 |
|
         |
AMBROSE BIERCE
|
 |
 Caro Maurizio Costanzo Show,
Ghe xe sìnici vegetariani che i rifiuta anca el gorgonzola, matèria sensa vita pròpria e par de pì pusolente, par adentar golosi i tèneri pìcoli de le caròte crude, apena strapà da la cuna de l'humus. Soło parché le nostre rece umane no le sente i vaziti de dolor de le carotełe che anca i strumenti tècnici i registra sensa dubio, noaltri partesipemo inpasìbili a veri e propri olocausti vegetali. I contadini i risive adiritura sovension da'l stato par alestir i so canpi de consentramento de verdure votà a'l futuro sterminio. Intanto che i animalisti i inoridise davanti a na pìcola maseleria de quartier o a un alimentarista con salsise, i percore invese indiferenti, anzi ecità, i mercati generali, veri e propri obitori indove le sta esposte le salme de fruta e verdura, che le ràntoła sensa èser sentìe perdendo le ùltime gose de linfa.
Abiesion e crudeltà! E queło che'l xe pì grave, verso el pì diverso dei diversi da noaltri, cùspide de eferà discriminasion rasial, la pianta!
Ma la cadena de l'oror no la se ferma qua!
Pì i morti vegetali i xe morti da poco, pì i xe aprezà e costosi.
Ghe xe strumenti de tortura come la sentrìfuga che i cava sangue de pianta par Dracula vegetariani che i se ingiote tuto e i resta inpuniti.
Le creature le vien adestrà a no gaver rispeto par el mondo verde, condisionàndole co l'oferta de gelato a la fràgola o a'l pistacio, ma mai a'l conejo o a'l cavreto. La xe na ingiustisia pazesca, fata co l'acquiesensa de chi el se alsa a soła difesa de la parte animal de la natura. I inamorà no i ofre a le morose masi de sanpe de sisno, parché le tose le inoridiria, ma i so dolsi oci i lùsega de gioia a la vista de montoni de corpi de fiori, tajà co le cesoie, e macabramente tacà insenbre con giri de spago dorà, nastri e stagnoła.
I gran eroi e patrioti vegetali, come Amanita, el fongo velenoso e la so conpagna Cicuta, che i ga vendicà milioni de piante soprese copando soło qualche omo qua e là, i vien dai òmeni perseguità e sterminà par el soło gusto de copar, sensa gnanca adur pretesti gastronòmici. El xe un vero e proprio delito polìtico. Cosa fa Amnesty? La tase? Soło parché de là dei diriti de l'Omo no esiste i diriti del Fongo?
Vardè l'animalista vegetarian che'l se inpietosise davanti a un piato de biancheti e el se scaja contra le strage del novełame ìtico, ma po el se ingiote zovenìsimi cucioli de latuga, dopo gaver sparso su le so ferite sal ojo aseo, limon e pévare.
E lu ancora el rifiuta le mumie de porco come persuto e salame, ma po el esita soło un àtimo, e par soli dubi organolètici, davanti a le mumie vegetali come la mostarda e la fruta seca o candìa.
Parché el vovo no e la nose sì?
E, no soło inte le cantine, el late no e el vin sì?
E queli che i magna germoji de soia e no pulisini vivi condìi?
Anca la terminologia la xe da magnamorti: se mastega cori de palma e de articioco, ganbe de sèlaro, teste de ajo e oreciete pugliesi co le sime de rava.
Za prevista, e cussì scontà, la xe la reasion dei animalisti vegetariani, davanti a sti capi de inputasion, e cussì no la nominemo gnanca. Poareti, lassémoli crogiolar inte i mal nascosti sensi de colpa lori.
No se pol barar con l'inconsio personal, né soratuto con queło coletivo.
El Tenpo, a so tenpo, el se incaricarà de vendicar tanti deliti a senso ùnico, e el lo farà doparando l'ampia patologia de quełe malatie che le va a devastar la za trista tersa età de queli che i se xe incaponìi inte na asurda alimentasion sbilansià, anca savendo de gaver un intestin con longhesa e dotasion glandolar da onìvoro.
El Tenpo, gran ideòlogo del movimento filovegetal: el fa viver mileni de sequoie e un giorno soło de parpaje efìmere.
Con sto Fondator e Presidente Onorario, el MOVIMENTO FILOVEGETAL el ciama a racolta i filovegetali de tuto el mondo par anunsiar: "Filovegetali de tuto el mondo, unìve par conbàter uniti a favor de la causa comune!"
Par deso tanti no ne capise e tant'altri i xe adiritura contra de noaltri.
Ma a la fine, el Tenpo el ne darà ragion.
Gigi Picetti
L'òpera "Caro Maurizio Costanzo Show...", tuta quanta o in parte, la pol èser leta, scargà su'l computer, stanpà e copià sensa lìmiti, soło par uso personal. Tuti i testi e le ilustrasion i xe proprietà de Roberto Quaglia e no i pol èser doparà tuti quanti o in parte sensa permesso. El progeto gràfico e le conponenti gràfiche de ste pàgine i xe proprietà reservà de Roberto Quaglia. L'òpera "Caro Maurizio Costanzo Show...", tuta quanta o in parte, no la pol èser messa in véndita a nissun tìtolo sensa permesso prima. 
|
