parlemo deso de mi, de l'autor de ste righe, de quełe che le ga precedù e de quełe che le seguirà.
Confeso de conósarme. La longa convivensa con mi steso la me ga giutà no poco. La pì parte de le volte che me vardo a'l specio me reconoso sensa tropi problemi.
Son registrà a l'anàgrafe co'l nome de Roberto Quaglia, e me risulta che'l xe cussì che son senpre stà ciamà, fin da la mia nàsita (majo 1962). El mio nome el spiega però asè poco de mi, considerando anca che no lo go in esclusiva. Anca se no'l xe un fato frequente, coesiste in Italia vari "Roberto Quaglia", indivìdui co la stesa eticheta anca netamente distinti, molecolarmente, psicosomaticamente, esistensialmente e economicamente, uno da l'altro. A Zènova semo, par quanto me sia noto, in do a èser ciamà cussì, e no se semo mai incontrà, anca se mi me son in varie ocasion inbatù in indivìdui che i conoseva personalmente el mio omònimo. Ma questo no'l xe par gnente interesante, anca par mi.
Queło che l'autor de ste righe el pensa de èser el xe argomento asè pì interesante, se me consentì sto sboco de vanagloriosa esibision de introspesion.
Queło che l'autor de ste righe el pensa de èser el xe naturalmente na facenda asè conplesa, e se no'l fuse cussì no se podaria dir na question interesante.
Me limitarò donca a sfiorar soło el tema, matèria asè pì adata a l'autobiografia o a l'asidua frequentasion de la mia persona, che a na létera a'l Maurizio Costanzo Show, anca se questa la vien spartìa su Internet da l'umanità.
Inte na létera a'l Maurizio Costanzo Show, el gran totem de la Società Televisiva Italiana, el xe bruto slargarse in polpetoni autoelogiativi. Beło el xe invese sbałar con intermitenti lanpi de sìntesi.
Isaac Asimov, el gran autor de fantasiensa, el ga scrito na serie de raconteti giali ciamà "Il Club dei Vedovi Neri". I menbri de sto club i interogava ritualmente i so graditi òspiti scominsiando co la domanda provocante: «Lu come giustìfica la so esistensa?» Uno dei tanti significati implìsiti in sta domanda el gera presapoco: «Quala funsion ùtile el ga inte la società umana?»
Inte na vita se pol incarnar tante o poche funsion, speso anca in contradision una co l'altra, serto el xe che mai se xe sensa roło. Anca l'èser sensa roło el xe un roło. Anca chi se copa, perfeto esenplar de chi el sente de gaver perso ogni roło e funsion soa, in realtà el se cała osesivamente inte'l ben definìo roło de chi se copa, indispensàbile par rivarghe.
Giustìfico mi, davanti a mi steso, la mia esistensa? La risposta la xe un fato privà mio, ma se pol intuir. Chi el ga par intiero giustificà davanti a se steso El Pròpio Esìster, el perde interese a simentarse inte i zoghi de l'Èser, e el more, o content el speta de farlo. Chi el sa de no gaver giustificà par gnente la so esistensa davanti a se steso, o inaspetatamente el reagise con forsa o pì fàsilmente el socombe a sta cosiensa, ma la so morte o aspeto de morte el xe asè manco content.
Go lassà segni, sto lassando segni durante el mio percorso teren?
Ebe, qualche segno macroscòpico ghe xe, e par qualche tenpo el restarà. Go scrito vari libri, vèrsini e inèditi in Italia, ma in paesi lontani sbocià a la vita, editìsimi e, soratuto, vendutìsimi. Go par ani gestìo la Panteca de Zènova, locale originale de incontro seral, fusina de artisti e fini pensatori, che tali forse no i saria diventà sensa queł nido o covo soo che con gran fadiga go mantegnù in vita. Qualcun de lori el xe inevitabilmente tracimà inte qualche Maurizi Costanzi Show. Altri segni de vita no ve riguarda, o forse invese sì, comunque sensa parlàrvene ve garantiso che li go lassà e ancora li go lassando.
Go conosùo e ancora conoso personaji de gran rilievo mental. Trascurando de mensionar i italiani, par no mortificar i sedicenti sapienti asenti dai mii elenchi, me prègio de esibir la resente fita e gustosa mia corispondensa con Robert Sheckley, uno tra i mejo pensatori che la letaratura americana la àbia mai prodoto, le inebrianti conversasion con Jack Cohen, pirotècnico siensiato e scritor inglese, le ricorenti maratone speculative con Florin Munteanu, eclètico siensiato romeno e gran amigo personal, i fugasi ma ripetui incontri con Norman Spinrad, John Brunner, Harry Harrison, Frederik Pohl, Gianluca Vialli... tuti sti nomi no ve dise gnente, fora l'ùltimo? Ebe, lu el rapresenta l'ùnica busìa de l'elenco, e forse l'ùnico nome noto a chi lese. No'l xe colpa mia. Cosa ve spetàvi da mi? Che in sto streto simulacro de autobiografia mensionase soło queło che ai mii oci poco importa ma che le mode inperanti e le tradision autobiogràfiche le inponaria? Gnente da far! Me tegno acuratamente a la larga da'l spiatelarve quante lengue mi so parlar, quali tìtoli de studio gavaria da vantarme de gaver o vergognarme de no gaver, quante e quali relasion àbia consumà co l'altro seso (o'l steso? o i altri ancora?), quali xe i particolari psicoanatòmici del mio viver quotidian, de queło setimanal, mensile e anual, qual sia el color de la mia pele. E se mi fuse negro? Voaltri cosa ne savì? No ve ofendì se pròpriamente digo "negro" e no "extracomunitario". Chi el dopara la parola "extracomunitario" el xe generalmente un ingènuo o un stronso o tut'e do, e no me vojo sotrar da'l dirlo. La mia nona la xe de fato na extracomunitaria, o almanco, la xe stà fin a qualche giorno fa. Davero! Surprise? Ma no la xe negra. La xe austrìaca. Fin a pochi giorni fa l'Austria no la faseva parte de la comunità europea. Cussì eła la xe senpre stà na extracomunitaria. Come i mii amighi americani, e i nostri nemighi svìseri (amighi? nemighi?). Chi el dopara la parola "extracomunitario" par descrìver un negro el xe generalmente un stronso de la pezo spece, ovaro un stronso ipòcrita. Par el negro no canbia gnente, parché dopo un poco anca la parola "extracomunitario" la diventa un insulto. L'insulto no'l sta mai inte na parola, ma inte la mente volgar de chi la dopara. Soło che cussì no se capise pì gnente e a finir insultà se finise par retrovarse anca la mia nona, parché dato che la xe extracomunitaria la ga da èser negra par forsa e vénder siòndoli su le spiage e che invese la se ne torna a casa soa che pitosto noaltri che no semo rasisti la giutemo là in queł paese soo.
Eco, me son distrato un àtimo, e za sta autobiografia la par decisamente no èser pì tal, ma el sòlito simulà delìrio che spontaneamente esalo tute le volte che son mi steso anca no eséndolo par gnente. Coerentemente alora la finiso, ricordàndove in ciusura date esensiali. I me ciama tuti Roberto Quaglia, e go cussì finìo par crédar de gaver el mio nome. Credo con intensità variàbile de èser mi steso, anca quando credo de èser qualcun altro. Credo comunque senpre de crédar. Penso de pensar, e qualche volta penso de pensar de pensar. Serco de èser cortese con mi steso, anca se qualche volta me levo el saluto. Quando me incontro par strada me reconoso quasi senpre e el pì de le volte me fermo a scanbiar do ciàcole con mi steso, fin a quando i mii discorsi i me vien a noia e alora me moło prometéndome però de telefonarme, che però no lo fao mai, anca parché lo so che trovaria la linea ocupà. Le barzelete che me conto no le me fa pì rìder parché le so za tute. Quando no son d'acordo con i mii discorsi me mando a queł paese e po me parlo mal de mi, ma no me dago reta. Me calùnio, ma no me credo, né me querelo. A la fine torno a frequentarme con frequente frequensa. Son vivo, ma no lo go fato aposta, anca se un poco me ne aprofito. A l'ato de scrìver tuto questo l'anàgrafe la me considera trentadoene, ma lo so che no'l durarà par senpre. Qualche volta me diverto, altre volte no. Ma serco comunque senpre de no anoiarme, che suzeriso de far a tuti, parché anoiarse no la xe cosa po tanto bruta, ma la xe noiosa.

Roberto Quaglia