
![]() |
|
![]() |
AMBROSE BIERCE
|
![]() ![]() |
Caro Maurizio Costanzo Show,
U j è di vegetariân cìnic ch'i rifiùta parfèna e' gorgonzola, materia sénza vita sóva e par d'piò puzlenta, par adentê cun ingurdìzia i tènar fiulèn dal carôti crudi, apèna strapê da la cuna dl'humus. Sól parchè agl'urèc umâni nòstri al n'sint brisa i vagìt ad dulór dal carutèn che pu i strumént tècnic i registra sénza dóbi, nó a partecipèm sénza fê una piega a di vèr e pröpi olocàust vegetêl. I cuntadèn i ciàpa parfèna dal sovvenzion da e' stêt par mètar sò i su camp ad cuncentramènt ad vèrdura destinêda a e' sterminì ch'l'arivarà. Intânt che j animalesta i s'inurdès d'nènz a una mazlarì znina ad quartîr o a un pizicarôl cun e' salàm, i pasa invezi indiferènt, anzi ecitê, i mercê generêl, vèr e pröpi obitori duv' ch'l'è espòsti al salmi ad fròta e vèrdura, ch'al rantola sénza ch'niseun al sinta e al pérd agl'ùltumi gòzi ad linfa.
Abiezion e crudeltê! E quèl ch'l'è piò grêv, contra e' piò divêrs di divêrs da nó, la ponta d'una discriminazion raziêla bèn cativa, la piânta!
Mo la caténa dl'urór la n'si férma brisa aquè!
Piò i cadàvar vegetêl i è mört da pôch, piò i è aprezê e i còsta.
U j è di strumént ad tortura cumè la centrìfuga ch'i tira fura e' sangv dla piânta par di Dracula vegetariân ch'i s'ingòla tot e ch'i n'paga mai.
I burdèl i vèn adestrê a n'avé rispèt par e' mond vérd, cundiziunèndi cun l'oferta de' gelê a la fràvula o a e' pistàc, mo mai a e' cunèj o a e' cavrèt. L'è un'ingiustizia da mat, fata cun e' bën ad chi ch'e' s'mèt sól a difènd la pêrt animêla dla natura. I murùs i n'regala brisa a al murósi di mâz ad zàmp ad cigno, parchè al burdëli al s'inurdirè, mo i ócc dulz i lòs ad cuntintëza a la vèsta ad mócc ad corp ad fiùr, tajê cun al fórbš, e ligh insèn in manìra macabra cun di gir ad spâgh dorê, nàstar e stagnôla.
I grând eròi e patriòt vegetêl, cumè Amanita, e' fóng velenós e la su cumpâgna Cicuta, ch'i à vindichê milión ad piânt fati fura amazènd sól quèlch òm aquè e alè, i vèn perseguitê e sterminê da j òmn par e' sól gost d'amazê, sénza gnânca tirê fura scûš gastronòmichi. L'è un vèr e pröpi delèt pulìtic. Cs'a fa Amnesty? La stà zèta? Sól parchè d'là di dirèt dl'Òm u n'gn'è i dirèt de' Fóng?
Guardì l'animalesta vegetariân ch'u j fa pietê un piat ad bianchèt e e' s'scàja contra al stragi de' pès nuvèl, mo pu e' s'ingòla di catlèn ad latuga zuvnéssum, dop avé smarê al su ferìd cun sêl òli aèd, limòn e pèvar.
E lò incóra e' rifiùta al mômi ad ninèn cumè e' parsùt e e' salàm, mo pu l'esita sól un mumèt, e sól par dóbi organolèttic, d'nènz a al mômi vegetêli cumè la mustêrda e la fròta seca o candìda.
Parchè l'ôv nö e la nôš sè?
E, no sól int agl'ustarì, e' lât nö e e' vèn sè?
E quì ch'i magna i šgòrb ad soia e brisa i pulsèn viv cundì?
Ènca la terminulugì l'è da magna-cadàvar: u s'mastìga cùr ad palma e ad carciòf, gâmb ad sèlar, tëst d'aj e urcèt pugliëši cun al zim ad rêva.
Bèle prevèsta, e alóra scuntêda, l'è la reazion dj animalesta vegetariân, d'nènz a sti chêp d'imputazion, e alóra a n'la nominèm gnânca. Purèt, lasèmli crogiolê int i su sèns ad colpa mêl ascós.
U n's'pò brisa imbruiê cun l'incòscio persunêl, nè sôratot cun quèl coletìv.
E' Temp, a su temp, e' s'incarichërà ad vindichê tânt delèt a sèns ùnic, e u l'farà druvènd la vasta patulugì ad cal maladì ch'al va a ruvinê la tèrza etê bèle trésta ad quì ch'i s'è intestardì int un'alimentazion sbilanzêda ch'la n'à sèns, ènca savènd d'avé un budèl cun una lunghëza e una dutazion glandolêra da onnìvor.
E' Temp, grând ideòlogo de' muvimènt filovegetêl: e' fa campê milèni al sequoie e un dè sól al farfàl efìmeri.
Cun un Fundadór e Presidènt Onorêri acsè, e' MOVIMENTO FILOVEGETALE e' ciàma a raccolta i filovegetêl ad tot e' mond par anunziê: "Filovegetêl ad tot e' mond, unìv par cumbàtar unì a favór dla causa cumuna!"
Par adës tânt i n'as capès brisa e tânt êtar i è parfèna i è contra ad nó.
Mo a la fin, e' Temp e' s'darà ragiòn.
Gigi Picetti
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
|