. A parte chi a parołe el se dise convinto che la morte la sia in realtà l'inisio de na vita nova pì beła (e alora parché no'l serca de morir in presa?), ghe xe chi el dise che la morte no la esiste parché quando ghe semo noaltri, eła no la ghe xe, e quando ghe xe eła, no ghe semo pì noaltri.
i èseri umani i pensa: Nàser el xe beło. Morir el xe bruto. Ma tut'e do i xe confini de la vita, de la stesa mesura. L'ùnica diferensa la xe che pensemo che la nàsita no la ne pol pì suceder, intanto che la morte la ne sucederà. Questa la xe na conseguensa del fato che ricordemo el pasà, ma no el futuro. Ovio, el pensarà chi deso me sta lezendo. No, no'l xe ovio, penso no soło mi, ma anca uno dei pì grosi siensiati viventi "Stephen Hawking".
Inte'l so ben noto libro "Dal big bang ai buchi neri" (inpròpria tradusion del tìtoło original inglese "A brief history of time"), Hawking el introduse el concèto de "fresa psicològica del tenpo". No ndarò inte i particolari par do inportanti motivi: el primo el xe che chi el ga deciso de lézer queło che go scrito mi invese de queło che ga scrito Hawking el gavarà i so motivi boni (o pèsimi). El secondo motivo el xe asè pì vàlido, e el xe fato de la mia inadeguatesa a ndar inte i particolari in un canpo indove faria sùbito de le gran brute figure. Citarò cussì soło na frase de Hawking: "Le leji de la siensa no le distìngue tra pasà e futuro". Noaltri lo fasemo, parché la cussì dita fresa psicològica del tenpo la xe girà da'l pasà verso el futuro. Ma in senso asoluto (o, se no ve piaze i asoluti, in senso sientìfico, o matemàtico), ghe xe totale equivalensa tra pasà e futuro.
El fato che'l pasà el sia za suceso e el futuro el àbia ancora da suceder i xe categorie de pensiero nostre. Secondo i siensiati, da Einstein in poi, tuto queło che esiste el xe l'universo, ovaro na "boła" spasiotenporal finìa, che la conprende tuto el spasio e tuto el tenpo che ghe xe stà, ghe xe e senpre ghe sarà.
Doparemo na metàfora sénplise. Tuto queło che esiste el xe sarà drento un libro. Naturalmente, el esiste tuto a'l steso tenpo. Quando lezemo el libro, ne par che'l tenpo el score, le persone prima le nase e po le more. Ma se lezemo diese volte de sèguito la pàgina indove ghe xe uno che'l nase, queł poareto par noaltri el nase diese volte, anca eséndo però senpre vivo na volta soła. Dopo che uno el xe morto, podemo agilmente tornar indrio de qualche pàgina e eco che'l xe n'altra volta vivo, anca eséndo za morto inte'l futuro del libro. Opur podemo lézer sento volte el libro da'l prinsipio a la fine e par sento volte ne par che i avenimenti contegnùi drento i ciapa vita e i se consuma. O invese, con un poco de fadiga, podemo lézer el libro a'l contrario, e eco che da la morte i sorze i vivi che po i sparise a'l momento de la nàsita e cussì via, fin a'l prinsipio indove tuto finise. Qualunque cosa noaltri se decida de far, el libro el continua a contegnir tuto queło che inte'l libro el xe suceso, el sucede e inte'l futuro el sucederà. Se no gavì dimestichesa con i libri se pol far el steso esenpio con un film. Eco, l'universo el xe in sto senso come un libro o un film, che però noaltri podemo lézer o vardar (o mejo viver) soło par un verso. E questa la saria la fresa psicològica del tenpo. In realtà, a prescìnder da'l nostro punto de vista obligà, tuto el tenpo el esiste a'l steso tenpo insenbre a tuto el spasio de cui el xe tut'uno, par cui gnente in realtà el svanise o el apare, parché tuto a'l steso tenpo e stabilmente el xe, in sto ipotètico Gran Libro de l'Universo.
Deso me son perso in sti discorsi quando invese me voleva concentrar su'l preconseto che la morte la sia qualcosa de negativo. Parlaremo alora ancora de morte inte la létera che vien, se no moro prima, o se no morì prima voaltri.

Roberto Quaglia