 |
|
           |
AMBROSE BIERCE
|
 |
 Car Maurizio Costanzo Show,
Gh'è cìnich vegetarian che rifiüten anca el gorgonzola, materia senza vita propria e per el pussee spüzzolent, per adentà golos i tènner piscinitt di caròtol crüd, apena sbregaa de la cüna de l'humus. Domà perché i nòster orecc üman senten minga i vagiti de dolor di carotel che anca i strüment tècnich registren senza dübi, nün partecipom impassìbil a ver e propri olocaust vegetal. I contadin ricéven adiritüra sovvenzion del stat per alestì i sò camp de concentrament de verdür votaa al fütür stermini. Mentre i animalist inorridissen denanz a ona piscinina maceleria de quartier o a on alimentarista con salsizz, percórren inveci indifferent, anzi eccitaa, i mercaa general, ver e propri obitòri indove stann espost i salm de früta e verdüra, che ràntolen senza vess sentii perdend i ültim gott de linfa.
Abiezion e crüdeltà! E quell che l'è pussee grav, vers el pussee divers di divers de nün, cùspide de eferada discriminazion razial, la pianta!
Ma la caden de l'orror la se ferma minga chì!
Pussee i mort vegetal hinn mort de poch, pussee hinn apprezzaa e costos.
Gh'è strüment de tortüra come la centrìfüga che càven sangu de pianta per Dracula vegetarian che se ingòien tütt e rèsten impünii.
I creatür vegnen adestraa a minga avègh rispett per el mond verd, condizionàndoi con l'oferta de gelaa a la fràgola o al pistacc, ma mai al conili o al cavret. L'è ona ingiüstizia pazzesca, faa con l'acquiescenza de chi el s'àlza a sola difesa de la part animala de la natüra. i inamoraa òfren minga a i tosann mazz de zamp de cign, perché i tosann inorridiríen, ma i dolz oeucc lüsissen de gioia a la vista de mügitt de corp de fior, tagliaa con i cesòri, e macabrament tacaa insema con gir de spagh doraa, naster e stagnoeula.
I gran eroe e patriòti vegetal, come Amanita, el fong velenos e la soa compagna Cicüta, che hann vendicaa milion de piant sopress masand domà quaic òm chì e là, vegnen di òmen perseguitaa e sterminaa per el sol güst de masà, senza nanca adüü pretest gastronòmich. L'è on ver e propri delitt polìtich. Cossa el fa Amnesty? El tas? Domà perché de là di dirit de l'Òm esìsten minga i dirit del Fong?
Vardee l'animalista vegetarian che el se impietosiss denanz a on piatt de gianchett e el se scaglia contra i stragg del novelam ìttich, ma poeu el se ingoia giovanìssim cuciol de latüga, dopo avègh sparpaiaa sü i sò ferid saa oli asee, limon e pever.
E lü ancamò el rifiüta i mümie de porscell come persütt e salam, ma poeu el esita domà on àtim, e per sol dübi organolèttich, denanz a i mümie vegetal come la mostarda e la früta secca o candida.
Perché l'oeuv no e la nos sì?
E, minga domà in di cantinn, el latt no e el vin sì?
E quii che màngen germoi de soia e minga poresin viv condii?
Anca la terminologia l'è de magnamort: se màstighen coeur de palma e di carciòff, gamb de sèler, coo d'aj e orecchiett pugliés con i cim de rava.
Giamò prevista, e inscì scontada, l'è la reazion di animalist vegetarian, denanz a sti coo d'impütazion, e inscì la nominom nanca. Poveritt, lassémoi crogiolà in di mal scondüü siens de colpa lor.
Se pö minga barà con l'inconsci personal, né soratütt con quel colettiv.
El Temp, a sò temp, el se incaricarà de vendicà tanti delitt a senso ünich, e el farà doperand l'ampia patologia de quii malatii che vann a devastà la giamò trista terza età de quii che se hinn incaponii in ona assürda alimentazion sbilanciada, anca savend de avègh on intestin con longhezza e dotazion glandolara de onnìvoro.
El Temp, gran ideòlogh del moviment filovegetal: el fa viv milenni de sequoie e on dì sol de parpaioeui efìmer.
Con sto Fondador e President Onorari, el MOVIMENT FILOVEGETAL el ciama a racolta i filovegetal de tütt el mond per anunzià: "Filovegetal de tütt el mond, ünìiv per combatt ünii a favor de la causa comüna!"
Per adess tanti ne capissen minga e tant'alter hinn adiritüra contra de nün.
Ma a la fin, el Temp el ne darà reson.
Gigi Picetti
L'opera "Caro Maurizio Costanzo Show...", intrega o in part, la pö vess legiüda, scaregada sül computer, stampada e copiada senza limit, domà per üso personal. Tütt i test e i illustrazion hinn proprietà de Roberto Quaglia e poden minga vess doperaa intregh o in part senza permess. El progett gràfegh e i component gràfich de sti pagin hinn proprietà riservada de Roberto Quaglia. L'opera "Caro Maurizio Costanzo Show...", intrega o in part, la pö minga vess mettüda in vendita a nissün titol senza permess primma. 
|
